Pasaypa mana ali tiempo: ¿dañashga cajcunata Biblia yanapanmanchuraj?

Huracancuna, tifoncuna, jiruruypa locu wayra y tornaducuna pasaypami dañacun, yacu alapa shuntacaptin y lamarpis yargucuyta munaptin. Alapa tamyaptin loglacunata apamun y alapa rayumuptin yoracunatapis ushaypami rupaycunman. Manami chaylachu, imapis mana tamyaptin, alapa shanaptin y alapa rashtamuptin achca desgraciacunata yurichimun. Chaychica runacunami chay desgraciacunaraycur nacapäcun. ¿Gampis nacaycanquichu?

May chaychopis mana ali tiempo captin cada cadalami pasaypa fiyu desgraciacuna pasaycan. Federación Internacional de Sociedades de la Cruz Roja y de la Media Luna Roja juc informincho nin: “Desgraciaraycur cada cadala más runacunami nacaycan, achca yacu wasicunata juchuchiptin, tormentacuna captin y mana tamyaptin cay caway vida alapa sasami y micuypis ushacäcun, chayraycur cada wata chaychica runacuna marcanpita aywacun”.

Chaycunapa pasajcuna nacapäcun cuerpun dañashga captin y alapa laquicuymanpis chayan. Achcajmi wasinta y charashgancunata ograpäcun, y öraga cuyashgantapis wanupacun.

¿Chaycuna mayganlapis pasashushcanquicu? Biblia yanapäshunquimanmi. Aumi, maychicaj runacunata mayna yanapashga. Paycunata shogarganmi, shamoj tiempuman yarpächergan y ali consejucunatapis tarirgan (Romanos 15:4). Jinamanpis Bibliaga cay tapucuycunata contestamun: ¿imanirtaj Diosga chaycunata permitin?, ¿imalapitapis castigaycämanchichuraj?

Manami Diospa castigunchu

Diosga runacunata manami nacachinchu. Bibliami nin: “Tayta Diosga manami jucha rurayta yarpanchu. Pitapis manami jucha rurayta yarpächinchu” (Santiago 1:13, TDI). Chauraga mana ali tiempo captin runacuna nacapäcuptenga Diosga manami culpayojchu.

Unaycho fiyu runacunata tamyawan o imayca camashgancunawan Dios castigashganta Bibliaga wilacunmi. ¿Pero canan wichanpis desgraciacunawan Dios castigamanchichuraj? Manami. Cananga mana ali tiempo ilajpitami chayamun y lapanchitami dañamanchi. Unaychoga ichanga ima pasacunanpaj cajta Diosga tiempuwanmi wilacamoj, chaynopa ali runacuna salvacunanpaj. Noé cawashgan wichan lapan pachacho diluviuta apamuptin cay quimsacunata rurargan: tiempulapitami wilacamurgan, imanir diluvio cananpaj tantiachicurgan y Noetawan familianta salvargan (Génesis 6:13; 2 Pedro 2:5).

Chaypita maslata musyayta munarga, cay yachachicuyta ricay “¿Qué dice la Biblia sobre los desastres naturales?”.

Nacaycajcunapaj Diosga yarpachacunmi

Bibliaga nin Jehováa cuyamanchimi y laquicunmi nacaptinchi. Tantiarinapaj ishcaylata ricärishun.

• Isaías 63:9: “Paykuna nakaptinmi Tayta Diospa shonqunpis fiyupa nanarqan”, (MYL).

  Ima ninantaj: Nacaptinchega Jehovatapis nanaycunmi.

• 1 Pedro 5:7: Pay “llaquipämanchi”, (Panao Biblia).

  Ima ninantaj: Alila caycänanchipämi Jehovaga munan.

Runacunata Jehová alapa cuyaptinmi yanapayta munaycun. ¿Y maychotaj chay yanapacuyga caycan? Bibliachomi. Chaychomi tarinchi ali consejucunata y shamoj tiempucho ima desgraciacuna mana pasaptin ali cawanapäpis (2 Corintios 1:3, 4).

Pasaypa mana ali tiempo ichiclachona ushacanga

Bibliacho Jehová caytami aunicun: “Alli goyänayquipämi yarpaycä, manami ushacächinäpächu” (Jeremías 29:11, TDI). Mana ali tiempuraycur nacananchita Diosga manami munanchu. Payga munan cay Pacha paraisuman ticraptin cushi cushila cawananchipaj (Génesis 1:28; 2:15; Isaías 32:18).

Chaytaga Diospa Gobiernunmi ruramunga. ¿Y maypitataj gobernamäshun? Cielupitami, chaychoga Jesusmi Rey caycan (Mateo 6:10). Jesusga poderyoj y yachajmi mana ali tiemputa controlananpaj. Chayta ricachicushga cay Pachacho caycaptinmi (Marcos 4:37-41). Shamoj tiempuchoga yachachimäshun cay pachata cuidar jaucala cawanapaj, chaynomi ricachicunga musyaj yachaj cashganta (Isaías 11:2). Cay Pachata Jesús gobernamuptin, pipis manami nacanganachu mana ali tiempuraycur.

Capaz tapucunqui imayraj chayga canga. Chayta musyayta munarga, cay yachachicuyta leiriy: “¿Cuándo gobernará la Tierra el Reino de Dios?”.

¿Imatataj cananpita ruranquiman?

Bibliapa consejuncuna yanapäshunquimanmi ima desgraciapis manaraj pasacuptin, pasaycaptin horacho y pasashga captinna.

• 

  Manaraj pasacuptin: Jucla imatapis ruranayquipaj listuna caycay.

  Biblia nishgan: “Alli tantiyacoj runaga mana alliman chayananpaj cashanta musyar witicunmi. Mana tantiyacoj runami ichanga mana cäsupaypa aywar fiyupa ñacayman chayan” (Proverbios 22:3, TDI).

  Ima ninantaj: Tiyashgayqui marcacho ima desgracialapis cananpaj cajman cananlapita yarpachacuy. Chaynopa listuna caycanquipaj jucla imatapis rurar familiayquita cuidanayquipaj.

  Waquincuna pasashgan: “Tiyashganchicho bunyar-raj rupar galaycurgan, chaymi jucla gueshpicushcanchi. Runacunaga fiyupa manchacur, imata rurananpäpis musyarganchu. Nogacunami ichanga listuna carcaycargä. Aywacunanchipaj mochilanchicho jampicuna, necesitashganchi ropacuna caycarganna. ¡Cushicömi preparado carcaycashgäpita!” (Tamara, California, Estados Unidos).

• 

  Pasaycaptin horacho: Imata rurashgayquipitapis masga salvacunayquipaj calpachacuy.

  Biblia nishgan: “Ali kawayqa manami imaykayuqpis kaptikiraqtsu kaykan” (Lucas 12:15, MYL).

  Ima ninantaj: Imapitapis cawaymi más valoryoj caycan.

  Waquincuna pasashgan: “Tifón Lawinb wasinchita ushacächiptin, fiyupa yarpachacur imata ruranäpäpis musyargächu. Chayno caycaptëmi Jehovata mañacur imano sienticushgäta wilapargä. Wasita ograshga carpis alimi sienticurgä cawaycashgäpita” (Leslie, Filipinas).

• 

  Pasashga captinna: Shamoj tiempucho ima pasananpaj cajman ama yarpachacuychu.

  Biblia nishgan: “Cada junaq imalapis yarpachakunaykipaq kaykaptinqa wara junaqpaq ama yarpachakäriytsu” (Mateo 6:34, MYL).

  Ima ninantaj: Shamoj tiempucho ima pasananpaj cajman pasaypaga ama yarpachacuychu.

  Waquincuna pasashgan: “Huracán Irma pasashga captinna wasëcho achca yacu yaycuptin fiyupa yarpachacurgä. Ruranäpaj achcami caycargan, ichanga imata ruranäpäpis musyargächu. Chaura chay hora yarpargä wara junajpaj mana yarpachacunanchipaj Biblia nishganta. Mana creipämi cargan Jehová imano yanapamashganta jaucala caycänäpaj” (Sally, Florida, Estados Unidos).

Waquin consejucunatapis leiyta munaptiqui, cay yachachicuyta ricay: “Cuando golpea un desastre. Qué hacer para sobrevivir”.