Internetpa conectacunchi reuniunninchicunata ruranapaj

Achca naciuncunacho autoridäcuna nipäcushga waquincunawan mana juntacänapaj, ni reuniuncunatapis ruranapaj achca runacuna caycashgancho. Chaymi Jehovapa testiguncunaga autoridäcunata casucurmi reuniunninchicunata jucnopana rurar galaycushcanchi. Cananga hermanunchicuna Zoom nishganwan internetpa conectacärin reuniuncunata rurananpaj.

Y reuniunninchicuna imaypis cananpaj, Jehovapa testiguncunata Pushajcuna aprobargan apachicushgan guellaypita congregaciuncuna Zoom utilizashganta pagananpaj. ¿Imanirtaj chayta rurapäcun? Waquin congregaciuncuna Zoom utilizashganta 53 o 71 soles o maspis pagananpaj manami puedinchu. Chaurashga chay congregaciuncuna gratisla caycaj aplicaciuncunata utilizayta galaycurgan, pero manami seguro carganchu y walca runacunalami conectacärej. Pero organizaciunninchi pagarcuptin congregaciuncuna Zoom uitilizashganta alapa alimi, quiquincuna contrulayta puedipäcun y achca runacuna conectacuyta puedipäcun. Cananga 170 naciuncunacho 65.000 congregaciuncuna Zoom nishgan aplicaciunwanmi reuniuncunata rurapäcuycan.

Kairagi congregaciunga caycan Manado ciudächo, Indonesia naciunchomi, chay congregaciunga gratisla caycaj aplicaciuntami utilizaycargan reuniuncunata rurananpaj, nircur organizaciunninchi pagashgan Zoomta utilizar galaycurgan. Hadi Santoso hermanunchi wilacun: “Hermanunchicuna tecnología nishganta shumaj utilizayta mana yacharpis, paycuna reuniuncunaman conectacärin, cananga manami sasachu conectacunanpaj”.

Ecuador naciuncho, Guayacanes Oeste congregaciunpita Léster Jijón anciano cayno nin: “Alapa sasami cargan hermanunchicuna Zoom utilizashganta pagananpaj, waquincunaga charashgancunalawan cawapäcun. Pero organizaciunninchi pagashgan Zoomta utilizarga alapami yanapacun, cananga achca runacunata invitaycanchi conectacunanpaj reuniunta wiyapäcunanpaj”.

Johnson Mwanza hermanunchiga caycan Norte Ngwerere congregaciuncho, Zambia naciunchomi, payga nin: “Achca cutimi hermanunchicuna cayno nipäcurgan: ‘Organizaciunninchi pagashgan Zoomta utilizarga, yanapamanchi hermanunchicunawan ricanacunanchipaj y cuentata gocunchi Jehová noganchicunaman yarpachacunganta y cuyamanchimi’”.

Congregaciuncuna Zoom utilizashganta organizaciunninchi pagananpäga, hermanunchicunata yanapänapaj apachicushgan guellayta utilizargan. Entero munducho maychicaj hermanunchicuna donaciunnincunata apachicamun Diospa Gobiernunpita ali wilacuynincuna may chayman chayananpaj. Waquincunaga donate.jw.org paginacho donaciunnincunata apachicamun. Alapami agradecicunchi ali shongulayquiwan donaciunniquicunata rurapäcuptiqui, cayga yanapacun entero munducho hermanunchicunata yanapänapaj (2 Corintios 8:14).