Liejcuna tapucärishgan

Salmo 61:8 nishganno ¿“imaypis alabaycäshayqui” niptenga parlaycarganchuraj David mana wanunanpaj cajta?

Manami. David chaycho nishganga rasunpami cargan.

Chay versiculucho y waquin versiculucunacho escribishganmanpis yarparay. Pay nergan: “Imaypis alabaycäshayqui. Aunishäcunatapis waran-waranmi cumlishaj”, “TAYTA DIOS, lapan shonqüwanmi alabashayki. Jutikita joqarirmi imaypis adorashayki”, y “Imayyaqpis jutikita joqarirmi alabashayki” (Sal. 61:8; 86:12; 145:1, 2).

David nishganga manami lulachu cargan. ¿Imanirtaj chayno ninchi? Payga musyarganmi jucharaycur wanunanpaj cajta. Y quiquin Davidpis nerganmi juchasapa cashganta (Gén. 3:3, 17-19; Sal. 51:4, 5). Jina musyarganmi Diospa sirvejnincuna Abrahán, Isaac y Jacobpis wanupäcushganta. Chaymanpis musyarganmi imaylapis wanunanpaj (Sal. 37:25; 39:4). Salmo 61:8 nishganga ricächimanchi David Jehová Diosta imaycamapis alabayta munashganta, chayga ninan cawashgancamami (2 Sam. 7:12).

Öraga David cawaynincho imapa pasashganpitami escribergan, chaytami ricanchi Salmos 18, 51 y 52 capitulucunapa uman cajcho yurimoj palabracunacho. Salmo 23 cajcho Jehová Diospita nin pushacoj michimajninchi, yanapämajninchi y ima sasacunapita chapämajninchi cashganta. Davidga chaynomi uyshancunata shumaj michej, chaymi Jehovata imaycamapis sirviyta munargan (Sal. 23:6).

Yarparcushun, Davidga Diospa yarpaynintami escribergan. Guelgashgancunapitaga waquincunaga profeciacunami cargan, y tiempuwan cumplicarganmi. Tantiarinapaj, Salmo 110 cajcho David wilacurgan Jesús cielucho Diospa alawga caj laduncho jamacunanpaj y autoridäta chasquinanpaj. Chay autoridäwan Señorninchi lapan Diospa contrancho “sharkuq nacionkunataqa maytsaychöpis wanutsirmi ushanqapaq”. Mesiasga Davidpa miraynin cargan, paymi cielupita mandacamunga y imaycamapis sacerdote canga (Sal. 110:1-6). Jesusmi nergan Salmo 110 profeciaga paypita parlaycashganta y shamoj tiempucho cumplicänanpaj cajtapis (Mat. 22:41-45).

Ricashganchinomi, Jehová Davidta tantiachergan cawashgan wichan imacuna rurashganpita, y shamoj tiempucho cawarimur imaycamapis Jehovalata alabananpaj cajcunapita guelgananpaj. Chauraga, Salmo 37:10, 11 y 29 textucunaga David cawashgan wichan israelitacuna imano cawacushgachomi cumplicurgan, y shamoj tiempuchopis cumplicanga Dios aunicushgancunata ruraptin (cay revistacho ricäriy “Paraísuchömi noqawan kankipaq” nishgancho, 8 caj parrafucho).

Chauraga Salmo 61:8 y waquin versiculucunaga ricächimanchi unaycho David cawashgancama Jehovata alabayta munashganta. Rasunpa cajchoga shamoj tiempucho Jehová Dios payta cawarachimuptin imaycamapis Paylata alabanga.