¿Imata yachacunchi unay Israel reycunapita?

1, 2. ¿Imataj Bibliaga wilacun waquin Israel reycunapita?

BIBLIAGA wilacun 40 runacunano Israel marcata gobernashganta.a Jina wilacun paycuna imano cawashganta y waquin ali reycuna mana ali cajcunata rurapäcushgantapis. Mä Davidpita parlarcushun. Payga ali reymi cargan, paypita Jehová cayno nergan: “Mandamientükunata y leynïkunata lapan shonquykiwan cumplishqanki” (1 Rey. 14:8). Chayno captinpis, juc casaracushga warmiwan punurgan y runantapis juc guerracho wanuchishga cananpaj mandargan (2 Sam. 11:4, 14, 15).

² Waquin reycuna mana ali captinpis ali cajcunata rurapäcurgan. Rehoboampita yachacushun. Payga Jehovapa ricaynincho mana ali reymi cargan, chaymi Bibliaga nin “manami pay munashqannötsu” cawashganta (2 Crón. 12:14). Chayno captinpis, Jehová niptenga chunca tribucunawan mana peliananpaj y quiquin reynintapis acrananpaj, Rehoboam cäsucurgan. Jina achca marcacunata segurayächergan Israelpa enemiguncuna mana ushacächinanpaj (1 Rey. 12:21-24; 2 Crón. 11:5-12).

3. 1) ¿Imatataj tapucushwan? 2) ¿Imapitataj canan yachacushun?

³ Ichanga lapan Israel reycuna ali cajcunata y mana ali cajcunata ruraptinpis, ¿imanirtaj Jehová nergan waquincuna ali cashganta y waquincuna mana ali cashganta? Chayta musyarga shumaj tantiarcushun imacunata rurananchi Jehovapa shongunta cushichinapaj. Cananga yachacushun Israel reycunata juzgananpaj quimsa cajcunaman Jehová yarpashganta: lapan shongunwan payta cuyashganta, rasunpa arrepenticushganta y paylata sirvishgantapis.

LAPAN SHONGUNCUNAWAN JEHOVATA CUYARGAN

4. ¿Imatataj Jehová ricargan ali rey cashganta o mana ali rey cashganta ninanpaj?

⁴ Jehovata mana jaguicoj reycunaga paytami lapan shongunwan cuyapäcurgan.b Ali rey Jehosafatga lapan shongunwan Jehovata ashergan (2 Crón. 22:9). Josiaspita parlarga, Biblia cayno nin: “Punta kaq reykunapis [...] manami rey Josíasnöqa lapan shonqunwan [...] TAYTA DIOS munashqanno kawarqantsu” (2 Rey. 23:25). Rey Salomón ichanga, gobiernun ushanancho mana alicunata rurargan y “llapan shongunpa TAYTA DIOSMAN” yäracurgannachu (1 Rey. 11:4,TDI). Y Abiyam reypita, Biblia chaynolami wilacun: ‘TAYTA DIOSTA lapan shonqunwan cäsukurqantsu’ (1 Rey. 15:3).

5. ¿Imanotaj Jehovata lapan shongunchiwan adurashwan?

⁵ ¿Imanotaj Jehovata lapan shongunchiwan adurashwan? Chaypäga payta shongupita cuyananchi y paylapaj cawacunanchi, manami pipis obligamaptinchirächu ni cumplicunalapaj rurananchichu. Chaypa trucanga wanushganchicama Diosta sirvir payta cuyananchi.

6. ¿Imata rurartaj lapan shongunchiwan Jehovata cuyashwan? (Proverbios 4:23; Mateo 5:29, 30).

⁶ ¿Imata rurartaj Israel ali reycunano lapan shongunchiwan Jehovata cuyashwan? Jehovapita imapis mana raquicächimänanchipaj mana alicunapita witicunanchi, chaycunami canman mana alicunawan cushicuptinchi, guellaylaman yarpaptinchi y mana ali amigucunata ashiptinchi. Chaycuna pasaycämaptinchi, jucla cambiucunata rurananchi (leiriy Proverbios 4:23; Mateo 5:29, 30).

7. ¿Imanirtaj shongunchita cuidananchi mana alicunapita?

⁷ Imaypis shongunchitaga cuidashunmi ishcayman mana raquicashga cananpaj y mana engañamänanchipäpis. Chaymi mana nishwanchu ‘nogaga imaypis reuniuncho caycä, predicaciuncho caycä, chayga manami pasamangachu’ nir. Cayman yarpäriy: juc junajcho gasay hora chululushga caycaptiqui wasiquiman yaycunquiman. Ichanga, ¿puncuyquita quichashlachuraj cacharinquimanchu? Manachi, ¿au? Chayta ruraptiquega, gasayga alapachi yaycurinman. Chaymi mana nishwanlachu ‘nogaga imaypis Jehová munashgantami ruraycä’ nir. Shongunchita imayca mana alicunapita cuidacunanchi Jehovapa amigunno cashganchita mana raquicächimänanchipaj (Efes. 2:2).

JUCHANCUNAPITAMI ARREPENTICURGAN

8, 9. Davidta y Ezequiasta Jehová corrigiptin, ¿imataj paycunaga rurargan? ( dibujuta ricay).

⁸ David jatun juchatami ruraycurgan. Ichanga profeta Natán paywan parlaptin Davidga shongupitami arrepenticurgan (2 Sam. 12:13). Salmo 51 David guelgashgancho Biblia ricächicun pay rasunpa arrepentido cashganta. Pero Davidga manami Natán ricananlapächu chaytaga rurargan (Sal. 51:3, 4, 17, galaycunan caj).

⁹ Ezequiaspis jatun juchatami ruraycurgan. Biblia nin: “Orgullösumi rikakurqan. Tsayno kashqanpitami Tayta Dios pasaypa rabyakurqan” (2 Crón. 32:25). ¿Imanirtaj orgulloso ricacurgan? Rico cashganpitachi, asiriucunata guerracho vencishganpitachi o Jehová gueshyanta jampishganpitachi. Chaychari babiloniucuna payta visitaptin, ali tucur lapan riquezancunata ricächicurgan. Profeta Isaías chayno cashganpita corrigirgan (2 Rey. 20:12-18). Pero Ezequiasga Davidnomi juchancunapita arrepenticurgan (2 Crón. 32:26). Chauraga, ¿imanotaj Ezequiasta Jehová ricargan? Bibliaga nin: “Ezequíaspis cäsukurqan” (2 Rey. 18:3).

10. Jehová profetanta mandaptin Amasiasta corriginanpaj, ¿payga cäsucurganchu?

¹⁰ Rey Amasiasga alicunatami rurargan, pero lapan shongunwanga Jehovata manami cuyarganchu (2 Crón. 25:2). ¿Imachotaj fallaycurgan? Edomitacunata vencinanpaj Jehová yanapaptinpis, chay marcapa diosnincunatami adurar galaycurgan.c Nircur, Jehová profetanta mandaptin Amasiasta corriginanpaj pay manami cäsucurganchu (2 Crón. 25:14-16).

11. ¿Imata rurananchi Jehová perdunamänanchipaj? (2 Corintios 7:9, 11) (Fotucunatapis ricay).

¹¹ ¿Imata yachacunchi paycuna rurashganpita? Juchanchicunapita shongupita arrepenticunanchi, y imaypis chaycunata manana ruranapaj calpachacunanchi. ¿Y ancianucuna imalapitapis corrigimaptinchi? Ama yarpäshunchu Jehová Dios manana cuyamashganchita o ancianucuna mana alina ricamashganchita. Caytaga ama gongashunchu: unay ali reycunapis necesitargan consejananpaj (Heb. 12:6). Chauraga consejamaptinchi, ¿imata rurananchi? 1) humilde cananchi, 2) cambiucunata rurananchi y 3) Jehovata lapan shongunchiwan sirvinanchi. Juchanchicunapita arrepenticuptinchega, Jehová perdunamäshunmi (leiriy 2 Corintios 7:9, 11).

JEHOVALATA ADURARGAN

12. Jehovapa ricaynincho ali reycunaga, ¿imata rurapäcurgan?

¹² Jehovapa ricaynincho ali reycunaga paylatami aduraj y waquincunatapis yanapaj Jehovata adurananpaj. Öraga pantarcurpis, lapan shongunwanmi Jehovata aduraj y idulucunata ushacächinanpäpis calpachacoj.d

13. ¿Imanirtaj rey Acab mana ali cashganta Jehová nergan?

¹³ ¿Imata nishwan mana ali reycunapita? Ayvecisga ali cajcunata rurargan. Alapa mana ali rey Acabga juc cuti mana ali sienticurgan Nabot-ta wanuchishganpita (1 Rey. 21:27-29). Jinamanpis, israelitacunapaj marcacunata sharcachergan y guerracunata ganananpäpis yanapargan (1 Rey. 20:21, 29; 22:39). Chayno captinpis, warmin nishganno iduluncunata adurargan, y chaypita imaypis arrepenticurganchu (1 Rey. 21:25, 26).

14. 1) ¿Imanirtaj Jehovapa ricaynincho rey Rehoboam mana ali cargan? 2) ¿Imatataj achca mana ali reycuna rurapäcurgan?

¹⁴ Cananga mana ali rey Rehoboampitapis yachacushun. Yachacushganchino payga imayca ali cajcunata rurargan, ichanga munayniyoj ricacurnami Diospa Leyninta mana cäsucurgannachu y idulucunata adurar galaycurgan (2 Crón. 12:1).Chaypitana öraga Jehovata adurargan y öraga idulucunatapis (1 Rey. 14:21-24). Rehoboam, Acab y achca mana ali reycunapis Diosta adurananpaj trucanga luta dioscunata adurargan. Chauraga clarumi caycan Jehovapa ricaynincho juc rey ali cananpaj Paylatami aduranan cargan.

15. ¿Imanirtaj Jehová munan paylata aduranapaj?

¹⁵ ¿Imanirtaj Jehová munargan reycuna paylatami adurananpaj? Paycunapa maquincho caycargan lapan israelitacuna Jehovalata adurapäcunanpaj pay munashganno. Jina luta dioscunata adurapäcuptin jatun juchata y pasaypa mana alita rurapäcoj cargan (Os. 4:1, 2). Reycuna y lapan israelitacuna Jehovata adurananpaj aunicushgana cargan, chaymi Bibliaga wilacun juc dioscunata adurashganga jucwan jucwan cacojnomi cargan (Jer. 3:8, 9). Pilapis majanta jarucuptenga, traicionashganga shongunta pasaypa laquichicunmi. Chaynolami pilapis Jehovalata aunishganpitana luta dioscunata aduraptenga, Jehovapa shongunpis pasaypami laquicun (Deut. 4:23, 24).e

16. ¿Pïcunataj Jehovapa ricaynincho alita ruraj o mana alita ruraj caycan?

¹⁶ ¿Imataj yachacunchi? Luta caj religiunwan ni ichiclapis talucashwanchu. Jina Jehová munashganno adurananchi y imaypis munayninta rurar caycänanchi. Profeta Malaquías claro nergan pïcuna Jehovapa ricaynincho alita ruraj o mana alita ruraj cashgantapis. Jehová nergan: “Runakuna yapay tantiyapäkunqa […] sirvimaqkunata ali rikashqäta y mana sirvimaqkunata mana ali rikashqäta” (Mal. 3:18). Chaura juchasapa cashpanchi cutin cutin pantarcuptinchipis ama guelanäcushwanchu Jehovata sirvinapaj, ni yarpashwanchu paypita raquicäcunapaj. Pipis Jehovata jaguiriptenga, jatun juchata ruraycashgannomi canman.

17. ¿Imanirtaj shumajraj yarpachacushwan piwanpis casaracuyta munar?

¹⁷ Japalayqui caycaptiquega, ¿munaycanquichu casaracuyta? Malaquías ima nishganga yanapäshunquimanmi ali majata acranayquipaj. Pilapis öraga ali warmino o runanopis canman, pero Jehovata mana sirviptenga, ¿paypa nawinpa alita ruraj runanochuraj ricashga canga? (2 Cor. 6:14). Paywan casaracuptiqui, ¿yanapäshunquichuraj Jehovata sirvinayquipaj? Yarpay Salomonpa achca jäpa warmincuna captin ima pasashganta, paycunaga Jehovata adurapäcojchu. Chaymi ichic ichiclapa Salomonpis Jehovata jaguirgan y luta idulucunata adurar galaycurgan (1 Rey. 11:1, 4).

18. ¿Imatataj taytacunaga wamrancunata yachachinman?

¹⁸ Taytacuna, wamrayquicuna Jehovata lapan shongunwan sirvinanpaj, unay Israelpa reynincuna ima rurashganpita yachachiy. Tantiachinquiman Jehovapa ricaynincho ali rey o mana ali rey cananpaj Jehovalata adurashganpita cashganta. Rurayniquicunawan y ima nishgayquiwanpis ricächicuy imapitapis más ali cashganta Bibliata leinanpaj, reuniunman aywananpaj y predicananpäpis (Mat. 6:33). Chayta mana ruraptiquega, paycuna yarpapäcunman taytancuna Testigo captilanmi paycunapis Testigo cashganta. Y chayraycu tiempuwan Jehovapita witicunmanmi o raquicäcunmanpis.

19. ¿Ima nishwantaj pipis Jehovata manana sirviptenga? (“Yapay Jehovapa amigun cayta puedinquimi” recuadruta ricay).

¹⁹ ¿Y ima nishwantaj pipis Jehovata manana sirviptenga? Arrepenticuptin yapay Diospa amigun canmanmi. Chaypäga humilde canman y ancianucunapa yanapacuyninta chasquinman (Sant. 5:14). Rasunpa cajchoga, yapay Jehovapa amigun cananpaj calpachacushganga alapa alimi canga.

20. Unay ali reycunano captinchega, ¿imanotaj Jehová ricamäshun?

²⁰ Chaura, ¿imatataj yachacushcanchi unay Israel reycunapita? Jehovata lapan shongunchiwan cuyaptinchega, unay ali reycunanomi cashun. Unay imalachopis pantashga carga, arrepenticunanchi y cawayninchicho cambiucunata rurananchi. Ama gongashunchu Jehovalata aduranapaj cashganta, paylami rasunpa caj Dios caycan. Mana jaguiypa Jehovata sirviptiquega, paypa ricaynincho gampis alita ruraj runa canqui.