7 CAJ YACHACUY

Rasun cajlapita yachachicushwan

Lucas 1:3

ICHIC YACHACUY: Yäracuypaj yachachicuycunata ashishwan wiyaycajcunata yanapänapaj rasun cajta tantiananpaj.

Yäracuypaj wilacuycunata ashiy. Nishgayquega Diospa Palabranpitami canman y imaypis Bibliapita yachachicunayqui. Estudiaj runacuna nishganpita, noticiacunapita o ima wilacuypitapis parlayta munarga, seguro canayqui chaylaraj yargamushganpita y rasunpa cashgantapis.
Bibliata y publicaciuncunatapis ali yachacuy. Juc textupita tantiachicurga, shumaj ricanquiman guepan cajcho y naupan cajcho imapita parlaycämun, jina tantiaj y yäracuypaj esclavo publicaciuncunacho imata yachachicushgantapis (Mat. 24:45). Juc librucunapita parlanayquipäga, musyapacaramuyraj imata nishganta y imanir chayno escribishga cashgantapis.

Rasun cajta yachachicuyta munarga, imatapis yaparir yaparir wilacuychu, ima numerucuna captenga ama yapapaychu. Öraga capaz ima wilacuypis ninman “waquincuna”, pero chayga manami ninanchu “lapancuna”. Y “öraga” niptin, manami ninanchu “imaypis”.
Yanapay tantiacärinanpaj. Juc textupita leir o juc librucunapita parlar, tapucuycunata ruray quiquin wiyaycajcuna ali tantiacärinanpaj.