¿Imaylapis terrorismo ushacangachuraj?

Marcanchicho terroristacuna yurimuptin caynochari tapucunchi: “¿Diosga ricaycanchuraj pasaycashgancunata? ¿Imanirtaj caycuna pasan? ¿Imaylapis terrorismoa ushacangachuraj? ¿Imataraj ruräman alapa mana manchacunäpaj?”. Bibliami chay tapucuycunata contestamun.

¿Ima nintaj Diosga terrorismupita?

Diosga chiquinmi peliacunata y terrorismutapis (Salmo 11:5; Proverbios 6:16, 17). Jesús Diospa wamran car discipuluncunata corrigirganmi mana peliananpaj (Mateo 26:50-52). Waquin runacunaga Diospa jutincho mañacuycur guerracho pelianacärin. Diosga chayta rurajcunata manami aprobanchu. Jina mañacärishgantapis manami wiyanchu (Isaías 1:15).

Lapan nacaycajcunapämi Diosga yarpachacun, terroristacuna mana ali tratashgan cajcunapäpis (Salmo 31:7; 1 Pedro 5:7). Jina Bibliaga nin, peliacunata Dios ushacächinanpaj (Isaías 60:18).

Imanirtaj terrorismo can

Bibliami tantiachimanchi imanirtaj terrorismo can: “Runaga runa-masinta mana allita rurananpaj munayniyojmi caycan” (Eclesiastés 8:9, TDI). Unaypitami autoridayoj runacunaga runa masinta manchachir mana alipa tratar nacachipäcun. Chaymi waquincunaga terroristacunano peliayta munapäcun (Eclesiastés 7:7).

Terrorismo ushacänanpaj

Diosga aunicun imayca manchachimashganchicunata y peliacunata ushacächinanpaj y cay pachacho jaucala cawacunapaj (Isaías 32:18; Miqueas 4:3, 4). Payga caycunatami ruranga:

Terrorismuta chipyaj ushacächenga. Mana ali gobiernucuna mana canganachu y Diospa gobiernunlami mandacamunga, lapan pachacho. Jesucristumi, chay gobiernucho rey canga, lapancunata ali tratanga, nacaycunata y peliacunatapis ushacächenga (Salmo 72:2, 14). Chay cumplicuptin terrorismo manami canganachu. Lapan runacunatami “Tayta Diosmi jauca goyächenga” (Salmo 37:10, 11, TDI).
Terrorismo mana alicuna rurashganta alchanga. Diosmi runacunata aliyächenga terrorismuraycur cuerpun dañashganta y imayca laquezaman chayashganpitapis (Isaías 65:17; Apocalipsis 21:3, 4). Mana chaylachu, Diosninchi aunicushga wanushgacunata sharcachimunanpaj mushoj Pachacho jaucala cawapäcunanpaj (Juan 5:28, 29).

Bibliami shumaj tantiachimanchi yäracunapaj Dios ichiclacho cumplimunanpaj cajman. Ichanga tapucuycanquichi imanir Diosga terrorismuta ushacächishgarächu. Chayta musyanayquipaj, cay videuta ricay ¿Imanirtaj nacayta Dios ushacächinrächu?

a Terrorismo niptinchega, niycanchi runacuna peliacäriptin y manchachicäriptin, chaynopa gobiernuta, religiunta o imano cawacärishganta trucachinanpaj. Ichanga tiyashgancho runacuna chaycunata ricaptin tucuynopami parlapäcun terrorismo cashganta o manapis.

Bibliami yanapan terrorismuraycur nacajcunata

Biblia nimanchi caycunata ruraptiqui yanapäshunayquipaj:

Diosta mañacuptiqui (Filipenses 4:6, 7).
Yarpänanchi shamoj tiempupaj Biblia ima nishganta (Hebreos 6:19).

Bibliapa consejuncunata maslata tarinayquipaj, cay yachachicuyta ricay “Qué puedo hacer para no preocuparme tanto”.

Jehovapa testiguncuna terrorismuraycur nacaycajcunata yäracoj masincunapis yanapashga. Ishcaylata ricärishun:

Natalia y Aslán wamran isgun watayoj, Beslán marca (Rusia) juc escuelacho carcaycargan, mana respetaypa juc grupo terroristacuna yaycuycur 1000 presucunapitapis masta charergan. Laquicuypaj, achcajmi wanurgan, masga wamracuna. Nataliawan Aslán salvacäriptinpis, pasashgancunaga pasaypa laquezaman chayachishga. Ricäriy imataj yanapashga aliyänanpaj.
Pablo y Sophie wamranta wanupacurgan terroristacuna Nueva York marcacho Torres Gemelas nishganta atacaptin. Cay videucho, ricanqui terroristacuna atacashganpita paycunata y waquincunatapis imata yanapashga.