¿Mayashcanquichu?

Israelpa tiempuncho, ¿imanirtaj musicaga alapa importante cargan?

CAWAY vidancho musicaga israelitacunapa alapa importantimi cargan. Bibliaga achca cutimi wilacun runacuna instrumentucunata tucapacushganta y canciuncunata cantashgantapis. Jina Bibliacho canciuncunapis escribiraycanmi. Salmucuna, Cantar de los Cantares y Lamentaciones librucunaga escribishga cargan cantashga cananpaj. Cay libro Music in Biblical Life (La música en la vida bíblica) Diospa Palabranpita parlar nin: “Bibliaga wilacun unayshi lapancuna cawacärej cantapacuycarla y tucapacuycarla”.

Caway vidacho música. Israelitacuna canciuncunawanmi musyachicoj imano sienticushganta (Is. 30:29). Warmicunaga cushi cushilami cantapäcoj y panderetatapis tucapaylapa tushupäcoj, chaycunataga rurapäcoj guerracunata ganar, Jehovata adurananpaj fiestacunacho, pilatapis rey cananpaj acraptin (Juec. 11:34; 1 Sam. 18:6, 7; 1 Rey. 1:39, 40). Pï runalapis wanuptin israelitacuna laquishga caycashganta ricächicunanpaj, canción de duelo nishganta cantapäcoj (2 Crón. 35:25). Juc libro nergan “israelitacunata música pasaypa gustashganta” (Cyclopedia, de McClintock y Strong).

Reypa palaciuncho música. Israelcho caycaj reycunataga alapami música gustaj. Rey Saúl Davidta acrargan arpata tucapänanpaj (1 Sam. 16:18, 23). David reyman ticrarna, achca canciuncunatami escribishga y instrumentucunatapis rurashga y juc orquestatapis camacächishga Jehovapa templuncho tucapacunanpaj (2 Crón. 7:6; Amós 6:5). Rey Salomonpa palaciuncho achca cantajcuna warmipis olgupis carganmi (Ecl. 2:8).

Israelitacunaga Jehovata musicacunawanmi adurargan. Jerusalén templucho intrumentucunata tucayta yachaj 4.000 runacunami cargan, paycunaga tucapäcoj cimbalucuna, arpacuna y trompetacunata (1 Crón. 23:5; 2 Crón. 5:12). Manami reycunalachu musicawan Jehovata aduraj. Achca israelitacunami Jerusalenman aywananpaj Salmucunata cantapäcoj Diosta adurananpaj fiestaman aywar (Sal. 120-134). Judiucunapa costumbrincuna escribishgan librucunacho nin israelitacunaga Hallela cantacunatash cantapäcoj Pascua cenacho.

Canan wichanpis Diosta alabanapaj canciuncuna alapa importantimi caycan (Sant. 5:13). Cantacunata cantanchi Jehovata alabanapämi (Efes. 5:19). Cantacunaga hermanunchicunawan juc shongunola caycänapaj yanapämanchi, problemacunata aguantanapäpis yanapämanchi (Hech. 16:25; Col. 3:16). Jehovata cuyashganchi y payman yäracushganchitapis cantacunata cantar musyachicunchi.