Imata rurartaj Jehovapa naupancho yapay ali caycanquiman

WATA watami congregaciunpita gargushga cajcuna cutipäcamuycan. Pantacashga uyshano caycarpis cuticäramunmi, chayga cushicuypämi, “jana patsachöpis” cushicärinshi (Luc. 15:7, 10). Gampis chaylaraj congregaciunman cuticamushga carga Jesuspis, angelcunapis y Taytalanchi Jehovapis mayraj cushicun. Jehovata sirvinayquipaj yapay galaycushgayquichoga ichanga imalapis michaycäshunquiman. ¿Imaraj chaycuna canman, y imaraj yanapäshunquiman?

IMARAJ MICHAYCÄSHUNQUIMAN

Waquin congregaciunman cuticamojcunaga unay rurashganpita mana alinomi ricacun. Chaypa pasaycaptiquega Davidpis unaycho ima wilacushganta ricaycuy. Juchalacushganpita perdunashgana carpis cayno nergan: “Quiquë mana allita rurashäcunallami chayamasha” (Sal. 40:12; 65:3). Jina chaylaraj cuticamojcunaga achca watacunapami pengacushpan mana alino ricacun. Isabellea paninchega 20 watacunano congregaciunpita gargushga cargan, “rurashgäcunapita Jehová perdunamashganachuraj” nirshi paninchega yarpachacoj. Gampis chaynola yarpachacuycarga Jehovata yapay sirvinayquipäga sasami ticracurinman (Prov. 24:10). Calpachacuy guepaman mana cutinayquipaj.

Waquincunapis yarpachacärin ‘Jehovata sirvinäpaj caytaraj wactaraj ruranäpaj caycan’ nir. Congregaciunman yapay cuticamushganchomi Antonio wauguilanchi cayno nergan: “Gongaycurgämi cristianuno imano cawacunäpa cajta”. Chaymi waquincunaga lapan shongunwan Diosta sirvinanpaj ichiclapa ichiclapa galaycun.

Mä cayta tantiarcushun. Viento alapa pucamushganraycur wasicuna juchucäcuptenga, dueñuncunaga lapanta ricaycur yarpachacunchi ‘imayraj wasiläta alchashaj, japaläga ¿puedishächuraj?’ nir. Chay japuyla alapa juchacunata rurarishga carga ichanga tiempuraj pasanga y calpachacunapäraj canga Jehovata sirvir yapay galaycunapaj. Pero japalayquega manami ricacunquimanchu.

Jehovami cayno nishunqui: “Jutsata rurashqaykita perdonanäpaq kanan parlashun” (Is. 1:18). Gamga cuticamunayquipaj calpachacushcanquina, y Jehovaga cuyaparmi chasquishunqui. Yarpachacuy: ali rurashgayquiraycur Diablupa contrancho caycarga Taytalanchi Jehovaga cushicungami (Prov. 27:11).

Congregaciunman yapay cuticamuptiquega Jehovamanmi guelicuycanqui, paypis chaytami ruranga (Sant. 4:8). Waquin hermanucunaga cushicungami gamwan tincur, ichanga ¿ima masraj caycan ruranayquipaj? Taytalanchi Jehovata cuyashgayquitami waran waran winachinquiman. ¿Imanotaj chayta ruranquiman?

IMATA RURANAYQUIPA CAJMAN YARPACHACUY

Calpachacuy Jehovata sirvir imata ruranayquipaj. Jehovapita y aunicushganpita yachacushgayquega manachi shonguyquipitaga ilacäcushgachu, wasipa cimientunnochi caycan. Ichanga calpachacunayquipäga caycan predicaciuncho, reuniuncunacho y hermanucunawan caycänayquipaj, chay lapanta rurarga wasita sharcachiycashgayquinomi canga. Ricärishun imata ruranayquipaj.

Mana gongaypa Jehovata mañacuy. Taytalanchi Jehovaga musyanmi unay juchacunata rurashgayquiraycur nacaycashgayquitaraj (Rom. 8:26). Cutin cutin ruwacushpayqui wilapay Paylatana sirviyta munashgayquita (Rom. 12:12). Andrei cayno nin: “Juchata rurashgätaga jucla gongarirgächu, pengacushganomi ricacurgä. Pero Diosta ruwacushpäga jaucalana ricacurgä”. Mañacurerga ‘imataraj Diosta nïman’ niptiquega David arrepenticur imano mañacushganman yarpachacuy, chayga caycan Salmos 51 y 65 cajcho.

Bibliapitapis mana gongaypa yachacuy. Chayta rurarga Jehovaman yaracur masraj cuyanayquipämi yanapäshunqui (Sal. 19:7-11). Felipe waugui cayno nin: “Juchamanga ishquishcä Bibliatapis publicaciuncunatapis estudianäpaj mana calpachacushgäraycurmi, chauraga congregaciunman cutiycamurga jucla calpachacurgä Bibliata shumaj estudianäpaj”. Gampis chayta ruraptiquega alimi canga. Yachacunayquipaj maygan temalatapis acranayquipaj sasa captenga, alichi canman maygan pogushga hermanulatapis wilapaptiqui.

Congregaciuncho amigucunata ashir galaycuy. Congregaciunman cuticamushga carga ichanga pipis ninman ‘imanoraj waquincuna ricaycäman, imataraj niycäman’ nir. Larissa paninchi cayno nin: “Alapa pengacushganomi caycargä. Congregaciuntapis mana alicho quedachishgäta yarpargä. Tiempo pasaptinpis chaynola yarpachacur caycargä”. Ama gongaychu, ancianucunapis y waquin hermanucunapis listumi carcaycan yanapäshunayquipaj Jehovata sirvir galaycunayquipaj (“Ancianucuna imata rurapäcunanpaj” nej recuadruta ricäriy). Cushicärinmi cuticamushgayquipita, y cushishga canayquitami munapäcun (Prov. 17:17).

¿Imatataj ruranquiman congregaciunlacho imaypis caycänayquipaj? Reuniuncunacho caycanquiman y hermanucunawan predicanayquipaj tiempuyquita camacächinquiman. ¿Imaraj yanapäshunqui caycunacho mana gongaypa caycänayquipaj? Félix cayno nergan: “Congregaciuncho hermanucunaga shuyarpaycämashganami. Alimi ricacurgä. Lapancunami yanapäcamargan congregaciuncho hermanucunawan cushi cushila caycänapaj, Jehovapis perdunamashganta, y payta sirvir caycänapäpis nipäcamargan” (“Imata ruranayquipaj cajcuna” nej recuadruta ricäriy).

AMA GUEPAMAN CUTIYCHU

Alimi canga Jehovalatana sirvinayquipaj calpachacuptiquega, pero Satanasga alapa pucamoj vientunomi yapay ishquinayquita munanga (Luc. 4:13). Mana ishquinayquipäga espiritual cajcho ali cimientush wasino caycanquiman.

Uyshancunapaj parlarmi Jehová cayno aunicurgan: “Ogracaj uyshäcunatami ashishaj. Pantacasha caycajcunatami shuntamushaj. Waquinpa chaquincuna paquisha caycajtaga watapäshaj” (Ezeq. 34:16). Jehovaga alapami yanapashga gargushga cajcuna cuticamur payta sirvir yapay galaycunanpaj. Caytapis ama gongaychu, Taytalanchi Jehovaga waran waranmi yanapaycäshunqui paypa naupalancho ali caycänayquipaj.