Señorninchi Jesús pushamänanchipaj jaguishun

1. ¿Imataj Diospa voluntänin caycan canan wichanpaj?

DIOSPA voluntäninga caycan paypa ali wilacuynincuna may chaymanpis chayananpaj (Mar. 13:10; 1 Tim. 2:3, 4). Chaymi Jehová munaynin ruracänanpäga cuyashga Wamrantami acrargan chayta ricänanpaj. Chauraga predicación Jesuspa maquinchona caycaptin segurumi caycanchi Armagedón chayamuptenga Jehová cushishga caycanga lapan rurashganchicunapita (Mat. 24:14).

2. ¿Imacunapitataj canan yachacushun?

² Cay yachachicuycho tantiarcushun imano Jesús tantiaj y yäracuypaj esclavuta yanapan, espiritual cajcho yanapacuycunata chasquinapaj y predicaciunpis may chaymanpis chayananpaj imano camacächin (Mat. 24:45). Jina ricashun imacunata rurartash jucninchi jucninchi Jesustawan yäracuypaj esclavutapis yanapäshun.

JESÚS ALTANTUMI CAYCAN PREDICACIUNPITA

3. ¿Ima cargutataj Jesús chasquergan?

³ ¿Imanotaj musyanchi predicaciunpita Jesús altantula caycashganta? Pay cielupaj cuticunanpäna caycaptin waquin discipuluncunawan shuntacargan Galilea jircacho y cayno nergan: “Tayta Diosga maquëman llapantami churasha cay pachacho cajtapis syëlucho cajtapis”. Nircur caytapis mandargan: “Gamcunaga caypita ayway may-chay nasyunchöpis disïpulö cananpaj” yachachipäcunqui (Mat. 28:18, 19). Chauraga caycunaga tantiachicun Jesús carguta chasquishganta predicaciunta pushananpaj.

4. ¿Imanirtaj seguro caycanchi Jesús predicaciunpita altantula caycashganta?

⁴ Jesusga nergan Diospa ali wilacuynincuna “may-chay nasyunchöpis” chayananpaj y runacuna discipuluncunaman ticrananpaj, y gatirajnincunata aunirgan paycunawan caycänanpaj “kay patsa ushakänanyaq” (Mat. 28:20). Jesús nishganga tantiachimanchi canan wichanyaj predicaciunpita altantula caycänanpaj.

5. ¿Imata rurartaj yanapacuycanchi Salmo 110:3 cumplicänanpaj?

⁵ Jesusga musyarganmi ushanan junajcunacho achca yanapacojcuna cananpaj. Payga seguro caycargan cay palabracuna cumplicänanpaj cajta: “Pillyashayqui junaj mandashayqui runacunaga gam cajmanmi shuntacämonga” (Sal. 110:3). Chauraga gampis Diospa ali wilacuyninta waquincunata yachachicuycaptiquega yanapacuycanqui Jesusta y yäracuypaj esclavuta, jina cay profecía cumplicunanpäpis. Ichanga predicación jinala ruracänanpäga ima chapacunapis cangapaj.

6. ¿Ima sasacunapataj pasanchi Diospita yachachicuptinchi?

⁶ Canan wichan apostatacuna, politicocuna y pushacoj religiosucunaga lulacur imayca mana cajcunata predicaciunpita parlapäcun. Chauraga castanchicuna, reguishganchi runacuna y aroj masinchicunapis chayta creipäcuptenga Jehovatawan predicaciuntapis jaguirinapaj nimäshunmi. Waquin naciuncunachoga chiquimajninchicuna jurapämanchi, ashlipämanchi y carcelchopis wichgarächimanchi, pero chaycunaga manami manchacächimanchichu. Jesusga nergan: “Noqaman yärakamashqaykipitami pïmaypis chikipäkushunkipaq” (Mat. 24:9). Chauraga runacuna chiquimaptinchega ricachicun Jesuspa rasunpa gatirajnincuna caycashganchita y Jehovapis ali ricaycämashganchita (Mat. 5:11, 12). Jesusga más munayniyojmi Diablupita, chaymi paypa yanapacuyninwan Diospa ali wilacuynincunaga may chaymanpis chayaycan. Diabluga michacuyta camäpacunchu.

7. ¿Imanirtaj ninchi Apocalipsis 14:6, 7 cumplicuycashganta ricaycashganchita?

⁷ Achca idiumacuna captinmi öraga sasa canman lapancunata Diospita yachachicunapaj. Ichanga Jesusga juc visiuncho Juanta nergan tucuy rimaypita runacuna Diospita yachacunanpaj (leiriy Apocalipsis 14:6, 7). ¿Imanotaj chayga logracashga? Cananga jw.org paginanchicho 1.000 rimaycunapitapis masraj yachachicuycuna caycan. Jina Testigucunata Pushaj hermanucunaga aunipäcurgan Cushishgala imaypis cawanapaj libruta 700 idiumapitapis maschoraj traducicämunanpaj, chaywan runacunata yachachicunapaj. Chaypitapis señaslapa parlajcunapäpis videucuna caycan y gapracunapäpis librucuna caycan. Cay lapancunaga yanapacunmi pï may runacunapis Diospa Gobiernunpita yachacunanpaj. Y cananmi ricaycanchi “maytsay nacionpita karpis y ima idiömata parlaq karpis” runacunaga Diospa Gobiernunpita yachacuycajta (Zac. 8:23; Sof. 3:9). Cay lapancunaga ruracaycämun Jesuspa yanapacuyninwanmi, paymi predicaciunta pushaycan.

8. ¿Imatataj canancama logracashga runacunata yachachicushganchipita?

⁸ Canan wichan 240 naciuncunacho y territoriucunacho 8 millones runacunapitapis masraj Jehovapa testiguncuna capäcun. ¡Wata watami aypala runacuna bautizacärin! Chaypitapis masga cushicunchi paycuna Jehová munashganno cawashganta ricar, Biblia nishgannomi mushoj runanona cawapäcun (Col. 3:8-10). Achcajmi unaychoga jucwan jucwan cacärishga, pitapis chiquej, magacoj y marcanraycur imatapis ruraj, chay lapancunatami cachaycärishga. Paycunaga Isaías 2:4 nishgannopis: “Guërracho pelyananpaqpis manami kamarikunqanatsu”. Chauraga mushoj runanona cawanapaj calpachacuycashganchita ricar waquin runacunaga Diospa marcanman shacaycämun y Jesuspa rasunpa gatirajnincuna caycashganchitapis ricacämun (Juan 13:35; 1 Ped. 2:12). Y cay lapanchoga Señorninchi Jesús yanapaycämanchi.

JESÚS ESCLAVUNTA CHURAN

9. Mateo 24:45-47 wilacushganno, ¿imataj Jesús wilacurgan ushanan junajcunacho pasananpaj?

⁹ (Leiriy Mateo 24:45-47). Jesús nergan ushanan junajcunacho tantiaj y yäracuypaj esclavuta churananpaj chaynopa espiritual cajcho yanapacuycunata chasquinapaj. Y cananmi ricaycanchi imano chay esclavo shumaj aruycan. Jesusga cielupaj acrashga cajcunapita waquincunata acrashga Diospa sirvejnincunata y ali shonguyoj runacunatapis tiempulancho yachachicuycunata o ima yanapacuycunatapis goycunanpaj. Paycunaga manami nipäcunchu “caynömi wacnömi yäracunayqui” nir (2 Cor. 1:24). Chaypa trucanga paycunaga respetapäcun Diospa marcanpita Jesusla “mandajnin, yachachejnin” cashganta (Is. 55:4).

10. ¿Dibujucunacho yargamoj librucunapita maygantaj yanapashushcanqui Diospita yachacur bautizacunayquipaj?

¹⁰ Tantiaj y yäracuypaj esclavuga 1919 watapita pacha imayca publicaciuncunatami jorgamushga runacunata Diospita yachachicunapaj. Chaymi 1921 watacho inglés rimaycho El Arpa de Dios nishgan libro yargamushga, Bibliapita runacunata yachachicunapaj. Y tiempo pasariptinmi mushoj librucuna yargamushga. ¿Maygan libruwantaj cuyacoj Taytalanchi Diospita yachachicur galaycushcanqui y bautizacushcanqui? Cay librucunapitaga wiyashcanquichi: “Sea Dios veraz”, La verdad que lleva a vida eterna, Usted puede vivir para siempre en el paraíso en la Tierra, El conocimiento que lleva a vida eterna, ¿Qué enseña realmente la Biblia? o ¿Qué nos enseña la Biblia? Jina Cushishgala imaypis cawanapaj libruwan capaz yachacuycanqui. Cay librucunaga ruracämushga yanapämänanchipaj runacunata yanaparcunapaj Jesuspa discipulunman ticrananpaj, chaycunaga tiempulancho yargamushga.

11. ¿Imanirtaj lapanchi calpachacunanchi Bibliapita más yachacunapaj?

¹¹ Esclavo camacächishgan yachachicuycunaga manami Bibliapita chaylaraj yachacuycajcunalatachu yanapan sinoga lapanchitami. Chaypita parlarmi apóstol Pabluga cayno escribergan: “Chucru micuymi ichanga rucu runacunapäna caycan”. Jina nerganpis chaycunata shumaj tantiacurga yanapämäshunmi musyanapaj “maygan alli cashanta maygan mana alli cashantapis” (Heb. 5:14). Öraga sasami canman Jehová mandamashganchicunata ruranapaj, masraj canan wichan runacuna pasaypa mana alicunata ruraptin. Pero Jesusga encargacunmi Bibliacho caycajcunata shumaj tantiarcunapaj yäracuyninchi ali cananpaj. Chaymi paypa yanapacuyninwan yäracuypaj esclavuga imayca yachachicuycunatami noganchipaj rurarcaycan.

12. ¿Imatataj rurashcanchi Diospa jutinta respetashpanchi?

¹² Señorninchi Jesús rurashganno noganchipis Diospa jutinta respetanchi (Juan 17:6, 26). Chaymi 1931 watapita Jehovapa testiguncunano reguishga canchi. Chaynopami pï maytapis musyachicuycanchi noganchipaj Diospa jutin alapa ali cashganta y waquincunapis reguinanpaj munanchi (Is. 43:10-12). Jina chay watapita pacha inglés rimaycho cay revistapa garancho Diospa jutin yurir galaycurgan. Y mana chaylachu Traducción del Nuevo Mundo nishgan Bibliachopis Diospa jutinta escribipäcurgan maycho yurinanpaj cashgancho. Waquin religiuncuna ichanga chayta manami ruranchu, chaycho caycajcunaga Bibliancunapita Diospa jutinta jorgapäcushga.

JESUSGA GATIRAJNINCUNATA PUSHAN

13. ¿Imanirtaj gamga seguro caycanqui Jesús tantiaj y yäracuypaj esclavuwan pushaycämashganchita? (Juan 6:68).

¹³ Jesusga tantiaj y yäracuypaj esclavuwanmi gatirajnincunata yanapaycan Jehovapa marcancho caycajcuna juc yarpayla cananpaj y waquincunatapis yanaparcunanpaj Jehovalata sirvipäcunanpaj. ¿Ima ninquitaj Diospa marcanpita? Capazchari Pedro Jesusta nishgannopis gampis ninquichi: “¿Pimantaj aywashaj? Gam yachachimashayquipitami mana ushacaj cawayta tarishaj” (Juan 6:68). ¿Diospa marcancho mana caycarga maychoraj caycashwan cargan? Jesusga Diospa marcanwanmi imayca yachachicuycunata gomanchi y yanapämanchi ali yachachicoj canapaj. Jina Jehovata cushichinapaj mushoj runanona imaypis cawanapaj yanapämanchi (Efes. 4:24).

14. Jehovapa marcancho caycashgayquiga, ¿imanotaj yanapäshushcanqui cay pandemia wichan?

¹⁴ Sasacuna chayamuptin Jesusga shumaj pushamanchi. Chayga clarumi ricacaycan COVID-19 pandemia galacuycushganpita. Achca runacunami imata rurananpäpis musyapäcurganchu, noganchicunata ichanga seguro caycänapaj Jesusga imata ruranapäpis wilamashcanchi. Chayga cargan achca runacuna cashgancho mascarillata churacunapaj y caru carulachu caycänapaj. Ancianucunata nipäcurgan lapan publicadorcuna imano cashganta altanto capäcunanpaj, micuynincuna pishiptin chasquipäcunanpaj camacächinanpaj y shacyächinanpaj Jehovawan amistäninta cuidananpäpis (Is. 32:1, 2). Jehovapa testiguncunata Pushajcunapa wilacuynincunapis yanapämashcanchi y shacyächimashcanchi cuidacunanchipaj.

15. ¿Ima más wilacuycunataj pandemia wichan yargamushga y chaywanga imataj logracashga?

¹⁵ Pandemia wichan wilacuycuna yargamushga imano reuniuncuna y predicaciunpis ruracänanpaj. Ilajpita reuniuncuna y asambleacunaga videucunapa rurar galaycushcanchi, jina cartacunapa y telefunupana predicar galaycushcanchi. Y cay lapanchoga Jehovapa bendiciunninta ricashcanchi. Achca sucursalcuna wilacurgan pandemia wichan más publicadorcuna mirashganta. Jina hermanucuna yachachicur pasashganpita ima wilacamushganga shacyächimanchimi (“Yachachicushganchita Jehová bendicin” recuadruta ricäriy).

16. ¿Imanirtaj manchacushunchu shamoj tiempucho imacuna pasaptinpis?

¹⁶ Waquin hermanucunaga cayno nirganchi “pandemiapita imano cuidacunapaj achca wilacuycuna captinmi sasano cäsucunapaj caycan” nir. Ichanga chay lapanta cäsucurga ricashcanchi alipämi cashganta (Mat. 11:19). Señorninchi Jesús cuyacuywan pushaycämashganchita cuentata gocurga manami manchacushunchu shamoj tiempucho imacuna pasaptinpis, Jehovawan cuyashga Wamranga jinalami yanapaycämäshun (leiriy Hebreos 13:5, 6).

17. ¿Imanotaj ricacunqui Jesús pushaycämashganchita ricar?

¹⁷ ¡Jesús pushamajninchi captin alapa cushichimanchi! May chaypita carpis ima idiumata parlarpis Jehovapa marcancho caycar juc yarpayla y juc shongula caycanchi. Tiempulancho ima yachachicuycunapis caycan yäracuyninchi ali caycänanpaj y runacunatapis yachachicunapaj. Jina jucninchi jucninchi calpachacuycanchimi mushoj runanona cawacunapaj y waquincunata cuyar yanaparcunapaj. ¡Alapami cushicunchi Jesucristo cuyacuywan pushaycämashganchipita!