¿Imaylapis lapanchicunapaj micuy aypangachuraj?
Entero munducho runacuna, guellayta tarinapaj sasa cashganraycur huelgata rurarcaycan. COVID-19 gueshyaraycurpis masraj imacunapis sasa ticracurish: wichgapacushga caycarga manami facilchu cashga postalamanpis waquincuna aywananpaj. Imacunapis guellaypäraj captenga wacchacunapäga más laquicuypäraj cashga.
¿Imaylaga ’guellayraycur laquicönachu’ pilapis nengachuraj? Aumi. Bibliaga wilacunmi lapan problemacunata Dios alchacächinanpaj.
Guellayraycur imayca nacaycunata Dios imano alchacächinanpaj
¿Imataj caycan? Autoridäcunaga imatapis rurayta puedipäcunchu lapan runacunapa guellaynin mana pishinanpaj.
¿Imanotaj alchacanga? Jehová lapan autoridäcunata ushacächir quiquinpa Gobiernunta churanga y gobiernunlawanmi cielupita cay Pachata gobernamäshun (Daniel 2:44; Mateo 6:10).
¿Ima cawaynaraj galaycunga? Juc gobiernula cashganraycurmi imaycacunapis shumaj canga. Chayraycurmi runacunapaga imalatapis tarinapäga manami sasa cangachu ni guellaypitapis pipis nacanganachu (Salmo 9:7-9, 18). Chay tiempuchoga lapan familiacunapa aruyninpis canga y cushishgala cawapäcunga. Bibliaga cayta wilacun: “Wayinkunata ruraykurmi kuyashqä runakuna tsaycho tanqa. Üvata plantarmi wayuyninta mikupäkushpan kawanqa. Wayita sharkatsishqanchöpis manami juk runakunatsu tanqa, sinöqa kikinkunami tsaycho tanqa. Üvata plantashqantapis manami juk runakunatsu palar apakärinqa, sinöqa kikinkunami palapäkunqa” (Isaías 65:21, 22).
¿Imataj caycan? Pï maytapis imayca desgraciacunaga pasanmanmi, chayraycur cawayninchi sasaman ticracurin.
¿Imanotaj alchacanga? Diosninchimi Gobiernunwan imayca mana alicunata ushacächenga, mana manchacuypa y jaucala cawanapaj.
¿Ima cawaynaraj galaycunga? Diosninchi ushacächenga gueshyacunata, guerracunata, muchuypis canganachu y lapan familiacunapa imaycancunapis pishengachu (Salmo 46:9; 72:16; Isaías 33:24). Dios cayta nimanchi: “Acrashä runacunaga allillami tiyangapaj. Mana manchacuypa sigüru wasicunachömi tiyangapaj” (Isaías 32:18).
¿Imataj caycan? Runacunaga quiquilancunapämi imaycatapis ashin, waquincunamanga manami yarpanpishchu.
¿Imanotaj alchacanga? Dios cay Pachata gobernamuptenga runacunaga waquincunapäpis yarpachacongami (Mateo 22:37-39).
¿Ima cawaynaraj galaycunga? Diosninchi cay Pachata gobernamuptenga lapanchimi cuyapäcoj cashun, chaymi runacunaga “Manam quiquilanpag imatapis” ashingachu (1 Corintios 13:4, 5, Ambo Pasco Biblia). Bibliaga cayno wilacun: “Mananami pipis mana allita ruranganachu. Imanömi lamarcho yacu juntan, chaynömi cay pachachöpis TAYTA DIOSTAa rispitaj runacunallana juntasha canga” (Isaías 11:9).
Bibliaga nin ushanan tiempucho cawaycashganchita y ichiclachonami lapan aunimashganchita Diosninchi cumplenga (Salmo 12:5).bChay tiempo chayamunancama Biblia nishgancunaga yanapämanchi charashganchicunalawan cushishga cawacunapaj. Chaypita maslata musyarcunayquipaj, ricariy “Cómo vivir con menos” y “Una opinión realista del dinero”, nishgan yachacuycunata.
a Bibliaga wilacun Diosninchipa jutin Jehová cashganta (Salmo 83:18).
b Imanir Bibliaman yäracunayquipaj musyayta munarga cayta leiy: “La Biblia tiene la verdad”.