Liejcuna tapucärishgan

¿Imanirtaj Proverbios 30:18, 19 textucunata escribej nergan ‘manami tantiyayta atipächu warmiwan ollgu imano majachacashanta’?

Cay texto nishgantaga achca runacuna y Bibliata estudiaj runacunapis manami tantiapäcunchu. Chay texto nin: “Fiyupa yarpachacurpis manami tantiyayta atipächu. Chaycunaga quimsami can; mas jucpis canrämi: Janajcho ancapa näninta, gagacho culebrapa näninta, lamarcho büquipa näninta; warmiwan ollgu imano majachacashantapis” (Prov. 30:18, 19, TDI).

Naupata tantiarganchi ‘warmiwan ollgu imano majachacashanta’ mana ali cajpa parlaycashgantami. ¿Imanir chayno tantiarganchi? Guepan caj textucunachoga parlaycan mana ali cajcunapaj, ‘mana contentakuqkunapaq’ (Prov. 30:15, 16). 20 caj versiculupis parlaycan ‘runanta jarukuq warmipaqpis’, paymi nin “noqaqa manami ima jutsatapis rurashqätsu”. Y Proverbios 30:19 wilacuptin anca vuelashganpita, culebra gaga jananpa purishganpita y barco lamarpa aywashganpita, yarpashganchi caycuna yupinta mana jaguishganta, chaymi pipis cuentata gocunchu maypataj aywashga. Chaynolami tantiashganchi cay mozuga jipashta mana cuentata gocushganyaj paywan cacunanpaj engañashgatami.

Pero canan tantianchi cay textuta escribej runaga almiracushganpita y mana tantiayta atipashganpita parlaycashgantami. Chauraga musyanchi cay texto ali cajpaj parlaycashganta.

Chaynomi ninpis hebreo rimaycho chay texto unay escribiycashgan. Juc librupis chaytami niycan Proverbios 30:18 textupaj: “manami tantiayta atipächu” niptenga, parlaycan “alapa almiracuypaj cajcunalapitami” (Diccionario Teológico Manual del Antiguo Testamento, de Ernst Jenni y Claus Westermann, traducido por Rufino Godoy).

Estados Unidoscho Harvard universidapa Crawford Toy profesorninpis chaynomi yarpan. Paymi nin cay textuga manami mana alicunapita parlaycanchu sinoga parlaycan almiraycuypaj cajcunapitami.

Caycunawanga tantianchi Proverbios 30:18,19 textuga wilacuycan mana tantiayta atipashganchicunapita y almiracuypaj cajcunapitami. Cay textuta escribej runano noganchipis pasaypa almiracunchi imano anca vuelashganpita, culebra chaquiynaj carpis gaga jananpa purishganpita, jatuncaray barcucuna lasaj carpis lamar jananpa aywashganpita y imano juc mozo jipashwan enamoracurcur cushishga goyashganpitapis.