¿Diosga may chaychopis caycanchuraj?
¿Ima nintaj Biblia?
Diosga imata ruraptinchipis ricaycämanchi, pipis pacacuyta puedipäcunchu (Proverbios 15:3; Hebreos 4:13). Pero Bibliaga manami yachachinchu Dios may chaychopis o imacunachopis caycashganta. Bibliaga nin Diosga cielucho caycashganta.
¿Imanoraj Diosga? Payga juc espiritumi (Juan 4:24). Chaymi pipis ricayta puedinchu (Juan 1:18). Achca cutimi Bibliaga nin payga ‘jamacunancho cielucho jamaraycajta’. Manami ninchu may chaychopis o lapan sitiucunacho caycashganta (Isaías 6:1, 2; Apocalipsis 4:2, 3, 8).
¿Maychotaj tiyan? Diosga manami cay pachachochu caycan, payga janaj pachachomi caycan. Chaymi Bibliaga nin ‘jana pachacho tashganta’ (1 Reyes 8:30). Diospa Palabranga wilacun ‘juc cuticho cielucho TAYTA DIOSTAa sirvej angelnincuna pay cajman aywargan’, cayga musyachicun cielucho caycanganta (Job 1:6).
¿Diosga rasunpachuraj cuidamäshun cielucho caycaptinga?
Awmi. Dios cielucho caycaptinpis, payga alapami yarpachacun cay pachacho caycaj runacunapaj. Payga ricaycämanchi imano calpachacuycanchi casucunapaj y yanapämanchi (1 Reyes 8:39; 2 Crónicas 16:9). ¿Imanotaj Dios yanapämanchi?
Mañacuptinchi: Jehovaga lapan mañacuyninchicunata wiyan (2 Crónicas 18:31).
Laquicuptinchi: Bibliaga nin: “Lakikuqkunataqa TAYTA DIOS kuyapanmi. Ima ruraytapis mana kamäpakuqkunata paymi yanapan” (Salmo 34:18).
Consejucunata necesitaptinchi: Diosga Palabranwanmi tantiachimanchi y yachachimanchi ali nänipa aywanapaj (Salmo 32:8).
Runacuna yachachicushgancuna Biblia nishganwanmi tincunchu
¿Imataj nipäcun runacuna? Diosga may chaychopis caycan.
Biblia yachachicun: Diosga manami tiyanchu cay Pachacho (1 Reyes 8:27). Biblia wilamanchi: “Jana patsami wilakuykan Tayta Dios munayniyuq kashqanta. Azulyaraykaqmi musyatsimantsi Tayta Dios lapanta kamashqanta” (Salmo 19:1). Cayga manami niycanchu Dios camashgancunacho tiyashganta. Tantiarinapaj, pipis cuadrucunata pintaptinga manami tiyanchu pintashgancunacho, sinoga chay cuadruncunaga musyachicun chay runa ali pintor cashganta. Chaynolami Dios camashgancunapis musyachimanchi pay alapa yachaj, munayniyoj y cuyacoj canganta (Romanos 1:20).
¿Imataj nipäcun runacuna? Dios may chaychopis mana captinga chaurasga payga manami lapan poderyojchu.
Biblia yachachicun: Espíritu santuga Diospa poderninmi. Chaymi payga musyaycan cay Pachacho imacuna pasashganta. Cielucho caycarpis payga yanapacuyta puedinmi y chayta rurananpäga cay Pachaman shamunantaraj manami necesitanchu (Salmo 139:7).
¿Imataj nipäcun runacuna? Salmo 139:8 musyachicun Dios lapan sitiucho caycashganta, chaycho nin: “Syëluman aywacuptëpis chaychömi gam caycanqui. Cay pacha rurinman yaycuptëpis chaychöpis gamga caycanquimi”.
Biblia yachachicun: Cay textuga manami ninanchu Dios lapan sitiucunacho caycashganta, cayta escribejga juc poesía cuenta Jehovapita parlaycan imano yanapämanchi imacunapa pasarpis.
a Bibliaga nin Diospa jutin Jehová canganta.