Ichisaj cajitacho caycan imayca yachachicuycuna

Jehovapa testiguncunaga canan wichan imayca yachachicuycunatami rurapäcuycan internetpita jorganapaj. Pero achca marcacunacho hermanucunapäga sasami internet-ta pagananpaj, öraga señalpis ilgacäcun y juc marcacunachoga internet mana canchu.

Chayno captinpis maychicaj hermanucuna videucunata y waquin publicaciuncunatapis jorgapäcuycan. Ricärishun imano chayta ruran.

Internet-ta mana charaj congregaciuncunaman juc ichisaj cajita nirajtami apachicamun, jutinga JW Box nishgan. Departamento de Computación nishgancho arojcuna juc empresapitami rantirgan chay cajitacunata, y jucnin jucninpa chaninga 250 solesno. Nircur chaychomi grabarcun jw.org paginapita videucunata y waquin publicaciuncunatapis.

Chaywannami Diosta aduranapaj wasicho, hermanucuna celularnincho JW Box nishganpita videucunata y publicaciuncunatapis jorgapäcun; celularnincuna mushoj mana captinpis jorgapäcunmi. Pero, ¿imatataj ruran mushoj publicaciuncunata jorgapäcunanpaj? Sucursalpita cada cadalami apachicamun memoria USB nishganta congregaciuncunaman, caycunapa chaninga 13 solesno. Y chaychomi grabashga caycan chaylaraj yargamushga videucuna y publicaciuncunapis JW Box cajman churananpaj.

¿Imatataj hermanucuna nipäcun cay shumaj yanapacuypita? Nathan Adruandra, República Democrática del Congo naciunpitami wilacun: “Achca cuticunacho munargä ‘Oh, Jehová, en ti confío’ y Acuérdense de la esposa de Lot videucunata jorgamuyta, pero manami camäpacurgächu; chayga laquichimarganmi. Canan ichanga celurlarnïcho videucunata jorgamünami, y cayga yanapaman wamräcunata shumaj yachachinäpaj”.

Nigeria naciunpita juc hermano cayta wilacun: “Hermanucunaga Jehovatami ‘gracias’ nipäcun JW Box yanapacuypita. Paycunaga cushicärin yachachicunapaj videucunata y publicaciuncunatapis jorgapäcuptin”.

Canancama mayna apachicamushgana 1.700 JW Box nishganta África, Oceanía y Sudamérica congregaciuncunaman, y más congregaciuncunamanpis apachicamunanpaj caycan. Cay lapanta ruracämun donate.jw.org paginacho apachicushgan guellaywan y ali shongu runacunapa donaciunnincunawanmi. Päquila yanapacuyniquipita.