¿Jas kqabʼano rech kqachilaj ri Ajawaxel?

1. ¿La kuta ri Ajawaxel ronojel ri chʼawem?

Ri Ajawaxel kubʼij chike konojel kiwach winaq che kkibʼan kichʼawem che (Salmo 65:2). Tekʼuriʼ kraj täj kubʼij che kuta ronojel ri chʼawem. Ri Loqʼalaj Pixabʼ kubʼij che ri achi che kok ta il che ri rixoqil kuya «qʼatebʼal» che ri uchʼawem rukʼ ri Ajawaxel (1 Pedro 3:7). Chiʼ ri israelitas kʼi mul xkibʼan itzelal, ri Ajawaxel xuta ta chi ri kichʼawem. Tekʼuriʼ, areʼ kuta ri kichʼawem ri winaq pa neʼ xkibʼan jun kimak we kkiya kan ri kimak. Chasikʼij uwach Isaías 1:15 xuqujeʼ 55:7.

Chawilaʼ ri video ¿La kuta ri Dios ronojel ri e chʼawem?

2. ¿Jas kqabʼan che ubʼanik ri qachʼawem?

Pa uyaʼik uqʼij ri Ajawaxel kʼo ri chʼawem, rumal laʼ xaq xiw che ri Jehová kqabʼan wi ri qachʼawem (Mateo 4:10; 6:9). Xuqujeʼ, rumal che öj ajmak, are utz che kqabʼan ri qachʼawem pa ubʼiʼ ri Jesús, areʼ xuya ri ukʼaslemal rumal qech (Juan 14:6). Ri Jehová kraj täj che xa kqasikʼij uwach o xa qayaʼom pa qajolom ri kqabʼij pa qachʼawem, are kraj che kqabʼan rukʼ ronojel ri qanimaʼ. Chasikʼij uwach Mateo 6:7 xuqujeʼ Filipenses 4:6, 7.

Ri Ajbʼanol qe kuta ri qachʼawem che kqabʼan pa qanimaʼ (1 Samuel 1:12, 13). Xuqujeʼ kubʼij che utz kqabʼan qachʼawem pa ronojel tiempo, weneʼ chiʼ ksaqarik o chiʼ kbʼe ri qʼij, o chiʼ kqatij qawa o chiʼ öj kʼo pa jun kʼäx. Chasikʼij uwach Salmo 55:22 xuqujeʼ Mateo 15:36.

3. ¿Jas kojutoʼ wi ri kiriqbʼal ibʼ ri cristianos?

Öj kʼo chkixoʼl ri winaq che kekojon ta che ri Ajawaxel xuqujeʼ ketzeʼnik chiʼ kyaʼ ubʼixik che kukʼam lo utzilal cho ri uwach Ulew. Wa täq jastaq riʼ kubʼano che kqakoj ta chi qachoqʼabʼ che rachilaxik ri Ajawaxel (2 Timoteo 3:1, 4; 2 Pedro 3:3, 13). Rumal laʼ utz che kqamulij qibʼ kukʼ nikʼaj chik cristianos rech kkiya qachoqʼabʼ. Xuqujeʼ e areʼ rajawaxik kqaya kichoqʼabʼ. Chasikʼij uwach Hebreos 10:24, 25.

Chiʼ keqachilaj ri winaq che kkachilaj ri Ajawaxel xuqujeʼ kubʼan chaqe öj che kojkunik kqachilaj ri Ajawaxel. Ri riqbʼal ibʼ che kkibʼan ri testigos rech Jehová kojutoʼ rech kqetaʼmaj chirij ri kikojonik ri nikʼaj chik. Chasikʼij uwach Romanos 1:11, 12.

4. ¿Jas kabʼano rech kʼo jun utz awachilanik rukʼ ri Ajawaxel?

Ri rajawaxik kabʼano are utz che katchoman chirij ri xawetaʼmaj chirij ri Jehová pa ri Loqʼalaj Pixabʼ. Chatchoman chirij ri kubʼano, chikij ri e upixabʼ xuqujeʼ chirij ri ubʼim che kubʼan na. Chiʼ katchomanik xuqujeʼ chiʼ kabʼan ri achʼawem katutoʼ rech kawetaʼmaj chirij ri uloqʼoqʼenik xuqujeʼ ri unojibʼal ri Ajawaxel. Chasikʼij uwach Josué 1:8 xuqujeʼ Salmo 1:1-3.

We kʼo qakojonik xuqujeʼ kqakubʼsaj qakʼuʼx chirij ri Ajawaxel kojkunik kqabʼan rachiʼl. Ri kojonik junam rukʼ jun kotzʼiʼj: rajawaxik amaqʼel kjaʼxik xuqujeʼ ri qakojonik rajawaxik amaqʼel kqaya uchoqʼabʼ. Kojkunik kqabʼan wariʼ we kojchoman chirij ri pixabʼ che kchʼaw chirij ri qakojonik. Chasikʼij uwach Mateo 4:4 xuqujeʼ Hebreos 11:1, 6.

5. ¿Jas utzilal kriqik we kachilax ri Ajawaxel?

Ri Jehová kok il chike ri kkiloqʼoqʼej. Keʼuchajij chuwach jastaq che kubʼan kʼäx che ri kikojonik xuqujeʼ ri kikʼaslemal che kʼot ukʼisik pa ri petinaq (Salmo 91:1, 2, 7-10). Kubʼij chike che kkibʼan ta jastaq che kubʼan kʼäx o kuya bʼis chike, xuqujeʼ kukʼut ri kkibʼano rech utz kel ri kikʼaslemal. Chasikʼij uwach Salmo 73:27, 28 xuqujeʼ Santiago 4:4, 8.