26 CAJ YACHACUY
¿Imanirtaj nacaycarla wagaycarla cawanchi?
Imayca desgraciacuna captenga, runacuna laquicushpan nipäcun ‘pitaj culpayoj nacanäpaj’ nir. Bibliacho yachacushganchega cushichimäshunmi.
1. ¿Imapitataj Satanás juchayoj caycan?
Diospa contrancho ticraycurmi Diabluga Adanwan Evatapis engañash; paycunapis Diospa contrancho ticrananpäga Evata lulapar galaycurgan (Génesis 3:1-5). Lulapashganchoga nerganchi ‘Diosga ali cawacunayquita munanchu, cushishgalaga cawacunqui munashgalayquita rurarmi’. ‘Imapätaj Diostaga cäsunqui’ nirpis nerganrächi. Jina Satanasga pasaypa lulacur Evata nergan ‘manami wanunquichu’. Chaymi paypaj parlar Biblia nin: “Payga llullacunapa taytallanmi” (Juan 8:44).
2. ¿Imatataj rurapäcurgan Adanwan Eva?
Adanwan Evataga imaycata Jehová gorgan, micupäcunanpäpis achca yoracunapa wayuynin cargan, ichanga juc yoralapita nergan mana yatapänanpaj (Génesis 2:15-17). Pero mana cäsucärishpan micupäcurgan: Evaga “palarcur micurgan. Nircurnami runanman apapaptin paypis micurgan” (Génesis 3:6). Adanwan Evapäga manami sasachu cargan Diosta cäsucärinanpaj, juchaynajmi capäcurgan. Musyaycarnami paycunaga Camacojninpa contrancho ticrapäcurgan. Rurapäcushganraycurga nacaycarlanami cawapäcush (Génesis 3:16-19).
3. ¿Imamantaj chayachimashcanchi Adanwan Eva rurashganga?
Mana cäsucärishganpitami Adanwan Evaga juchayoj runamanna ticrapäcurgan. ¿Y miraynincunaga? Biblia cayno wilacun: “Cay pachachöga Adanmi jucha rurayta gallaycuran. Chaypitami wañuypis shamuran. Chaymi llapan runapis Adanllapita mirasha cashpan juchata rurar wañun” (Romanos 5:12).
Chauraga ¿imanirtaj nacanchi? Öraga quiquinchi pantarcuptinchi. O waquincuna mana alicunata rurashganraycur. O ilajpita imacunapis pasamaptinchi (leiriy Eclesiastés 9:12).
SHUMAJ YACHACURCUNAPAJ
Yachacushun imanirtaj mana nishwanchu ima ‘desgraciacunapis Diospa castigun’ cashganta jina imanotaj Dios ricacun nacaycunapa pasaptinchi.
4. ¿Pipa juchanraycurtaj ima nacaycunapis caycan?
Achca runacuna nipäcun cay munducho imacunatapis Dios ruraycan. ¿Chayga rasunpachuraj? VIDEUTA ricapäcuy.
Leipäcuy Job 34:12 y 1 Juan 5:19 y caypita parlapacäriy:
¿Diospa culpanraycurchuraj ima nacaycunapis caycan?
5. ¿Imanotaj cawaycanchi Diablupa culpanraycur?
Leipäcuy Génesis 3:1-6 y caycunapita parlapacäriy:
¿Imata nir Diablo lulacush? (4 y 5 versiculucunata ricäriy).
Diablo lulacushganwanga, ¿Diospita ima yarpänanchitataj munaycargan?
Satanás niycashganwanga, ¿munaycarganchuraj Dios gobernamänanchita?
Leipäcuy Eclesiastés 8:9 y caycunapita parlapacäriy:
¿Imanotaj cay mundo caycan Diosninchi manaraj gobernaycämuptin?
Adanwan Evata shumaj huertacho cawananpaj Dios churashga captinpis Diablo munashgantami rurapäcurgan.
Juchalacärishganraycurga mana ali cawaylami galaycamush.
Jehová Diosninchilami lapan nacachimashganchicunata, chipyaypa ushacächenga. Chaypitana sirvejnincunata Paraisucho ali cawachenga.
6. Jehovapis laquicunmi nacaptinchega
Noganchipaj Dios yarpachacushganta musyanapaj, ricärishun David y Pedro ima guelgapäcushganta. Leipäcuy Salmo 31:7 y 1 Pedro 5:7 y caypita parlapacäriy:
Ima laquesacunapapis pasaycashgayquita Jehová altantula caycaptenga, ¿imanotaj ricacunqui?
7. Dioslami lapan nacaycunatapis ushacächenga
Leipäcuy Isaías 65:17 y Apocalipsis 21:3, 4 y caypita parlapacäriy:
Nacachimashganchicunata, wagachimashganchicunata, lapantami Jehová ilgächenga. Ali caway galaycunanpäna caycan. ¡Lindumi chayga! ¿ninquichu? ¿Imanir?
¿Mayashcanquichu?
Satanasga lulacushganwanmi niycargan ‘Diosga runacuna ali cawananta munanchu’ nir, chaywanga Jehovapa jutinta y imano gobernamänanchitapis mana cajman churargan. Ichiclachona Dios nacaycunata ushacächenga chaychomi ricacämunga Jehovapa Gobiernulan ali cashganta. Imaycacunapitapis más importantega caycan Diospa jutin respetashga cananpaj (Mateo 6:9, 10).
WAQUINCUNA NIPÄCUN: “Dios nacaycarla cawacunätachi munash, imanäshajta”.
¿Gam ima ninquitaj?
ICHIC YACHACUY
Satanás, Adanwan Evami juchayoj, cay munducho pasaypa nacaycuna cananpaj. Nacashganchita ricarga Jehovapa shongunpis nananrämi chaymi ichiclachona chaycunata ushacächenga.
Yarpänapaj
Diospitaga ¿imatataj Diablo nergan Evata?
Adanwan Eva mana cäsucushgan, ¿imamantaj chayachimashcanchi?
Nacashganchita ricarga, ¿Jehová laquipämanchichuraj?
MASLATA YACHACUNAYQUIPAJ
Yachacuy ima nintaj Biblia pecadupita.
Maslata yachacuy imataj Satanás nergan Diospa Gobiernunpita.
“¿Imanirtaj nacayta Dios ushacächinrächu?” (Wilacamoj, 1 enero quilla, 2014)
Yachacuy runacuna nacaycunapita ima yarpashganpita y Biblia ima nishgantapis.
“Judiucuna imano wanushganta, ¿Diosga ricaraylachu ricarargan?” (jw.org paginapita yachachicuy)
Ricäriy imataj juc runa yachacurgan nacaycunapa pasarpis.