Ri jastaq che esam che ri kajibʼ ubʼantajik ri kikʼ xuqujeʼ ri kkikoj ri kekunanik

Ri jastaq che esam che ri kajibʼ ubʼantajik ri kikʼ. Ri jastaq riʼ esam chike ri kajibʼ ubʼantajik ri kikʼ: ri glóbulos rojos, glóbulos blancos, plaquetas xuqujeʼ ri plasma. Jun chike ri esam che ri glóbulos rojos are ri hemoglobina. Pa neʼ esam che chikop o che winaq, rukʼ wariʼ kbʼan kunabʼal che, che kkoj che kikunaxik ri winaq che kʼot uchoqʼabʼ ri kikikʼel xuqujeʼ chiʼ jun winaq kutzaq kʼi ukikʼel.

Ri kesax che ri plasma, ri plasma are jun ubʼantajik ri kikʼ che are kʼi joron kʼo rukʼ (are 90%) xuqujeʼ kʼo nikʼaj chik che pa kaxlantzij kbʼix hormonas, sales inorgánicas, enzimas, nutrientes, minerales xuqujeʼ azúcares che. Che ri plasma xuqujeʼ esam kunabʼal che kuqʼatej ri kikʼ, ri kunabʼal ubʼiʼ albúmina xuqujeʼ nikʼaj chik che kutoʼ ri bʼaqil chuwach yabʼil. Chiʼ jun winaq kuriq jun yabʼil, kʼo jujun mul kbʼix che, che utz kukoj gammaglobulina, pa wajun kunabʼal riʼ kʼo jastaq chupam che kutoʼ ri qabʼaqil chuwach yabʼil che esam che ri uplasma jun winaq che kyawaj, o kyabʼin täj. Jun chik, che ri glóbulos blancos esam ri e kunabʼal kibʼiʼ pa kaxlantzij interferones, interleuquinas, wa täq kunabʼal riʼ kkoj che ukunaxik ri yabʼil che keqʼaxik xuqujeʼ yabʼil che kʼäx ukunaxik kbʼix cáncer che.

¿La utz che ri e cristianos kekunax rukʼ ri jastaq che esam che ri kajibʼ ubʼantajik ri kikʼ? Ri Loqʼalaj Pixabʼ kubʼij ta ronojel ri utz kbʼanik, rumal laʼ pa qajujunal rajawaxik kqachaʼ ri kqabʼan chuwach ri Ajawaxel xuqujeʼ kqabʼan ri kubʼij ri retaʼmabʼal qakʼuʼx chaqe. E kʼo nikʼaj cristianos kkaj täj kkoj chike ri jastaq che esam che ri kajibʼ ubʼantajik ri kikʼ, rumal che kkichomaj, chiʼ ri Ajawaxel xuya ri Utaqonik chike ri israelitas, xubʼij chike chiʼ kkikamisaj jun chikop rajawaxik kkitix ri ukikʼel «puwiʼ ri ulew jachaʼ jaʼ» (Deuteronomio 12:22-24). E kʼo nikʼaj chik cristianos, che xuqujeʼ kkikoj ta ri qas kikʼ o ri kajibʼ ubʼantajik, tekʼuriʼ kkaj kkoj kunabʼal chike che kʼo jastaq chupam re ri jastaq che esam che ri kajibʼ ubʼantajik ri kikʼ, rumal che kkichomaj, che pa ri kunabʼal riʼ kʼot chi ri ukʼaslemal ri winaq o chikop che jawiʼ xesax wi loq.

Chiʼ kʼa majaʼ na kqachaʼ ri kqabʼano, utz che kqachomaj wariʼ: «¿La wetaʼm che chiʼ kinbʼij che kwaj täj kinkoj ri jastaq che esam che ri kajibʼ ubʼantajik ri kikʼ tajin kinbʼij che kwaj täj kinkoj ronojel ri kunabʼal che e kʼo waʼ jastaq riʼ chupam, jujun chike are ri kkoj che uqʼatexik jun yabʼil o che uqʼatexik ri kikʼ? ¿La kinkun che ubʼixik che ri ajkun jasche kwaj täj kinkoj ri jastaq che esam che ri kajibʼ ubʼantajik ri kikʼ o jasche xa jujun kwaj kinkojo?».

Ri kkikoj ri kekunanik. Chiʼ kpus jun winaq ri ajkun kʼo kʼi jastaq kkun che ubʼanik rech ktix ta ri kikʼ, weneʼ kuya jastaq pa ri ukikʼel ri winaq (hemodilución). Xuqujeʼ kkunik kubʼinisaj nikʼaj che ri kikʼ pa jujun bolsas xuqujeʼ kuya kunabʼal che ukʼaxel ri kikʼ che tajin kbʼinisaxik. Tekʼuriʼ kutzalij chi jumul pa ri ubʼaqil ri winaq chiʼ tajin kupus o chiʼ toʼtajinaq chik. Xuqujeʼ kkunik kukoj jun chʼichʼ rech kuchʼaj ri kikʼ che kelik chiʼ tajin kupus jun winaq xuqujeʼ kukoj chi che. Tekʼuriʼ ri kkibʼan ri e ajkun xaq ta junam, rumal laʼ ri cristiano utz che kutaʼ che ri ajkun jas ri uchomam che kubʼano.

Chiʼ rajawaxik kqachaʼ ubʼanik ri jastaq je jas ri qilom chik, are utz kqachomaj wariʼ: «We kbʼinisax jubʼiqʼ che ri nukikʼel pa jun chʼichʼ xuqujeʼ weneʼ ktakʼiʼ na, ¿la kuya ri retaʼmabʼal nukʼuʼx che nutijom rukʼ ri Utzij ri Ajawaxel chwe kinchomaj che ri kikʼ riʼ are we in na, rumal laʼ rajawaxik täj kintix ‹puwiʼ ri ulew›?» (Deuteronomio 12:23, 24). «¿La kuya ri retaʼmabʼal nukʼuʼx chwe che we chiʼ kinpusik kesax nikʼaj che ri nukikʼel, rech kkunaxik tekʼuriʼ kkoj chi pa ri nubʼaqil?» «¿La kinchʼobʼ che chiʼ kinbʼij che kwaj täj che kinkoj ronojel ri jastaq rech kukoj ri nukikʼel tajin kinbʼij che kwaj täj kesax ri nukikʼel rech kil ri kʼo chupam, ri hemodiálisis xuqujeʼ chiʼ kkoj ri chʼichʼ rech kubʼinsaj ri kikʼ?»

Are ri cristiano ri kchowik ri kraj kbʼan rukʼ ri ukikʼel chiʼ kpusik. Xuqujeʼ je waʼ kbʼanik chiʼ kil ri kʼo chupam ri ukikʼel jun winaq xuqujeʼ chiʼ kkoj ri jastaq rech kkunax jun winaq chiʼ kesax jubʼiqʼ ukikʼel tekʼuriʼ kkoj chi jun mul che weneʼ chiʼ kunam chi ri kikʼ.