¿IMANOTAJ APACHICUSHGAN GUELLAYTA UTILIZANCHI?
Imaycacuna ruracargan coronavirus manaraj galaycuptin
2020 WATA, NOVIEMBRE QUILLA 1 CAJ JUNAJ
Maychicaj runacuna wata wata bautizacärin y Diosta aduranapaj wasicunapis mana aypannachu shuntacänanpaj. Chaymi localcunata sharcachinanpaj ricajcuna camacächirgan 2020 watacho, 2.700 localcunata sharcachinanpaj y waquincunata alchananpaj.a
Pero coronavirus gueshyaraycur cay ruraycuna ushacarganchu. Publicaciuncunata jorgacänanpaj ricajcuna mandargan localcunata manana sharcachinanpaj. ¿Imanirtaj chayta rurargan? Hermanucuna mana contagianacärinanpaj y autoridäcuna mandashgantapis casucärinanpaj. Chayno captinpis, 1.700 localcunapitapis masmi sharcachipäcurgan y alchapäcurgan COVID-19 manaraj galaycuptin. Nircur 100 sucursalcunachopis proyectucunata ushargan. Cayga, ¿imanotaj hermanucunata yanapargan? Ishcaylata ricarcushun.
Camerún naciunpa sucursalnin. Duala marcacho sucursalga tacshala cargan, y alchapacunanpämi caycargan. Publicaciuncunata jorgacänanpaj ricajcuna yarpachacuycargan chay sucursalta alchananpäga alapa chaniyoj cananpaj. Chaymi juc sitiucho mushoj localta sharcachinanpaj o juc edificiuta rantiycur alchapänanpämi yarpachacuycargan. Pero manami ruracarganchu.
Nircur hermanucuna musyapäcurgan Duala marcapa waclädunman carretera chayananpaj y cayga asambleacunata ruracänanpaj localpita ladunpa pasananpaj musyargan. Caywanga facilmi cargan mushoj sucursalman chayananpaj. Chaymi Jehovapa testiguncunata Pushajcuna camacächirgan, asambleacunata ruracänanpaj terrenuncho mushoj sucursalta sharcachinanpaj.
Camerún naciuncho sucursalta hermanucuna sharcachipäcuycan.
Sasa trabajucunapäga juc empresawanmi contratuta rurargan, aruycunata rasla ushargan y walca guellaylata gastargan. Cay mushoj sucursalta sharcachiycho manami alapa guellayta gastacarganchu. Y Betelcho arojcuna cay mushoj sucursalcho tiyar galaycurgan, COVID-19 manaraj galaycuptin.
Camerunpa sucursaltaga ushargan coronavirus manaraj galaycuptin.
Cananga chaycho arojcunaga más tranquilo arupäcun, y chay mushoj sucursalta Jehovapa bendiciunnintano ricapäcun. Juc majachacashga nipäcushga: “Caycho caycarga juc bendiciunmi y mastarämi arupäcuyta munapäcö”.
Hermanucuna mushoj oficinacunacho arurcaycan coronavirus manaraj galaycuptin.
Oficina Remota de Traducción tojolabal rimaypita (México). Tojolabal rimaycho traducturcunaga, achca watacunapami Centroamérica sucursalchomi arupäcoj, y chayga México naciunchomi caycan. Tojolabal rimajcuna ichanga Altamirano y Las Margaritas marcacunachomi tiyapäcun y cayga sucursalpita mayjina caruchoraj caycan. Traducturcunapäga sasami cargan cay rimaypita más yachacärinanpaj. Mushoj traducturcunata y grabaciuncunawan yanapänanpaj hermanucunatapis sasa cargan tarinanpaj.
Hermanucuna arurcaycan mushoj Oficina Remota de Traducción nishganta sharcachipäcunanpaj.
Chaymi Publicaciuncunata ruracänanpaj ricajcuna decidirgan, traducturcuna tänanpaj tojolabal rimashgan marcacho. Chaymi juc localta rantirgan y alchapargan chaycho traducturcuna arunanpaj. Cayga más alishi caycargan mushoj localta sharcachiypita.
Juc traductor caytami wilacamun: “Centroamérica sucursalcho chunca watacunapa arushcä, y manami tarishcächu juc familia tojolabal rimajta. Canan ichanga waran waran parlapäcö tojolabaj parlajcunawan, cayga yanapaman más ali yachacunäpaj y traducinäpaj”.
Unay caj y mushoj caj Oficina de Traducción tojolabal rimaypita.
Imaycacuna ruracänanpaj 2021 mushoj wata
2021 watapäga, 75 oficinas de traducción nishgancho y Escuelas Biblicas nishganchopis arunapaj caycan. Nircur waquin sucursalcunacho 8 proyectucuna ruracänanpaj caycan. Jucmi caycan localcunata sharcachinapaj Rámapo (Nueva York) marcacho y juccajna Italia y Argentina sucursalcunacho. Chaypita pishinrämi 1.000 Diosta aduranapaj wasicuna sharcachinanpaj. Y manami chaylachu, 6.000 juntacänan wasicunapis trucacänanpaj caycan y 4.000 alchapänanpaj.
Cay lapanta ruranapaj, ¿maypita guellay yurimun? Lázaro González chaypita wilamäshun, payga arun Centroamérica sucursalcho. Caynomi wilacamun: “Tojolabal rimayta hermanucunaga manami alapa guellayta charanchu. Paycunapäga sasachi canman cargan juc mushoj oficinata sharcachinanpaj traducturcuna arupäcunanpaj. Chaymi entero munducho hermanucunata agradecipäcö donaciuncunata apachicamushganpita, chaywanrämi cay localtapis sharcachirgan. Cananga traducturcunaga tojolabal parlaj marcachomi tiyapäcun y shumaj yanapacun”. Cay lapanga ruracämun obra mundial nishganpaj apachicushgan guellaywanmi. Waquincunaga donate.jw.org paginacho donaciunninta apachicamun.
a Localcunata sharcachinapaj ricajcunaga yanapacun sucursalnincho Diosta aduranapaj wasicunata sharcachinanpaj. Lapan pachacho edificiucunata sharcachinapaj ricajcunaga, camacächin maygan proyectucuna ruracänanpaj y imano ruracänanpäpis.