¿Yarpanquichu?

¿Yarpanquichu guepa quillacunacho Wilacamoj revistacho ima leishgayquipita? Mä musyanayquipaj cay tapucuycuna caycan:

¿Imanirtaj Jehovata alabanchi?

Jehovata alabanchi shongupita respetarmi, payta shongupita cuyashpanchimi y runacunata yachachicuptinchipis (w25.01, 3 caj página).

Pipis ofendimaptinchega ¿imatataj rurashwan perdunananchipaj?

Pilapis ofendimaptinchi ‘chaynolami aliyäcushaj’ nir yarpashwanchu. Yarpay, jagayashgala y rabiashgala mana caycarga cushi cushilami cawacushun (w25.02, 15 y 16 caj paginacuna).

¿Imanirtaj discípulo Marcos mozu cajcunapaj ali ejemplo caycan?

Marcos listo caycargan waquincunata yanapananpaj. Juc cuticho ima pasashganpita laquishgala caycarpis manami guelanäcurganchu. Pay calpachacurgan Pabluwan y waquincunawan ali apanacärinanpaj y amigun cananpaj (w25.04, 27 caj página).

Jesús Taytan Jehovata nirgan: “Jutiquita reguichishcä”. ¿Imapita parlaycargan? (Juan 17:26).

Jesuspa discipuluncuna musyapäcurgan Diospa jutin ima cashganta. Chaymi “jutiquita reguichishcä” Jesús niptenga Jehová imano cashganta, cuyacoj cashganta, imata munashganta y rurashgantapis parlaycargan (w25.05, 20 y 21 caj paginacuna).

Humilde carga ¿imacunamantaj yarpäshun?

Noganchi humilde carga manami yarpäshunchu lapanta musyashganchita. Noganchicuna manami musyanchichu imay Jehovapa junajnin chayamunanpaj cajta, ni imata ruranga yanapämänanchipaj. Jina mana musyanchichu waraycuna ima pasananpaj cajta y Jehová reguimashganchita lapantaga manami tantianchichu (w25.06, 15 a 18 caj paginacuna).

Juc yachacuypita leircur o discursuta wiyarcur ¿imacunamantaj yarpashwan?

Cay tapucuycunaman yarpäshun: “¿Imanotaj tantiachicamun Biblia nishganman waquincuna creinanpaj? ¿Ima tincuchicuycunawan tantiachicamun, nogapis waquincunata yachachinäpaj? ¿Pïcunaraj wiyayta munapäcunga cay yachachicuypita?” (w25.07, 19 caj página).

Jehová Davidta perdunashganta musyar ¿imata yachachimanchi?

David jatun jucha rurashga carpis shongupita arrepenticuptin Jehová perdunarganmi (1 Rey. 9:4, 5). Noganchitapis Jehovaga juchanchipita perdunamaptinchi lapanta perdunamanchi, juchanchipita manami imaypis yarpannachu castigamänanchipaj (w25.08, 17 caj página).

Bibliata estudiajcuna juc temapita mana rasla tantiaptenga o ima yachacushganpita mana chasquicuptenga ¿imata rurashwan?

Bibliawan yachachiptinpis mana shumaj tantiaptenga juc caj yachacuypita yachachishun, y mana tantiashganpita juc caj cutichona shumaj tantiachishun (w25.09, 24 caj página).

¿Imanirtaj Bibliaga nimanchi jucha ruray mana engañamananchipaj? (Heb. 3:13).

Juchayoj cashganchiraycu mana alicunata rurayta munanchi y Jehová cuyamashganchitapis dudashwanmi (w25.10, 16 caj página).

Lapan shongunchiwan Jehovata mañacunanchipaj ¿imamantaj yarpänanchi?

1) Jehová imano cashganman yarpänanchi. 2) Jehovata manaraj mañacur shumaj yarpänanchi imacunapita parlananchipaj. Capazchi Jehovata wilapashwan pilatapis manaraj perdunashganchita. 3) Jehovata mañacurga manami raslaga mañacushwanchu, chaynopa imano sienticushganchita lapantaraj payta wilapänanchi (w25.10, 19 y 20 caj paginacuna).

¿Imata rurartaj edayashga hermanunchicunata yanapashwan?

Paycunata seguido gayacushun y watucushunpis. Doctorman aywananpaj yanagashun y paycunawan predicaj yargushunpis (w25.11, 6 y 7 caj paginacuna).

¿Imata rurartaj cristiano noviucuna casaracuyta munar Jehová munashgannola rurapäcunanpaj?

Autoridäcunapa leynincunata cäsucärinman, imata rurarpis Tayta Dios alabashga cananpajno rurapäcunman, Jehová munashganno ali vistishga cananpaj yarpapäcunman, Bibliapa contrancho caycaj costumbricunata manami rurapäcunmanchu y bodata imano rurananpaj cajpita cuyacuywan y respetulawan claro parlapäcunman (w25.12, 21 a 24 caj paginacuna).