Liejcuna tapucärishgan

Levítico 19:16 textucho “runa-masiquita wañuchinanpaj ama jitapanquichu” nishganga, ¿imapätaj parlaycämun y imatataj yachacunchi?

Jehovami israelitacunata nergan santo runacuna capäcunanpaj. Chaymi cayno nir mandacurgan: “Marcayquicho ama purinquichu runapa washanta rimar. Runa-masiquita wañuchinanpaj ama jitapanquichu. Noga TAYTA DIOSNIQUIMI chayno në” (Lev. 19:2, 16).

Contrancho “ama jitapanquichu” nej palabracuna unay hebreo original nishgannolami caycan. Pero, ¿imapätaj parlaycan? Levítico librupa parlar jidiucunacho juc wilacuy cayno nin: “Chay versiculuta tantiarcunapäga sasanomi ticracurin unay hebreo rimaywan camacächinapaj, unay escribicämushganga cargan ‘pipa laduncunachopis ichishgala mana canapaj’”.

Waquin yachaj runacunaga nipäcun chay palabracunaga, guepa caj versiculuwan tincushganta, chaycho nin: “Autoridä car derëchu canqui. Pobritapis juchanpitaga ama chapanquichu. Ni rïcucunatapis juchanpitaga ama chapanquichu. Autoridä carga alli arriglanqui” (Lev. 19:15). Chay runacuna nishganno captenga, contrancho ama jitapanquichu nej palabracunaga parlaycanmanchi israelitacuna imatapis derecho rurananpaj, negociucunacho o imacunachopis. Jina parlaycanman imatapis pacapaylapa mana rurapäcunanpaj. Aumi, caycunaga alimi caycan yarpachacunapaj, pero 16 caj versiculucho yurimoj palabracunataga jucnopapis tantiarcushwanmi.

Chay versículo galanan cajcho ima nishganta ricärishun. Chaychoga Dios wilacun israelitacuna pipa washantapis parlar mana puripäcunanpaj. Ichanga washarima carga más problemacuna apamunman pipis cuentistero cashganpitaga (Prov. 10:19; Ecl. 10:12-14; 1 Tim. 5:11-15; Sant. 3:6). Pipa contranman jitapayga apriposo runa masinta mana cajman churananpämi caycanman. Juc runapa contranman pipis jitapäga lulacuycanmanmi, runa masinta wanuchinanpaj. Chaytami pasargan unay Nabot jutiyoj runawan. Juc runacunash Nabotpa contran jitapar, lulacur mana cajta wilacurgan, chaymi ali runa captinpis sagmaypa wanuchipäcurgan (1 Rey. 21:8-13). Chauraga Levítico 19:16 texto ishcay caj nishganno, pipis lulacur manacajta parläga runa masinpa contranman jitapaycanman.

Jina, pipis runa masinta chiquirmi tunpar lulacuycanman. 1 Juan 3:15 textuchopis niycan: “Pipis ermänucunata chiquej cäga wañuchicojmi. Gamcunaga musyanquimi wañuchicojcunaga mana ushacaj cawayta mana tarinanpaj cashanta”. Levítico 19:16 textucho caycaj mandamientupita, Diosga caytapis nirganmi: “Shongullayquicho pitapis ama chiquipanquichu” (Lev. 19:17).

Chauraga Levítico 19:16 textucho caycaj mandamientuga, cristianucunapaj ali yächicuymi caycan. Calpachacushwanmi mana alita mana yarpanapaj y imaypis pitapis mana tunpanapaj. Pipa contranmanpis jitaparga o lulacur mana cajta parlarga, chayga canga nanaparaycaptinchi y chiquiycaptinchimi. Juc cristianuga pitapis chiquinanpaj yarpaylapis mana yarpanmanchu (Mat. 12:36, 37).