Waquincuna mana ali tratamaptinchipis Jehovata sirviycäshun

1, 2. ¿Imacunaraycu öraga laquicushwan?

JUC cuticho Jesús tincuchicuywan yachachir juc viudapita nergan, payshi yaparir yaparir juezman aywargan quejacushganta arreglananpaj. Discipuluncuna chayta wiyar shumajchi tantiargan chay warmi imano ricacushganta, chay wichancho waquincuna mana ali rurashganraycu achca runa nacargan (Luc. 18:1-5). Noganchipis öraga waquincunapa culpanraycu laquicushwan y Jesús wilacushgan viuda imano ricacushgantapis tantiashwanmi.

² Pasaypa mana ali tiempucho cawaycanchi, chaymi pipis mana ali tratamashwan (Ecl. 5:8). Pero maygan yäracoj masinchi chayno tratamaptinchega shongunchipis masraj nanaycunraj. Congregaciuncho hermanucunaga juchayoj car imatapis rurar öraga laquichimashwanchi. Jesustapis chiquejnincuna mana alipa tratargan, pero canan ricashun imata pay rurargan. Diosta mana sirvej runacuna mana ali tratamaptichipis calpachacunchi pacienciacoj canapaj, y masraj yäracoj masinchiwanga. ¿Imanotaj Jehová ricacun yäracoj masinchi o pilapis mana ali tratamaptinchi? ¿Payga ricaycanchuraj?

3. ¿Imataj Jehová ruranga noganchiman yarpachacur?

³ Jehová altantumi caycan waquincuna imano tratamashganchipita. Payga alita rurajcunata cuyanmi (Sal. 37:28). Jesuspis nergan Tayta Dios sirvejnincunata “mana shuyarätsiylapami yanapanqa” (Luc. 18:7, 8). Jehová ichiclacho lapan nacachimashganchicunata ushacächiptenga pipis mana alita mana ruramäshunnachu, chaura jaucalana goyäcushun (Sal. 72:1, 2).

4. ¿Imanotaj Jehová yanapämanchi?

⁴ Ichiclana pishin lapan runacuna alicunalata rurar cawapäcunanpaj, chay wichan chayamunancama Jehová yachachimanchi imano lapan mana alicunata aguantanapaj (2 Ped. 3:13). Shumaj tantiachimanchi Jesús rurashganno noganchipis mana alicunata alicunawan cutichinapaj. Jina Palabranchopis achca consejuncuna caycan imata ruranapaj waquincuna mana ali tratamaptinchi.

JUCLA RABIACUSHWANCHU NI VENGACUSHWANCHU

5. Waquincuna mana ali tratamashganchi hora, ¿imamantaj yarpachacunanchi?

⁵ Waquincuna mana ali tratamashganchiraycu shongunchipis nanaycunraj y mana alimanpis chayashwanchi (Ecl. 7:7). Diosta cuyaj sirvejnincuna Job y Habacucpis chayno ricacurgan (Job 6:2, 3; Hab. 1:1-3). Öraga rabiashga caycarpis shumaj yarpachacunanchi ima mana alitapis mana ruranapaj.

6. ¿Imataj yachacunchi Absalón rurashganpita? (Dibujutapis ricay).

⁶ Waquincunapa culpanraycu pilapis nacaycashganta ricarga, capazchi vengacuyta munanchi. Ichanga chayno rurarga más mana alimanpis chayashwanchi. Yarpachacushun Davidpa wamran Absalón ima rurashganman. Payga pasaypa rabiacurgan wauguin Amnón panin Tamarta violashganpita. Y Moisespa Leynin nishganno Amnón rurashganpita wanunanmi cargan (Lev. 20:17). Chayno captinpis Absalón manami derechuyoj caycarganchu vengacurcur wauguinta wanuchinanpaj (2 Sam. 13:20-23, 28, 29).

7. Salmuta escribej runaga, ¿imanotaj ricacurgan waquincuna nacaycashganta ricar?

⁷ Waquincuna mana alicunata rurashganpita ima castigutapis mana chasquiptenga capaz tapucunchi, ‘¿imapätaj calpachacö alicunalata ruranäpaj?’ nir. Chaypa pasargan salmuta escribej, pay ricarganshi fiyu runacuna ali runacunata nacachirpis ali cawacuycashganta y paycunapita nergan: “mana nakaylapami rïcuyarkaykan” (Sal. 73:12). Payga fiyu runacuna ali goyashganta yarpar laquicuyman chayargan y cushi cushila Jehovata manana sirvirganchu, chaymi cayno nergan: “Fiyu runakuna imanir ali kawashqanta manami tantiyayta kamäpakütsu” (Sal. 73:14, 16). Jina caytapis nergan: “Ichicllanami pishisha jucha rurayman chayanäpaj.” (Sal. 73:2, TDI). Ricashun Alberto hermanunchipis chaypa pasashganta.a

8. ¿Imapataj Alberto pasargan y imata pay rurargan?

⁸ Alberto cristianuga tumpashga caycargan congregaciunpita ‘guellayta suwacushga’ nir. Chayraycu anciano manana cargannachu y waquin hermanucuna payta mana ali ricar galaycurgan. Payga nin: “Pasaypa rabiashga, jagayashga ricacurgä”. Chaymi payga reuniunman mana aywargannachu y pichga watacunapa Jehovapitapis carupacurergan. Alberto pasashganga yachachimanchi, pipis mana ali tratamaptinchi rabiashga cacurga Jehovapitapis carupacurishwanchi.

JESUSPITA YACHACUSHUN

9. ¿Imacunapataj Jesús pasargan? (Dibujucunatapis ricay).

⁹ Jesuspitaga imaycatami yachacuyta puedinchi. Paytaga achca runacuna mana alipa tratargan. Mesías cashganta niptin familiancuna payman yäracärirganchu y locuyaycashganta yarpapäcurgan. Pushacoj religiosucunapis nipäcurgan demoniucunapa munayninwan imatapis ruraycashganta. Soldaducunapis burlacur magapäcurgan y wanuchipäcurganpis (Mar. 3:21, 22; 14:55; 15:16-20, 35-37). Jesús chay lapanpa mana alipa pasaycarpis manami vengacurganchu. ¿Imataj paypita yachacunchi?

10. Jesús mana alicunapa pasarga, ¿imataj rurargan? (1 Pedro 2:21-23).

¹⁰ (Leiriy 1 Pedro 2:21-23).b Jesús mana alicunapa pasar musyarganmi imay parlananpaj y imay upäla cacunanpaj, chaypita noganchipis yachacushwan (Mat. 26:62-64). Waquincuna paypita lulacurcur mana ali parlaptin upälala quedacurgan (Mat. 11:19). Pitapis ashliparganchu ni vengacurganchu. “Tsaypa trukanqa pitapis mana jananpaypa juzgaq Tayta Diospa makinmanmi kachaykurqan”. Jesús musyarganmi papänin Jehová lapan nacaypa pasaycashganta y seguro caycargan lapan mana alicuna tiempuwanga ilgachishga cananpaj.

11. ¿Imatataj rurashwan lutanta mana parlarinapaj? (Fotucunatapis ricay).

¹¹ Noganchitapis pipis mana ali tratamaptinchi Jesusno imatapis mana ninapaj controlacunanchi. Mana cajlapitaga quejacur cacushwanchu. Öraga alichi canman upälala quedacunanchipaj chaynopa mana alicunaman mana chayanapaj (Ecl. 3:7; Sant. 1:19, 20). Pero waquincuna pitapis nacachiycashganta ricar o rasunpa cajta defendinapaj captenga capaz imalatapis parlarcushwanmi (Hech. 6:1, 2). Pero parlaptinchega imaypis respetulawan y ali shimilapa canman (1 Ped. 3:15).c

12. ¿Imata rurartaj nacachimashganchicunata “juzgaq Tayta Diospa makinman” cachaycunchi?

¹² Jina Jesuspitaga yachacunchi lapan pasamashganchita “juzgaq Tayta Diospa makinman” cachaycunapaj. Pilapis noganchipita mana alicunata parlaptin o mana ali tratamaptinchega, Jehová altantumi caycan chaypita. Y payga tiempulanchomi pasamashganchicunata alchanga. Cayta musyarga shacyächimanchi imatapis aguantanapaj. Nacachimashganchita Jehovapa maquincho cachaycuptinchega manami ajayäcushunchu ni rabiashgapis cacushunchu. Sinoga pajta Jehovata cushi cushila mana sirvishwannachu y paywan amistäninchitapis ushacächishwanchi (Sal. 37:8).

13. ¿Imataj yanapämäshun mana yamacaylapa imatapis aguantanapaj?

¹³ Jesús cashganno cayta munarpis ayvecis imata rurarpis o parlarpis pantaycushwan (Sant. 3:2). Waquincuna ima rurashgancunawan laquichimaptinchega capaz cay fiyu munducho gongayta puedishunchu. Chayno captenga ama gongaychu Jehová altanto caycashganta imacunapa pasashgayquita y Jesuspis musyanmi imano ricacushgayquita (Heb. 4:15, 16). Jina Jehovaga Palabrancho shumaj consejucunata gomanchi imacunata ruranapaj waquincuna mana ali tratamaptinchi. Ishcaylata yachacushun Romanos librucho.

“TAYTA DIOS JUZGANANPAQ PAYPA MAKINMAN KACHAYKUY”

14. ¿Imanotaj cäsucunchi Romanos 12:19 texto nishganta?

¹⁴ (Leiriy Romanos 12:19). Pabluga yäracoj masincunata nergan: “Tayta Dios juzgananpaq paypa makinman kachaykuy”. Chay consejutaga cäsucunchi ima nacachimashganchitapis Diospa maquincho cachaycuptinchi, jina imay y imano pay juzgananpaj cajman yäracurmi. John jutiyoj cristiano chaytami rurargan. Payga nin: “Geniüta dominanä cargan mana vengacunäpaj. Romanos 12:19 yanapämashga pacienciacoj canäpaj y Jehovaman yäracunäpaj”.

15. ¿Imanirtaj lapan pasamashganchitaga Jehovapa maquinman cachaycushwan?

¹⁵ Lapan nacachimashganchita quiquilanchicuna alchanapaj trucanga Jehovapa maquinman cachaycushun, chaynopa laquicuyman chayashunchu ni yarpachacuycarla caycäshunnachu. Jehovaga yanapämänanchita munan y juc Taytano cayno nimanchi: “Imapitapis laquicuptiqui maquëman cachaycuy y nogami yanaparcushayqui”. Jehová aunimanchi yanapämänanchipaj y pay imatapis ruraptenga alimi camacan. Payman yäracurga manami rabiashgala cawashunchu. Chayga yanapargan näga parlashganchi John hermanuta. Payga nin: “Jehovapa maquinman lapanta cachaycuptëga, pay yanapämashganga noga rurashgäpitapis más ali canga”.

‘MANA ALICUNATA ALICUNAWAN CUTICHIY’

16, 17. Mana alicunata alicunawan cutichinapaj, ¿imanirtaj Jehovata mañacunanchi? (Romanos 12:21).

¹⁶ (Leiriy Romanos 12:21). Pabluga nergan: “Mana allita rurashuptiqui alliwan cutichiy”. Y Jesuspis runacunata yachachir nergan: “Chikishuqnikikunata kuyapäkunki [...] nakatsishuptikipis Tayta Diosta paykunapaq manakärinki” (Mat. 5:44). Y quiquinpis chaytami rurargan. Jesusga alapachi nacargan Romapa soldaduncuna magapäcuptin, ashlipäcuptin, astapäcuptin y guerucho wanuchipäcuptin. Pay nacashganga alapa laquicuypächi cargan.

¹⁷ Jesús chay jinanpa pasarpis manami vengacurganchu. Taytanta manami mañacurganchu chay soldaducunata castigananpaj, chaypa trucan cayno nergan: “Kay runakunata perdonaykulay, papä. Manami musyapäkuntsu imata ruraykashqantapis” (Luc. 23:34). Laquichimajninchicunapaj mañacurga yanapämäshun jaucala caycänapaj y pitapis mana nanaparänapaj.

18. ¿Imanotaj yanapargan John y Alberto Jehovata mañacushganga?

¹⁸ John y Alberto cristianucuna wilacun Diosta mañacushganshi yanapargan mana alicunapa pasaptin. Alberto cayno nin: “Jehovatami mañacurgä mana ali tratamaj hermanucunapaj. Payta ruwacurgä yanapämänanpaj lapan pasamashgancunata gonganäpaj”. ¡Cushicunchimi hermanunchi Alberto yapay Jehovata cushi cushila sirviycashganpita! John cristiano cayno nin: “Cutin cutin Jehovata mañacoj cä mana alita ruramaj hermanupaj. Mañacushgäcunaga yanapämargan chay hermanuta ali ricanäpaj y mana juzganäpäpis. Chayta ruraycur jaucala ricacurgä”.

19. Cay munducho mana ali tratamaptinchipis, ¿imatataj ruraycashwan? (1 Pedro 3:8, 9).

¹⁹ Cay mana ali munducho imayca mana alicunapa pasashunmi. Imano captinpis, Jehovata mana yamacaypa mañacushun yanapämänanchipaj. Calpachacushun Jesús rurashganpita yachacunapaj y Bibliacho caycaj consejucunatapis cäsucushun. Chayno ruraptinchega Jehová bendicimäshunmi (leiriy 1 Pedro 3:8, 9).