¿“Shongupis cushicurinmi” consejuyquicunawanga?

1, 2. ¿Imatataj juc anciano yachacurgan juc panita consejaycushganpita?

ISHCAY ancianucunash juc panita watucamurgan reuniuncunaman manana aywaptin. Jucninshi reuniunpita parlaj achca textucunata leipargan chaynopa paninchita shacyächinanpaj. Chauraga, paycuna aywacäriycaptinnashi panilanchega nergan: “Gamcunaga musyapäcunquichu imacunapa pasaycashgäta”. Ancianucunaga panita tapuparganchu imano yanaparcunanpaj. Chaymi consejuncunaga yanaparganchu.

² Textucunata leishgan ancianuga cayno nin: “Galananlachoga yarpargä chay pani mana respetaycämashganta. Ichanga shumaj yarpachacurcur cuentata gocurgä achca textucunata leipänäpaj trucan, cayno tapupäman cargan: ‘¿imanolataj caycanqui?, ¿imalachopis yanaparcömanchuraj?’ nir”. Chay ancianuga chaypa pasashganpita yachacurgan imano consejacunanpaj, cananga waquincunata cuyacuywanmi yanapan.

3. ¿Pïcunataj congregaciuncho consejacunman?

³ Ancianucunaga congregaciuncunacho consejacunanpämi caycan. Ichanga waquin hermanucunapis cristiano masincunata consejaycunmanmi. Tantiarinapaj, öraga pilapis amigunta Bibliawan consejaycunmanmi (Sal. 141:5; Prov. 25:12). Jina pogushga panicunapis jipash panicunata consejaycunmanmi Tito 2:3-5 textucuna nishganno comportacärinanpaj. Y taytacunapis öraga wamrancunata piñapanman y correginmanmi. Cay yachachicuy ancianucunapaj captinpis lapanchitami yanapämäshun ali consejucunata goycunapaj y ali shimilapa waquincunata consejaycunapaj (Prov. 27:9).

4. ¿Ima tapucuycunatataj canan contestashun?

⁴ Cay yachachicuycho chuscu tapucuycunata contestarcushun: ¿imanirtaj consejaycushwan?, ¿rasunpachuraj consejaycunapaj caycan?, ¿piraj consejaycunman?, y ¿imanotaj consejaycushwan ali yanaparcunapaj?

¿IMANIRTAJ CONSEJAYCUSHWAN?

5. ¿Imanirtaj ninchi consejutaga chasquicungami cuyacuywan consejacushgaga? (1 Corintios 13:4, 7).

⁵ Ancianucunaga cristiano masincunata cuyanmi. Chaymi pipis mana alicunata ruraycaptenga cuyacuywanmi consejaycun (Gál. 6:1). Chauraga pitapis consejaycunanpäga Pablo cuyacuypita ima nishganman yarpachacunman, payga nergan: “Kuyakuq karqa ima kaptinpis pacienciakuntsimi y pïmaytapis alimi rikantsi. [...] Ima kaptinpis perdonantsimi. Imaypis criyintsimi, imaypis shuyarantsimi y lapantapis awantakuntsimi” (leiriy 1 Corintios 13:4, 7). Chauraga juc ancianuga pitapis cuyashpanmi consejaycun yanaparcunanpaj y pipis cuyashga ricacuptenga consejucunata chasquicungami (Rom. 12:10).

6. ¿Imanotaj Pabluga consejacurgan, y imataj chaypita yachacunchi?

⁶ Ancianucunaga Pablupita yachacunmanmi. Payga manami manchacurganchu Tesalónica hermanucunata consejaycunanpaj. Puntataga Jehovaman yäracur carcaycashganpita, cuyacoj y guepaman mana cutipäcamushganpitami felicitaycurgan. Jina yarpaycarganmi nacaycunapa pasaycashganta y gaticachashga caycashgantapis (1 Tes. 1:3; 2 Tes. 1:4). Paycuna rurashgancunaga waquincunata yanapashgantapis nergan (1 Tes. 1:8, 9). ¡Chaycunata wiyar Tesalonicapita hermanucunaga alapachi cushicärergan! Paycunaga musyapäcurgan Pablo paycunata cuyashgantami. Chaymi ishcay cartancunacho consejacushganta chasquicur cäsucärergan (1 Tes. 4:1, 3-5, 11; 2 Tes. 3:11, 12).

7. ¿Imanirtaj öraga waquincuna consejacushganchita chasquicunmanchu?

⁷ Pitapis piñashga consejaycurga juc ancianuta pasashgannomi pasanman. Payga nin: “Juc consejo ali captinpis cuyapaylapa mana parlapaptinchega, öraga sasami canman pilapis chasquimänanchipaj”. Chauraga ali chasquimänanchipäga calpachacushun cuyacuywan pitapis consejaycunapaj.

¿RASUNPACHURAJ CONSEJAYCUNAPAJ CAYCAN?

8. ¿Imatataj juc anciano tapucunman pitapis manaraj consejaycur?

⁸ Ancianucunaga pitapis jucla consejaycunmanchu. Pitapis consejaycunapäga caycunatarämi tapucunman: “¿Rasunpachu consejaycunäpaj caycan?, ¿shumajcu musyä imata rurashganta?, ¿Biblia nishgantaga mana cäsucuycan o noga munashgänochu mana ruraycan?” nir. Juc yachaj ancianuga cuidacunmi “lutala imatapis” mana rimananpaj (Prov. 29:20). Imata rurananpaj mana musyaptenga juc anciano masinta tapupanman rasunpachush consejaycunanpaj o manapis (2 Tim. 3:16, 17).

9. Visticuy asuntupita ancianucuna pitapis consejaycunanpaj, ¿imataj yachacärinman Pablupita? (1 Timoteo 2:9, 10).

⁹ Cayman yarparcushun: juc waugui imano visticushganpitash juc anciano consejacuyta munan. Pero puntataga cayno tapucunman: “¿Payga Biblia nishgantacu mana cäsucuycanchu?” nir. Jina juc ancianuwan o juc pogushga cristianuwanpis parlacurinmanmi Pablo imano visticunapaj nishganpita ricänanpaj, chaynopa Bibliawan ali consejaycunanpaj (leiriy 1 Timoteo 2:9, 10). Pabluga manami nerganchu caycunata jaticunayqui y caycunata mana. Payga Bibliapa tantiachicuycunapitami parlargan, Jehová munashganno ali juiciuwan visticunapaj. Pabluga musyarganmi quiquin cristianucunami Biblia nishganta cäsucur imacunata jaticunanpaj y imano alchacunanpäpis. Chauraga ancianucuna pitapis consejaycunanpäga aliraj tantiacunman pipis alichush visticuycan o manachush.

10. Quiquincuna acracunanpaj captenga, ¿imataraj rurashwan?

¹⁰ Ishcay pogushga cristianucunaga ima asuntupitapis manami igualchu acrapäcun. Y cayga manami ninanchu jucnin caj yarpashgan ali cashganta y jucninpäga mana ali cashganta. Chauraga quiquinchi yarpashganchino waquincuna rurananpäga ama shuyarashwanchu (Rom. 14:10).

¿PIRAJ CONSEJAYCUNMAN?

11, 12. Ancianucuna pitapis consejaycunanpaj captenga, ¿imataraj puntataga tapucunman, y imanir?

¹¹ Chauraga pitapis consejaycunapaj caycaptenga, ¿piraj chayta ruranman? Tantiarinapaj, majayoj panita o juc wamrata juc anciano consejacuyta munaptenga, alimi canman puntata chay panipa runanwan o wamrapa taytanwan parlaptenga. Öraga quiquincunami consejacuyta munanman o anciano consejacushgan horacho caycänanpaj munanman.b Y 3 caj parrafucho nishganchinopis, jipash panita consejaycunanpaj caycaptenga, alichi canman juc pogushga panilanchi chayta rurananpaj.

¹² Jina caynopis juc anciano tapucunman: “¿Nogachuraj chay consejuta goycöman o jucchuraj chayta ruranman?” nir. ‘Nogaga imapäpis mana valëchu’ pipis chayno yarpajta consejaycunanpaj captenga, alimi canman juc anciano chaycunapa pasashgan caj consejaycuptin. ¿Imanir? Payga musyangami imano ricacushganta y imano parlapänanpäpis. Pero lapan ancianucunami consejananpaj caycan y hermanucunata shacyächinanpaj Biblia wilacushganno cawapäcunanpaj. Pipis corregishga cananpaj captenga, corregishgami canman.

¿IMANOTAJ CONSEJAYCUSHWAN ALI YANAPARCUNAPAJ?

13, 14. ¿Imanirtaj ancianucuna consejacunanpäga shumajraj wiyanman?

¹³ Shumaj wiyaycuyraj. Pilatapis consejaycunanpaj juc anciano preparacuycaptenga cayno tapucunman: “¿Rasunpachu musyä imacunapa pasaycashganta?, ¿sasa problemacunapachuraj pasaycan?, y ¿imano yanaparcunäpätaj munan?”.

¹⁴ Santiago 1:19 textucho caycaj consejuga alapa alimi. Chaycho nin: “Puntata shumagrag mayapäcuy waquincagcuna imapita parlangantapis. Chaynuypis juclaga ama rabyacäriychu”. Juc ancianuga manami ninmanchu ‘nogaga mayna musyä chay waugui imacunapa pasaycashganta consejaycunäpaj’ nir. Proverbios 18:13 nimanchi: “Rimayta manaraq ushaptin contestaq runaqa mana tantiyakuq karmi penqaypaq kaykan”. Chaymi puntataga tapucunanchi y wiyacunanchi ima nimashganchicunata. Y cay yachachicuypa galanancho parlashganchi ancianush chayta yachacurgan. Payshi preparacushganpita panita jucla manaraj parlapar, caynoshi tapucunman cargan: “¿Imanolataj caycanqui panilä?”, “¿alichu ricacunqui?”, “¿imalachopis yanaparcömanchuraj?” nir. Hermanucuna imacunapa pasaycashganta ancianucuna musyariptenga, consejuncunaga hermanucunata yanaparcungami.

15. ¿Imanotaj ancianucuna cäsucunman Proverbios 27:23 texto nishganta?

¹⁵ Hermanucunata shumaj reguinquiman. Pitapis ali yanapänayquipäga manami cangachu juc ishcay textucunata leishgayquipita o imacunata rurananpaj nishgalayquipita. Sinoga paycunaga musyapäcunman paycunapaj yarpachacushgayquita y yanapayta munashgayquitapis (leiriy Proverbios 27:23). Ancianucunaga calpachacunmanmi waugui panicunapa amigun cananpaj.

16. ¿Imatataj ancianucuna ruranman pipis consejuncunata ali chasquinanpaj?

¹⁶ Ancianucuna hermanucunawan parlaptenga manami canmanchu imaypis consejaycunanlapaj, sinoga cada cadalami paycunawan parlapacärinman imacunapa pasaycashganta alcäbu caycänanpaj. Chayno ruraptenga, “hermanucunawan ali amigo capäcunga” nin juc pogushga anciano. Y caytapis ninmi: “Chauraga imalapis captenga sasanachu canga consejaycunapaj”. Y consejuta chasquejpis cäsucungami.

17. ¿Imaytaj ancianucuna pacienciacoj y cuyacoj canman?

¹⁷ Pacienciacoj y cuyacoj canquiman. Y masraj chayno canayqui Bibliawan consejacushgayqui caj mana wiyacuptin o jucla cäsucuyta mana munaptin. Ancianucunaga chaypita jucla rabiacärinmanchu. Jesús cashganno canman, Bibliaga paypita nergan: “Paquinaycaj llullu shogushtapis manami paquirengachu. Lamparinpa mëchan yangalla goshtaycajtapis manami upirachengachu” (Mat. 12:20). Chaymi ancianuga Jehovata mañacunman consejacushgan cajta yanapänanpaj imanir consejuta wiyacunanpaj y chasquicunanpäpis. Waquincunaga tiempuwanraj cuentata gocun imano cäsucunanpaj. Chauraga juc anciano pacienciacoj y cuyacoj captenga, hermanucunaga consejucunaman yarpachacur cäsucärengami. Ichanga maygan consejupis Bibliawanmi canman.

18. 1)¿Imatataj öraga pasanman consejacuptinchi? 2) Fotuwan recuadrucho ricashganchino, ¿imatataj taytacuna tapucunman wamrancunata manaraj consejaptin?

¹⁸ Pantashgayquicunapita yachacuy. Cay yachacuycho ricashganchino lapanta rurayta munarpis, öraga juchasapa cashganchiraycur pantashunmi (Sant. 3:2). Chauraga calpachacushwanmi imacunacho pantashganchicunapita yachacunapaj. Hermanucuna cuyashganchita ricaptenga, öraga pantashganchipita o parlayninchiwan ofendishganchipitapis perdunamäshunmi (“Taytacunapaj wilacuy” recuadruta ricäriy).

¿IMATATAJ YACHACUSHCANCHI?

19. ¿Imacunata rurartaj waquincunapa shongunta cushircachishwan?

¹⁹ Canan yachacushganchino öraga sasami pitapis ali consejaycunapaj. Lapanchimi juchasapa canchi, consejacoj caj y consejuta chasquejpis. Canan yarparcushun yachacushganchita. Pitapis consejacuyta munarga cuyacuywanmi rurashwan. Jina shumaj tantiarcushun, consejaycunapaj caycan o manachush y pitaj chay consejuta goycunanpäpis. Chaymanpis tapucuycunata rurashwan y ima nimashganchicunata wiyashwan imacunapa pasaycashganta musyanapaj. Paycunaman yarpachacur cuyacuywan parlapashwan y amiguncunamanpis ticrashwan. Lapanchimi munanchi consejacushganchi waquincunata yanapänanpaj y shonguncunatapis cushircachinanpaj (Prov. 27:9).