2020 wata, “¡Imaypis cushicäriy!” jatun asambleapa programan traducicämushga

Julio y agosto quillacunacho lapan Jehovapa testiguncuna may chaycho caycarpis, 2020 watapaj jatun asambleata ricapäcunga. Chaypäga asambleapa programanta 500 idiumacunapitapis maschoraj traducicämushga. Y cayta ruranapaj manami facilchu cashga, porque asambleapa programanta rurananpäga juc wata o masraj caycan. Pero coronavirusraycur 2020 wata “¡Imaypis cushicäriy!” asambleapa programanga chuscu quillacunalacho rurananpaj cargan.

Departamento Mundial de Compras y departamento de Servicios de Traducción nishgancho yanapacoj hermanunchicuna alapami yanapäcurgan cay ruraycunacho. Traducciuncho yanapacojcuna cuentata gocärirgan achca grupucuna traducciunpita mushoj microfunucunata y imaycacuna necesitashganta asambleata traducinanpaj. Chaymi Departamento Mundial de Compras nishgancho yanapacojcuna 1.000 microfunucunata rantipäcurgan y 200 sitiucunaman apachicamurgan.

Guellayta alapa mana gastanapaj, hermanucuna achca microfunucunata rantipäcurgan, nircur juc sitiuman lapanta apapäcamurgan, y chaychomi cajacunaman winargan entero mundupa apachicamunanpaj. Achca microfunucunata ranticämushgan alapa alimi cargan, cada microfunucunapa chaninga mas barato yurirgan, 170 dólares japuyno.

Departamento Mundial de Compras nishgancho yanapacojcunaga, abril y mayo quillacunacho 2020 watapita chay microfunucunata rantipäcurgan, y nircur entero mundupa apachicamurgan. Chay quillacuna coronavirusraycur negociucuna alapa mana carganchu. Chayno captinpis, mayo quilla ushananpäga waquin sucursalcuna y oficinas de traducción nishgancunapis chay mushoj microfunucunata utilizayta galaycurgan traducinanpaj.

Departamento Mundial de Compras nishganta ricaj Jay Swinney hermanunchi cayno nin: “Cay aruychomi Betelcho caycaj hermanucuna y empresacunacho arojcunawan ali yanapänacurgan. Jehovapa espiritunmi cay lapancho yanapacushga hermanunchicuna necesitashgan microfunucunata barato ranticämunanpaj”.

Nicholas Ahladis yanapacun Servicios de Traducción nishgancho, payga nin: “Traducturcuna mushoj microfunucunata chasquipäcuptinga alapami cushicärirgan. Waquincunawanmi junto cayta mana puedirpis yanapacurgan traducinanpaj y grabananpaj discursucunata, videucunata y canciuncunata 500 idiumacunapitapis maschoraj”.

2020 wata “¡Imaypis cushicäriy!” jatun asamblea ruracänanpäga imaycacunami cargan y asambleapa programanta grabarcunapaj jucmi cargan. Chay mushoj microfunucunaga donate.jw.org o jucnopapis hermanunchicuna apachicamushgan guellaywanmi ranticämushga.