¿Imanirtaj cay mundupa ruraynincunaman jaticanchichu?

Jesusga nergan noganchi gatejnincunaga ‘cay munduwan mana talucänapaj’ (Juan 15:19, TNM). Chaymi politicucuna rurashganta ruranchichu ni guerracunamanpis aywanchichu. Chayraycur waquincunaga asirpis asicunmanchi noganchicunapita. Pero burlacäriptinpis, ¿imata rurartaj cay munduwan talucashwanchu, chaynopa Diosninchipita imaypis mana raquicänapaj?

1. ¿Respetanapächuraj caycan lapan gobiernucuna?

Aumi. Jesús cayno nergan: “Césarpa cajtaga Césarta goycuy”. Autoridäcunata respetashpanchimi leycunatapis cäsucunchi, y impuestucunata paganapaj captenga paganchimi (Marcos 12:17). Bibliaga nin Tayta Jehová permitiptinmi cay Pachacho gobiernucuna caycan (Romanos 13:1). Mandacärishganga juc tiempulapämi canga. Ali caway cay Pachacho cananpäga Diospa Gobiernunpa maquinchomi caycan.

2. ¿Imata rurartaj cay munduwan talucanchichu?

Jesusnolami politicucuna rurashganta ruranchichu. Juc cutichomi milagruta rurashganraycur runacuna reyninman ticrachiyta munapäcurgan, pero Jesusga jucla witicurgan (Juan 6:15). ¿Imanirtaj munarganchu? Quiquinmi juc cuticho cayno nergan: “Nogaga manami cay pachachöchu mandaj cä” (Juan 18:36). Jesuspa discipuluncuna carmi cay mundo ima ayca rurashganta ruranchichu. Guerraman aywanapäga yarpaylapis yarpanchichu (leiriy Miqueas 4:3). Ima naciuncunapis banderancunata ichichipäcuptenga respetanchimi, ichanga waquincuna rurashganno cantapanchichu o umpurcunchichu naupancho (1 Juan 5:21). Y manami parlaylapis parlanchichu ‘cay caj politicumi más ali, cay cajga mana’ nir. Aumi, cay mundupa ruraynincunata ruranapaj trucanga, Diosninchi camacächishgan Gobiernulamanmi yäracunchi.

SHUMAJ YACHACURCUNAPAJ

3. Cay munduwan talucashwanchu

Alitami yachacunchi Jesuspitawan discipuluncunapita. Leipäcuy Romanos 13:1, 5-7 y 1 Pedro 2:13, 14. Nircur VIDEUTA ricapäcuy y caycunapita parlapacäriy:

VIDEO: Mundupa ruraynincunawan imanir mana talucänapaj (juc caj) (4:28)

• ¿Imanirtaj autoridäcunataga respetananchi?

• ¿Imacunata rurartaj paycunata cäsucunchi?

Ishcay naciuncuna guerracho captenga, waquin naciuncuna öraga nipäcun ‘nogacunaga meticärishächu’ nir, ichanga mayganpa favorninchopis mayna sharcupäcun. ¿Imata ninchi chaypita? Leipäcuy Juan 17:16. Nircur VIDEUTA ricapäcuy y caypita parlapacäriy:

VIDEO: Mundupa ruraynincunawan imanir mana talucänapaj (ishcay caj) (3:11)

• ¿Ima niycanchitaj cay munduwan mana talucänapaj nerga?

Öraga maygan autoridäcunapis nimashwan Diospa mandatunpa contrancho imatapis ruranapaj. ¿Imataraj rurashwan chayno nimaptinchi? Leipäcuy Hechos 5:28, 29. Nircur VIDEUTA ricapäcuy y caycunapita parlapacäriy:

VIDEO: Mundupa ruraynincunawan imanir mana talucänapaj (quimsa caj) (1:18)

• Cay munducho ima leycunapis Diospa leyninpa contrancho caycaptenga, ¿maygantaraj cäsucushwan?

• ¿Autoridäcuna imata ruranapaj mandamashganchitataj mana cäsucushwanchu?

4. Yarpayninchilawanpis talucashwanchu

Leipäcuy 1 Juan 5:21. Nircur VIDEUTA ricapäcuy y caycunapita parlapacäriy:

VIDEO: Imanirtaj mana manchacoj cristianucuna cashwan: Cay mundupa cajcunaman mana jaticänapaj (2:49)

• ¿Imanirtaj Ayenge jutiyoj hermanulanchi politicucunawan talucajchu y banderata saludananpaj waquincuna niptinpis mana munajchu?

• ¿Alitachuraj pay rurargan?

¿Noganchitapis imataraj waquincuna nimashwan cay mundupa ruraynincunaman jaticänapaj? VIDEUTA ricapäcuy y caycunapita parlapacäriy:

VIDEO: “La Atalaya” revistapita yachachicuycuna: Cay mundupa ruraynincunaman jaticäshunchu (5:16)

• Naciuncuna yalinacuypaj puclacunata rurapäcuptin, ¿imataraj rurashwan?

• ¿Nishwanchuraj ‘chay gobiernumi ali cawachiycämanchi’ o ‘chay runaga gobernamuyta yachanchu’ nir?

• Politicalapita parlaj noticiacunata waran waran ricarga, ¿imataraj umanchiman yaycachiycashwan?

ICHIC YACHACUY

Cristianucunaga ni yarpayninchiwan ni parlayninchiwanpis meticunchichu política ruraycunaman.

Yarpänapaj

• ¿Imacunachotaj cäsucunchi cay munducho gobiernucunata?

• ¿Imanirtaj política ruraycunamanga meticunchichu?

• ¿Imacuna captinraj sasano canman cay mundupa ruraynincunapita witicunapaj?

MASLATA YACHACUNAYQUIPAJ

Öraga imaycataraj ruranchi cay munduwan mana talucänapaj.

Jehovaga manami jaguimäshunchu (3:14)

¿Imacunataraj puntalapitana familiacuna ruranman cay munduwan mana talucänanpaj?

May chaycho caycarpis Jehovalata adurashun (4:25)

Achca runacunami naciunnincunaraycur wanuytapis munapäcunraj, ¿alichuraj chayga?

“Diospäga manami sasachu” (5:19)

Trabajunchicho caycarga, ¿imataraj rurashwan mundupa ruraynincunata mana ruraycänapaj?

“Maquinchichomi caycanga imata ruranapäpis” (Wilacamoj, 15 marzo quilla, 2006)