¿Dios canchuraj?

¿Ima nintaj Biblia?

Bibliaga musyachimanchi juc Dios canganta. Jina yachachimanchi Diosman creinanchipäga, paypita ali yachacunanchirämi y lapan religiosucuna nishganta manami jucla creishwanchu (1 Juan 5:20; Romanos 12:1). Caypita Biblia ima yachachicunganta ricärishun.

• Cay Pachalacho imaycacuna camacächishgami caycan y caylachomi cawayta puedinchi, chayga musyachimanchi juc Camacoj canganta. Bibliaga nin: “Ima wasipis runa rurangalanmi caycan. Ichanga lapan imaycapis caycagcunata Tayta Diosmi rurasha” (Hebreos 3:4; Ambo-Pasco). Cay igualachicuyga facilmi tantiananchipaj y yachaj runacunapis chayta nipäcun.a

• Yarpayta galaycushganchipita musyayta munaycanchi imanir y imapätaj cawanchi, chayta mana musyarga “imapäraj cawanchi” nishwan. Bibliaga nin cushishga cawacunapaj Tayta Diosta necesitashganchita, Payta reguinapaj y paylata aduranapäpis nin (Mateo 5:3; Apocalipsis 4:11). Cayga musyachimanchi Dios camamajninchi canganta. Payga munan paypita yachacunapaj, chaynopa cushishgala cawacunapaj (Mateo 4:4).

• Bibliacho profeciacuna achca watacuna escribishga pasaptinpis, wilacushgannola cumplicashga. Chayno cumplicashganta musyachicun runacuna chayta wilacuyta mana puedinganta (2 Pedro 1:21).

• 

  Bibliata escribejcunaga canan wichan yachaj runacunapitapis masraj musyapäcurgan. Tantiarinapaj, unay runacuna creipäcoj cay Pacha jatun animalpa wajtancho caycanganta. Biblia ichanga cayno wilacun: Tayta Dios “imapis mana cashanmanmi cay pachatapis warcusha” (Job 26:7, TDI). Biblia Pachapita parlaptinga nin juc “pelota” japuyno caycanganta (Isaías 40:22). Biblia wilacushganta musyarga, cuentata gocunchi quiquin Dios runacunata yanapashga Palabranta escribipäcunanpaj.

• Diosman mana criejcuna cayno tapucärin: Dios ali y lapanta Puedej captinga, ¿imanirtaj achca nacaycuna y mana ali ruraycunapis can? ¿Imanirtaj religiuncuna ali cajta rurananpaj trucan, mana alicunata rurashga? (Tito 1:16). Cay tapucuycunata Biblia contestamun y yanapacun runacunata Dios nishganman creipäcunanpaj.