Pandemia usharcuptenga, ¿yapay unaynochuraj cawacushwan? ¿Imanotaj Biblia yanapämanchi?

“Lapanchimi munaycunchi yapay unayno cawacuyta” (Ángela Merkel, alemaniapita).

Gampis acuerduchochi caycanqui Ángela nishganwan, masraj COVID-19 gueshyaraycur entero munducho achca runacuna nacaycashganta ricar. Pero, unayno cawacuyta munarga, ¿imapitataj parlaycanchi? ¿Imacunataj rurayta runacuna munapäcun?

• Pandemia manaraj galaycuptin caway imano cashgan. Waquincunaga familiancunawan, amiguncunawan tincurir shumaj macalacuyta munan y viajipa junto aywaytapis. Waquincunana Anthony Faucia doctor nishganno, “restauranticunaman, teatro nishganman yapay aywayta o juc ruraycunatapis librina rurayta munapäcun”.

• Cawaynincho cambiucunata rurayta munan. Waquincunaga ‘cananga unaypitapis más aliraj cawacunanchi’ nir yarpapäcun. Ima cambiulapis cananpaj munan, capaz canman walca tiempula arunanpaj, pï maypis igual ricashga cananpaj; chaynopa manana achca runacuna nacananpaj ima gueshyaraycur. Foro Económico Mundial nishganta ricaj Klaus Schwab nishganno, “cay pandemia caycan yarpachacunapaj imano cawaycanchi, cambiucunata ruranapaj y unaypitapis más alina cawacur galaycunapaj”.

Chayno captinpis, waquincunapäga sasami caycan yapay unayno cawacunanpaj pandemiaraycur alapa nacashganpita. Achcajmi aruyniynaj, wasiniynaj quedacurgan, saludninpis masraj empeorashga y castancunapis wanushga.

Rasunpa cajcho pipis musyanchu cawayninchi imano cananpaj pandemia usharcuptin (Eclesiastés 9:11). Ichanga Bibliaga yanapämanchimi junaj junaj ima problemacuna captinpis imano aguantanapaj. Jina Diospa aunicuynincunapita wilamanchi, chaycunaga yäracuypämi caycan, y chaypita yachacurga cushichishunquimi.

¿Ima nishwantaj COVID-19 gueshya o pandemia cashganpita?

Unaynami Biblia mayna wilacurgan manchacuypa gueshyacuna o pandemiapis cananpaj caj ushanan junajcunacho (Lucas 21:11; Mateo 24:3). Chauraga COVID-19 gueshya pasashganta chayno ricaptinchega Biblia wilacushganno cumplicuycan, chaycho nergan muchuypis, guerrapis y jatun terremotucunapis cananpaj.

¿Cayta musyarga imanotaj yanapämanchi? Pandemia usharcuptinpis, Bibliaga nimanchi “fiyupa sasa goyaymi” cashgan wichan cawaycashganchita” (2 Timoteo 3:1, TDI). Cayta musyarga yanapämanchi alapa mana yarpachacunapaj o mana manchacunapaj cay munducho imapis más mana alimanraj ticraptin.

Bibliaga shumaj tantiachimanchi cay munducho caycaj lapan problemacunaga ichiclacho ushacänanpaj cajta. ¿Imanoraj chayga canga?

Pandemia usharcuptinna, walcalacho ali caway galaycamunga

Bibliaga manami wilacunchu canan wichan problemacuna pasaycashganchilapitachu, sinoga shamoj watacunacho imano ali caway cananpäpis. Chaytaga Pachacho caycaj lapan gobiernucuna munan, ichanga manami camäpacunchu. Diosnilanchimi chayta ruranga. Payga cayno aunimanchi: “Wagay manami canganachu. Wañuy manami canganachu. Nanächicuypis, llaquicuypis manami canganachu. Unay caj cawaycunaga llapannami ushacanga” (Apocalipsis 21:4, TDI).

Jehováb Diosga nimanchi: “Llapantapis nogaga mushojmanmi ticrachë” (Apocalipsis 21:5, TDI). Payga Pachacho caycaj lapan problemacunata alchamunga, pandemiaraycur cashgantapis alchanga. Diosninchi caycunata aunimanchi:

• Lapancuna sano canga y ali yarpaniyojpis. Gueshyacuna ni wanuypis canganachu (Isaías 25:8; 33:24).

• Cushishga lapanchipis arushun. Uticächicoj o yamacächicoj aruycuna manami canganachu, pipis calpaynaj ricacungachu arushganpita (Isaías 65:22, 23).

• Lapancuna ali cawapäcunga. Muchuypis y yarganaypis canganachu (Salmo 72:12, 13; 145:16).

• Pipis manchacurla cawanganachu y wanushga castanchicunapis cawarimunga (Isaías 65:17; Hechos 24:15).

¿Cayta musyarga imanotaj yanapämanchi? Bibliaga nimanchi shuyarashganchi cajga “büqui mana kuyukunanpaq tsararaq anclanömi kaykan” (Hebreos 6:19, MYL). Cawayninchi aliyänanpaj cajta musyarga calpata gomanchi canan wichan imayca problemacunata aguantanapaj. Jina yanapämanchi imayca yarpachacuycunawan mana caycänapaj, sinoga jaucala y cushishga cawanapaj.

¿Ichanga Bibliacho caycaj aunicuycunaga yäracuypächuraj? Chayta musyanayquipaj “La Biblia tiene la verdad” yachachicuyta leiramuy.

Bibliapa consejuncuna yanapämanchi pandemia cashgan wichan

• Cawayninchita valurashun

  Bibliaga nin: “Yachaj cayga imapitapis chapacunmi” (Eclesiastés 7:12, TDI).

  ¿Imanotaj cay consejuta cäsucushwan? Ali decisiunta acrashwan chaynopa ima gueshyawanpis jucla mana contagiacunapaj. Autoridäcuna wilacushgantapis altanto caycashwan imano cuidacunapaj, ayca runacuna contagiacushganta y pïcuna vacunashgana caycashganta. Chayga yanapämäshun musyanapaj maycho tiyashganchicho contagiucuna cashganta o manana.

• Tantiacoj cashun

  Bibliaga nin: “Yachaj tantiyaj runaga ima mana allimanpis chayayta manchacurmi witicun. Mana tantiyacojcunatami ichanga imapis mana gocunchu” (Proverbios 14:16, TDI).

  ¿Imanotaj cay consejuta cäsucushwan? Saludninchita cuidanapaj imaycacunata rurashwan. Yachajcunaga creipäcun coronavirus gueshya más tiempuparämi cananpaj.

• Yäracuypaj wilacuycunata ashishun

  Bibliaga nin: “Mana tantiyacojcunaga imatapis wiyashanta llapantami criguicurcun. Yarpaysapacunami ichanga imatapis manaraj rurar sumaj yarpachacunraj” (Proverbios 14:15, Ambo-Pasco).

  ¿Imanotaj cay consejuta cäsucushwan? Shumaj yarpachacushwanraj imatapis manaraj rurar. Chayga yanapämäshunmi, ichanga información falsa cajta creiptinchega, cawayninchita peligrumanpis churashwanchi.

• Alita yarpaj cashun

  Bibliaga nin: “Ama yarpachacuychu ‘¿Imanir-raj ñaupatacunaga mas alli caran?’ nir. Chaynöga yarpachacuycanqui manami yachaj runanöchu” (Eclesiastés 7:10, TDI).

  ¿Imanotaj cay consejuta cäsucushwan? Canan cawayninchi imano cashganman yarpachacushun. Ama laquicushwanchu pandemia manaraj galaycuptin cawayninchi imano cashganman, y cutin cutin yarpachacushwanchu pandemiaraycur imacunata rurayta mana puedishganchiman.

• Waquincunata respetananchi

  Bibliaga nin: “Llapan runacunata rispitay” (1 Pedro 2:17, TDI).

  ¿Imanotaj cay consejuta cäsucushwan? Runacunaga imaycacunatami nipäcurgan pandemia cashganpita y imano afectashganpitapis. Paycuna nishganta respetananchi y ima ruranapaj camacächishganchita rurashun. Mana vacunashga cajcunata, edäyashgacunata y gueshyaycajcunatapis respetashwan y cuyacuywan tratashwan.

• Paciente cananchi

  Bibliaga nin: “Cuyacoj carga imapitapis pasinsacunmi” (1 Corintios 13:4, TDI).

  ¿Imanotaj cay consejuta cäsucushwan? Ama piñacushwanchu waquincuna manchacuptin unayno cayta mana munaptin. Cada cadala wilacuycuna yargamuptin rurayninchicunata yapay ruranapaj ichic sasa captenga, quiquinchiwan paciente cananchi y tiempuraj pasananta jaguishwan.

Bibliami runacunata yanapaycan pandemia wichancho

Jehovapa testiguncunata alapami yanapan shamoj tiempupaj Bibliacho caycaj ali wilacuycuna. Chaura pandemia captinpis jauca y cushishga ricacärin. Jina Biblia nishganta cäsucur cada cadala shuntacärin Diosta adurananpaj, y jucnin jucninpis shacyächinacur yanapänacun (Hebreos 10:24, 25). Pï maypis shamuyta puedinmi Jehovapa testiguncunapa congregaciunnincho reuniunnincuna, cayga videucunalapa ruracuycan pandemiaraycur.

Waquin runacuna nipäcun pandemia wichancho Jehovapa testiguncunawan shuntacushganmi alapa yanapacushganta. Juc warmishi COVID-19 gueshyawan contagiacushga caycar videulapa conectacur galaycushga Jehovapa testiguncunapa reuniunnincunaman. Chay gueshyaraycur alapa afectashga carpis, reuniuncunash yanapargan laquicurla mana caycänanpaj. Chaypita nergan: “Cananga Jehovapa testiguncunata familiätanomi ricä. Bibliata leicuptë yanapäman jauca y tranquila ricacunäpaj. Y problemäcunaman yarpachacunapaj trucan shamoj tiempucho imano caway cashganman yarpachacö. Päquilla yanapämashgayquipita Diosta tarinäpaj, chaytami cawaynëcho ashiycargä”.