Jehovaman yäracur imatapis rurashun

1. Pablo cawashganman yarpar, ¿imanirtaj cushishga caycargan?

APÓSTOL Pablo wanunanpäna ichiclana pishiycaptin, imano cawashganman yarpar cushishga sienticurgan. ¿Imanir? Paymi nergan: “Yalinakuqnömi chayanäpaq kaqman chayashqä. Yärakushqänölami imaypis yärakushqä” (2 Tim. 4:6-8). Apóstol Pablo Diosta sirvishgancho Jehovaman yäracur alita decidirgan. Paynola noganchipis ali decisiunta acrananchi Diospa shongunta cushichinapaj. ¿Imanopataj chayta rurashwan?

2. Pipis yäracoj carga, ¿imata ruran?

² Pablo quiquinpita parlar y waquin yäracoj cristianucunapitapis cayno nergan: ‘Diosta mana rikarpis paymanmi yärakuntsi’ (2 Cor. 5:7). Nishganga, ¿ima ninantaj? Bibliaga nin pipis yäracoj carga Dios munashganno cawan. Mana yäracoj runaga ricashgalanta y yarpashgalanta ruran Diosta mana cäsucur. Ichanga Diosman yäracojcuna manaraj imatapis decidir Jehová munashgannomi rurapäcun. Jina ruraynincunawan musyachicun Jehová nishganga ali cashganta, chayno Diosta mana ricarpis Paymanmi yäracärin y Payga rurashganta bendicinmi (Sal. 119:66; Heb. 11:6).

3. ¿Imanoraj cawacushun Diosta cäsucuptinchi? (2 Corintios 4:18).

³ Öraga ricashgalanchita wiyashgalanchita y mayashgalanchiman imatapis decidirga mana alimanmi chayashwan. ¿Imanir? Ayvecisga pipis imatapis rurananchipaj nimaptinchega mana alimi canman. Jina ricashgalanchipita imatapis ruraptinchi Diospa mandatuncunatapis cäsucuycanchichu (Ecl. 11:9; Mat. 24:37-39). Ichanga Diosman yäracur nimashganchicunata cäsucur paypa shongunta cushichishun (Efes. 5:10). Dios nimashganchita cäsucurga jaucala y cushishgalami cawacushun (Sal. 16:8, 9; Is. 48:17, 18). Imatapis Diosman yäracur ruraptinchega imaycamayajpis cawacushun (leiriy 2 Corintios 4:18).

4. Musyanapaj Jehovaman yäracushganchita o mana, ¿imamantaj yarpashwan?

⁴ Musyanapäga Jehovaman yäracushganchita o mana, cayman yarpäshun: “Manaraj imatapis rurar, ¿yarpashgälatacu imatapis rurä?, ¿ricashgaläman yäracö? o ¿Jehová mandamashgantacu casucö?”. Canan yachacushun Jehovaman yäracurga imano yanapämäshun caycunacho ali decidinanchipaj: aruyta ashir, pilawanpis casaracuyta munaptinchi y Jehovapa marcanta pushajcuna imatapis rurananchipaj nimaptinchi. Yachacushun imacunata cuentaman churashwan manaraj imatapis decidir ali cawacunanchipaj.

ARUYTA ASHIPTINCHI

5. Aruyta ashirga, ¿guellaylamanchu yarpashwan?

⁵ Lapanchimi arunchi gastunchita päganapaj y familianchita manteninapaj (Ecl. 7:12; 1 Tim. 5:8). Waquin aroj runacunapa pagun aypan familianta manteninanpaj y guellaynin shuntananpäpis. Ichanga waquincunapa pagun nestashgancunalata rantinanpaj aypan. Chaymi maycho arunanchipaj manaraj decidir capaz yarpashwan ‘¿pagö aypamangächuraj o mana?’ nir. Pero pipis guellaylaman yarparga Jehovaman yäracunchu.

6. Aruyta ashishganchi hora, ¿imamantaj yarpashwan? (Hebreos 13:5).

⁶ Jehovaman yäracurga maygan aruychopis manaraj arur, cayman yarpashwan: “¿Cay aruyga Jehovapa alichuraj caycan? ¿Predicanäpaj y reuniunman aywanäpaj tiempö cangachuraj? ¿Familiäwan walca tiempulacho caycashächuraj?” nir. Caycunata cuentaman churaptinchi Jehovapita manami raquicäcushunchu (Prov. 6:16-19; Filip. 1:10). Familianchipita o Jehovapita ima aruypis raquicächimänanchipaj captenga manami chasquishwanchu, aruyniynaj quedacuptinchipis. Jehovaman yäracurga imatapis decidiptinchi seguro caycäshun nestashganchicunata gomänanchipaj (Mat. 6:33; leiriy Hebreos 13:5).

7, 8. ¿Imata rurargan Javier hermanunchi Jehovaman yäracur? (Fotutapis ricay).

⁷ Sudamérica naciunpita Javiera hermanunchi cayno wilacun: “Juc aruymi cargan achca guellayta gananapaj chayno cushishga ricacunäpaj”. Payga precursorno yanapacunanpaj munargan. Jina caynopis wilacun: “Mincayta ashej runawan parlanäpaj nipäcamargan chaycho arunäpaj, manaraj paywan parlar Jehovata mañacurgä yanapämänanpaj. ‘Jehová musyan imata ali caycan nogapäga’ nir yarpargä. ‘Ali aruycho cayta munargä pero Jehovapa más arunäpaj michamaptenga, chay aruyta manami chasquishächu’ nir yarpargä”.

⁸ Javier cayno wilacun: “Parlashgä hora mincayta ashej runa nimargan arushgäpita más arunäpaj. Yachanaylapa nergä ‘manami puedishächu, tiempö cangachu predicanäpaj y reuniunnëmanpis aywanäpaj’ nir”. Javierga chay aruyta manami chasquirganchu y ishcay semana pasariptinna precursor regularno yanapacurgan. Nircurna juc ali aruyta tarirgan walca horala arunanpaj. Paymi cayno nin: “Jehová mañacushgäta contestamarganmi y yanapämargan ali aruyta tarinäpaj chayno precursor regularno canapäpis. Alapa cushicö chay ali aruyta tarishgäpita, tiempöpis can predicanäpaj, reuniunman aywanäpaj y hermanucunatapis yanapänäpaj”.

9. Trésor hermanunchi pasashganpita, ¿imata yachacunchi?

⁹ Chauraga, ¿imata rurashwan aruyninchi Jehovapita carupachimaptinchi? Yachacushun Congo naciunpita wauguinchi Trésor pasashganpita, pay wilacun: “Juc ali aruyta tarirgä. Chaycho shumaj ali pägamargan, runacunapis respetamajmi jina cushishga cawacoj cä”. Trésor hermanunchi arushganraycu reuniunmanpis achca cuti aywargannachu. Ayvecis aroj masincunapis nipäcoj lulacunanpaj y mana ali rurashganpita pitapis mana wilananpaj. Chay aruyta jaguiyta munarpis yarpachacurgan aruyniynaj quedacunanpaj cajman. Chauraga, ¿imata yanapargan? Pay wilacun: “Habacuc 3:17-19 nishganta leir ‘aruyniynaj caycaptëpis Jehovami yanapämanga’ nir yarpargä y chay aruyta jaguirgä. Achca aruchicojcuna ‘ali aruyoj captin y ali pagashga captin familianta y Diostapis cäsupanganachu’ nir yarpapäcun. Cushicömi familiäta y Jehovata mana jaguishgäpita. Juc wata pasariptinna, Jehová yanapämashga juc aruyta tarinäpaj chaynopa payta más sirvinäpaj y familiäwanpis juntula caycänäpaj. Chaymi Jehovata sirviptinchi guellayninchi walcala captinpis payga imaycanopapis yanapämäshunmi”. Jehová nimashganchicunata cäsucuptinchi y payman yäracuptinchi bendecimäshun.

PILAWANPIS CASARACUYTA MUNAPTINCHI

10. Pipis casaracuyta munaptin, ¿imacunalaman yarpartaj ricashgalantano ruraycanman?

¹⁰ Casaracuyga Jehovapa regalunmi, chaymi pipis casaracuyta munaptin alimi caycan. Pipis casaracuyta munaptin alichi canman, caycunaman yarpaptin: ‘Chay hermano o hermana ¿imano portacun?, ¿ali mozu o buena mozacu caycan?, ¿guellayojchu?, ¿familianta alicu rican, waquincunatapis alicu tratan? y ¿paywan caycar cushishgacu caycä?’ nir. Caycunalaman yarpaptin ricashgalanta y munashgalanta ruraycanmanmi.

11. Piwan casaracuyta munaptin, ¿ima consejucunata cäsucunman? (1 Corintios 7:39).

¹¹ Jehovaga alapa cushicun pï hermanapis o hermanupis piwan casaracuyta decidinanpaj, paypa consejuncunata cäsucuptin. Y consejuncuna caycan piwanpis reguinacärinanpaj ali edäninchona caycanman (1 Cor. 7:36). Jina yarpachacunman ali warmi o ali runa cashganman Jehová yachachimashganchino (Prov. 31:10-13, 26-28; Efes. 5:33; 1 Tim. 5:8). Pï runa o warmi Jehovapa testigun mana captin ‘gamwan cacuyta munaycä’ nishuptiqui 1 Corintios 7:39 (leiriy) nishganta cäsucunquiman. Imano captinpis Jehovaman yäracuptiqui, paymi yanapäshunqui ali caycänayquipaj (Sal. 55:22).

12. Rosa ali decidishganpita, ¿imata yachacunqui?

¹² Colombia naciunpita Rosa jutiyoj paninchipita parlarcushun, payga precursorano yanapacuycan. Aruyninchoshi mana Testigo runata reguirgan. Chay runa paywan cacuyta munargan. Paninchi Rosapis paywan cayta munargan. Pay cayno wilacun: “Ali runano cashganta ricargä, marcanchopis pitapis yanapacoj y nogatapis ali tratamaj. Chay runaga shongüpänomi cargan pero manami Jehovapa testigunchu cargan. Decidinäpaj manami facilchu cargan, paywan cayta munargä. Chay tiempucho casaracuyta munargä, ichanga Jehovapa marcancho pitapis tarirgächu nogäpajno”. Rosaga manami ricashgalanman y munashgalanman yarparäcurganchu, sinoga yarpargan paywan cacuptin Jehovapa cuyacuynintapis ograrinmanchi cargan. Ali decidircur chay runawan parlargannachu más bienga espiritual caj ruraynincho ocupaduna caycargan. Tiempuwanna Yachachicojcunapa Escuelanman aywargan. Cananga precursora especialno sirviycan. Chaypita payga nin: “Jehová yanapämashganpita cananga cushishga sienticö”. Munashganchita jaguirinapäga y Jehová munashganno ruranapäga öraga sasachi canman, ichanga cäsucuptinchega Jehová caway vidanchicho yanapämäshunmi.

JEHOVAPA MARCANTA PUSHAJCUNA IMATAPIS RURANANCHIPAJ NIMAPTINCHI

13. Pushaj hermanucuna imatapis ruranapaj nimaptinchi öraga, ¿imanopataj yarpar galaycushwan?

¹³ Ancianucuna, congregaciunta watucamoj hermano, Betelpita hermanucuna o Jehovapa testiguncunata pushaj hermanucunapis, öraga nimanchi imata rurananchipaj chaynopa Jehovata ali sirvinanchipaj. Ayvecisga imata ruranapaj nimashganchita shumaj mana tantiaptinchi cayno yarpashwan: ‘Mandamashganchi manami alichu caycan, nogapänochu. Chay hermano juchayoj car, lutantami wilacuycan’ nir.

14. Pushaj hermanunchicuna nimashganchicunata cäsucunapaj, ¿imamantaj yarpashwan? (Hebreos 13:17).

¹⁴ Jehová imatapis alilatami ruran. Pay lapanta musyan imano yarpashganchita imano sienticushganchitapis. Chaymi payman yäracur nimashganchicunata shongupita jucla cäsucunchi (leiriy Hebreos 13:17). Cäsucoj captinchega hermanunchicunawan juc shongunola y jaucala cawacushun (Efes. 4:2, 3). Pushaj hermanunchicuna noganchino juchasapa capäcun, chayno captinpis nimashganchicunata jucla cäsucuptinchi Jehovami bendecimäshun (1 Sam. 15:22). Imatapis corriginapaj captenga tiempulancho Jehová corrigingami (Miq. 7:7).

15, 16. Kevin hermanunchita, ¿imata yanapargan cäsucunanpaj? (Fotutapis ricay).

¹⁵ Jehovaman yäracur imatapis ruraptinchi paymi yanapämanchi. Perú naciuncho achca runacunami castellano cajta rimapäcun, pero caycanmi quechua rimajcunapis. Achca watapami hermanunchicuna quechua rimajcunata ashinanpaj censuta rurapäcurgan. Tiempuwanna autoridäcunapa leynincunata cäsucur pushaj hermanucuna jucnopana predicapäcunanpaj nergan (Rom. 13:1). Chay hora hermanucuna tapucärergan ‘¿imanopataj canan quechua rimajcunata taripäcushaj?’ nir. Paycunaga pushaj hermanucuna wilacuynincunata cäsucärergan, chay rurashganpita Jehová bendicirganmi ñanpu shongu runacunata tarinanpaj.

¹⁶ Kevin anciano hermanunchi chay wilacuycunata wiyar cayno yarpar galaycurgan: “Cananga, ¿imata rurashaj?, ¿imanopataj quechua rimajcunata tarishaj? nir”. Chauraga Kevin, ¿imata rurargan? Pay cayno wilacun: “Proverbios 3:5 textuman yarpargä y Moisés imacunapa pasashganmanpis yarpargä. Jehová Moisesta mandargan Egiptupita israelitacunata jorgunanpaj y Puca Lamarman apananpaj, chaycho caycarna Egipto soldaducunapita gueshpinanpaj puedipäcurgannachu. Chay horacho Moisés Jehovata cäsucurgan y Jehovami bendicirgan juc milagruta rurar” (Éx. 14:1, 2, 9-11, 21, 22). Chayman yarpar Kevin Pushaj hermanunchicuna nishganta cäsucurgan y cayno nin: “Cäsucushganchipita Jehovami alapa bendicimashganchi. Unayga achca horatarajmi purej canchi juc ishcay quechua rimajlata tarinanchipaj. Cananga achca quechua rimajcunata caycashgancho predicaj aywanchi, paycunawan parlanchi, yapay watucunapaj cutinchi y Diospitapis yachachiyta galaycunchi. Jina achca quechua rimajcunapis reuniunman aywapäcun”. Aumi, Jehovaman yäracuptinchi y cäsucuptinchi paymi bendecimäshun.

17. ¿Imata yachacushcanchi?

¹⁷ Caycama yachacushcanchi Jehovaman yäracur imata rurananchi: aruyta ashiptinchi, casaracuyta munaptinchi y pushaj hermanunchicuna imatapis ruranapaj nimaptinchi. Jina Jehová nishganta cuentaman churashwan, manaraj decidir imata ricar wiyar cushicunapaj, imata estudianapaj, imano wamracunata uywanapäpis. Ima asuntuchopis Jehovaman yäracur cäsucuptinchi paymi bendecimäshun. Chaycunata rurarmi “TAYTA DIOSNINTSIMAN imaypis yärakärishun” (Miq. 4:5).