¿Imataj Biblia wilacun clima cambiashganpita y shamoj tiempupitapis?
“Canan clima cashganga manami unaynonachu. Cay Pachaga pipis manana tiyananpänachu caycan” (The Guardian).
Quiquin runacunapa culpanraycur imaycacuna pasaycan. Imaycata estudiajcunapis acuerduchomi caycan, canan wichan clima tucuynopa cambiashganga runacuna rurashgancunapita cashganta. Shanay pasaypa captinmi climapis cambiashga, chayraycur imaycacuna pasaycan. Waquilanlata ricärishun:
Unaypitapis masraj Inti shanaycan, usyaycan, alapa tamyaycan y mascunapis. Chayraycur inundaciuncuna caycan y monticunapis rupar ushacaycan.
Ártico nishganpita rajupis yacumanna ticraycan.
Lamarpis masraj jatunyaycan.
Chaytaga ricanchi lapan Pachacho pasaycashganta. Chaymi The New York Times nishgan periódico 193 naciuncunapita parlar nergan: “Tiyashganchi Pachaga pipis ‘yanapaycalämay’ nishganno caycan”. Clima cambiashganraycur achcajmi wanurgan y nacarcaycan, chaymi Organización Mundial de la Salud nin “cayga juc peligro cashganta runacuna jaucala cawacunanpaj”.
Chayno captinpis imaycacuna caycan laquicunapa trucan shamoj tiempuman yarparar cushicunapaj. Bibliaga maynami wilacurgan canan pasaycashgancunata. Jina nimanchi imata Diosninchi ruramunanpaj, chaynopa shamoj tiempucho ali cawacunapaj.
¿Bibliaga wilacushgachuraj clima cambiananpaj?
Aumi. Canan wichan usya, alapa tamya o maspis pasashganga tincunmi Biblia wilacushganwan canan tiempo ima pasananpaj cajwan.
Biblia wilacushgan: Jehová ushacächenga ‘cay Pachata mana alita rurajcunata’ (Apocalipsis 11:18).
Bibliaga wilacurgan runacuna cay Pachata malograycur casi ushacächinanpaj. Y chayga rasunmi, canan imayca pasaycashgancunawan ricanchi unaypitapis masraj cay Pacha pasaypa dañashga cashganta.
Cay profeciaga ricächimanchi mana shuyaränapaj runacuna cay Pachata alchachinanpaj. Bibliami nin quiquin Diosmi castigananpaj Pachata mana alita ruraycajcunata. Öraga ali shonguyoj runacuna alapa calpachacäriptinpis cay Pachata cuidananpaj, rasun cajchoga michäcuyta camäpacunchu runacuna Pachata manana malogrananpaj.
Biblia wilacushgan: “Mantsakuypaq señalkunami rikakämunqa” (Lucas 21:11).
Bibliaga mayna wilacurgan “mantsakuypaq señalkunami” canan wichan ricänapaj. Clima cambiashganraycur, entero munducho imayca desgraciacuna pasashganga manchacuypämi cashga. Runacunapis imayca yarpachacuycunawan caycar shumaj punuyta camäpacunchu yapay ima desgracialapis pasananta manchacur.
Biblia wilacushgan: Último tiempucho “fiyupa sasa goyaymi cangapaj. Chay wichan runacunaga cangapaj quiquillanpaj imatapis yarpaj, guellayllapaj wañoj, […] mana cuyapäcoj, […] alli goyajcunapa contran, amïguncunata contranman entregaj, mana yarpachacuypa imatapis ruraj” (2 Timoteo 3:1-4).
Bibliaga wilacurgan runacuna imano capäcunanpaj, comportacärinanpäpis, chayno cashganpitami cay Pachata dañaycan. Autoridäcuna y jatun empresacuna runacunata yanapänanpaj trucan quiquincunalapaj más yarpachacun, chaymi guellayraycur imaycatapis ruran. Junto aruyta munarpis juc acuerduman chayanchu Pachata imano cuidananpaj.
Cay profeciacuna nishganno, ama shuyarashwanchu runacuna alipaj cambiananpaj o cay Pachatapis cuidar alchachinanpaj. Bibliaga nin runacuna quiquincunalaman yarpachacur “mas mana allimanmi chayanga” (2 Timoteo 3:13).
Imanirtaj seguro caycashwan Diosninchi chayta alchananpaj
Bibliaga nimanchi Camacojninchi Jehováa, cay Pachacho tiyajcunapaj alapa yarpachacushganta. Ricärishun imataj Jehová ruramunanpaj cajta quimsa textucunacho:
1. Diosga “[Pachata] camasha manami chunyaj cananpächu. Chaypa ruquenga camasha chaycho cawajcuna tiyananpämi” (Isaías 45:18).
Diosga aunicushganno lapanta ruranga (Isaías 55:11). Manami jaguingachu cay Pacha ushacänanpaj ni chunyaj cananpäpis.
2. “Umildicunami ichanga alli pachacho tiyanga. Tayta Diosmi jauca goyächenga. […] Chayllachömi imaycamapis goyäconga” (Salmo 37:11, 29).
Diosga aunicun cay Pachacho runacuna jaucala imaycamapis cawapäcunanpaj.
3. “Fiyu runacuna, […] jachata achurisha illgajnömi cay pachapita illganga” (Proverbios 2:22).
Diosga aunicun mana ali rurajcunata ushacächinanpaj, cay Pachata malograycajcunatapis.
¿Imataj Diosninchi noganchiraycur ruramunga?
¿Imanotaj Dios cay Pachata juc cuyaylapaj Paraisuman ticrachenga? Chaytaga ruranga Gobiernunwanmi (Mateo 6:10). Chay Gobiernuga cielupita gobernamunga. Pachacho caycaj problemacunata alchananpäga manami maygan gobiernuwanpis juc acuerdumanrächu chayanga. Diospa Gobiernunga runacunapa gobiernuncunatami ushacächenga (Daniel 2:44).
¡Chayga ali wilacuymi runacunapaj y cay Pachapäpis! (Salmo 96:10-13). Jehová imata ruramunanpaj ricärishun:
Pachata shumajyächenga
Biblia nishganta: “Chunyaj jircacunapis chaqui pachapis cushicuchun. Gala pampacuna cushicur berdiypa-berdir guewa wiñar waytachun” (Isaías 35:1).
Noganchiraycur cayta ruranga: Jehová Pachata alchachenga, runacuna pasaypa dañashgan cajcunatapis shumajyächenga.
Clima alchashga canga
Biblia nishganta: “Löcu wayratapis wall-wallyaycajllaman Tayta Diosga ticrachiran. Yacu löcuyaycajpis chawacäcuran” (Salmo 107:29).
Noganchiraycur cayta ruranga: Jehová poderyoj car, wayratapis, loco tamyatapis y mascunatapis chawächenga. Chaynopa runacuna mana nacanganachu.
Yachachimäshun Pachata cuidanapaj
Biblia nishganta: “Imano kawanaykipaqpis kikïmi tantiyatsishayki y yachatsishayki” (Salmo 32:8).
Noganchiraycur cayta ruranga: Jehová runacunata churashga cay Pachata cuidanapaj (Génesis 1:28; 2:15). Quiquinmi yachachimäshun imata rurartaj Pachata shumajyächinapaj. Chayga canga camashgancunata shumaj cuidanapaj y jaucala cawanapaj.
a Diospa jutinga Jehová (Salmo 83:18). Cay yachachicuyta leiramuy “¿Pitaj Jehová?”.