¿Imanotaj Biblia yanapamanman? Ishcay caj: Imataraj ruranquiman Bibliata cushishgala leinayquipaj

Will jutiyoj mozo nin: “Bibliata leiyga guelanaypänomi canman. Pero chaynoga canman mana musyaptiqui imano leinayquipaj”.

¿Munanquimanchuraj Bibliata leiy gustashunayquipaj yachacuyta? Caymi yanapäshunqui.

• Biblia wilacushgancunata ricaycajno sienticuy

• Maslata ashiy

• Waquin mozo-jipashcuna ima nipäcushgan

Biblia wilacushgancunata ricaycajno sienticuy

Caycunata ruray shumaj leinayquipaj:

1. Gustashushgayqui wilacuyta acray yachacunayquipaj. Capazchi canman juc wilacuy, Jesús rurashgancuna o jw.org paginacho caycaj wilacuycunapis.

2. Juc wilacuyta leiy. Japalayqui, familiayquiwan o amiguyquicunawanpis leiytaga puedinquimi. Chaurasga jucmi canman wilacoj y waquincunanami chay wilacuycho runacuna parlashganta leinman.

3. Caycunata ruray:

   • Leicashgayqui wilacuypita dibujucunata ruray imano pasashganmanno. Nircur escribiy dibujucunacho jucnin jucninchopis imataj pasaycan.

   • Mana jaguicoj runapa wilacuyninta leiptiquiga, ruraynincunata, imano cashganta y chasquishgan bendiciuncunawan tincuchiy.

   • Chay wilacuycho runacunawan parlaycashgayquino o ricaycashgayquino sienticuy, y “tapupay” chay wilacuycho caycaj runacunata y ricajcunatapis.

   • Leishgayquicho mayganpis mana alita rurashga captinga, yarpachacuy alita rurarga imano ushanman cargan. Pedro Jesusta niegashganman yarpachacuy (Marcos 14:66-72). ¿Imatataj Pedro ruranman cargan runacuna yapay yapay tapupaptin?

   • Leishgayquita shumaj tantiacurga, quiquiquipa wilacuyniquitapis escribiyta puedinquimi. Chayta ruranayquipäga leishgayquicho yachacushgayquita cuentaman churay (Romanos 15:4).

     

Maslata ashiy

Bibliapa wilacuynincunata shumaj tantiarga shumaj yachachicuycunatami tarinqui. Öra öraga juc ishcay palabracunalami shumaj tantiachimanchi.

Tantiarinapaj: Mateo 28:7 textuta tincuchiy Marcos 16:7 textuwan.

• ¿Imanirtaj Marcos escribirgan Jesús discipuluncunata “y Pedruta” yuripänanpaj cajta?

• Yanapacuy: Marcusga manami chay hora caycarganchu, sinoga quiquin Pedrumi wilapargan.

• Shumaj yachachicuy: ¿Imanirtaj Pedruta alapa cushichirgan Jesús paywan tincuyta munashganta musyaptin? (Marcos 14:66-72). ¿Imanotaj Jesús Pedruta musyachirgan rasunpa amigun cashganta? Ali amigo cayta munarga, ¿imanirtaj Jesús rurashganno ruranquiman?

Bibliapa wilacuynincunata ricaycajno sienticuptiqui y lapanta tantiayta procuraptiquiga, ¡masmi gustashunqui Bibliata leinayquipaj!