¿Yanapämanchiku Bibliapa tantiachikuyninkuna?

1. ¿Imanirtaj pushamänata necesitanchi?

Kamakoj Taytanchi Jehovaga lapanchipitapis masmi yachan. Jina kuyamarninchi y noganchipaj yarpachakurmi kamamashkanchi Pay pushamänapaj (Jeremías 10:23). Imanömi pishi wamrakuna taytan yachachinanta necesitayan, chaynölami runakunapis Dios diriginanta necesitayan (Isaías 48:17, 18). Bibliapa tantiachikuyninkunaga Diosninchipa jatun regalunmi. Lei 2 Timoteo 3:16.

Jehovapa leyninkuna y tantiachikuyninkunaga yachachimanchi kushishga kawanapaj y bendiciunkunata imano chaskinapajmi. Kamamashkanchi kaptinmi ganas ganasla wiyakunanchi. Lei Salmo 19:7, 11 y Apocalipsis 4:11.

2. ¿Imataj Bibliapa tantiachikuyninga?

Bibliapa tantiachikuyninkunaga alapa importantimi imata ruranapaj decidinganchichu. Pero leykuna kajga juk mandamientunömi nimanchi imata ruranapaj kajta (Deuteronomio 22:8). Bibliapa tantiachikuynin nishganno imatapis ruranapajga alirajmi yarpachakunanchi (Proverbios 2:10-12). Kayman pensarishun: kawayga Diosninchipa regalunmi. Kayta musyaymi yanapämanchi trabajunchicho, wasinchicho, y viajanganchi hora cuidakunanchipaj. Lei Hechos 17:28.

3. ¿Maygan ishkay tantiachikuytaj más importante kayan?

Jesusmi yachachikurgan kay ishkampita: juknin kajga yachachikun Diosninchita reguinapaj, lapan shongunchiwan kuyanapaj y sirvinapaj kawanganchitami. Kaytami yarpänanchi imata ruranapaj decidinganchicho (Proverbios 3:6). Kay tantiachikuyta wiyakojkunaga Diospa amigunmi kayanga y rasumpa kushikuyta y imaykamayajpis kawaytami tariyanga. Lei Mateo 22:36-38.

Ishkay kajnami yanapämanchi runa masinchiwan ali goyänapaj (1 Corintios 13:4-7). Kawayninchicho chayta rurarmi, Diosninchi runakunata tratanganno, noganchipis tratashun. Lei Mateo 7:12 y 22:39, 40.

4. ¿Imanötaj tantiachikuykuna yanapämanchi?

Kuyanakur familiacho kushishga kawanapajmi yanapakun (Colosenses 3:12-14). Jina chay tantiachikuyga yanapakunmi casadukuna mana rakikaypa imaykamapis kawakuyänampaj. Lei Génesis 2:24.

Bibliapa tantiachikuyninkunaga yanapämanchi guellay y wakin cosaskunacho y yarpachakuyninchikunachömi. Trabajukunachöga ashiyan honrado y cumplido arukojkunatami (Proverbios 10:4, 26; Hebreos 13:18). Jina Diosninchipa Palabranga yachachimanchimi necesitanganchilawan kushishga kawanapaj y Dioswan amigo kayninchi imapitapis más importante kanampaj. Lei Mateo 6:24, 25, 33 y 1 Timoteo 6:8-10

Jinamampis, Bibliapa tantiachikuyninga yanapämanchimi borracho mana kanapaj, chaynöpa kawayninchita peligruman mana churanapaj y sano kawakunapaj (Proverbios 14:30; 22:24, 25; 23:20). Chaynö kaptimpis, Jehovaga permitimanchimi ichik ichiklata upunanchitaga (Salmo 104:15; 1 Corintios 6:10). Tantiachikuykunaga alapami yanapämanchi portakuyninchita y yarpayninchita cuidanapaj (Salmo 119:97-100). Pero cristianukunaga manami kikinchilaman yarparlachu chayta ruranchi, sinoga Taytanchi Jehovata respetar y kushichiyta munarmi. Lei Mateo 5:14-16.