¿Jas tobʼanik kkiya ri upixabʼ ri Ajawaxel chaqe?

1. ¿Jasche rajawaxik kkʼam qabʼe?

Jehová, ri Qatat xuqujeʼ ri Ajbʼanol qe, are sibʼalaj nim ri unojibʼal. Kojraj xuqujeʼ kok il chaqe. Xojubʼan täj rech kqatas qibʼ chirij (Jeremías 10:23). Junam kukʼ ri alaj täq akʼalabʼ rajawaxik che ri kitat kinan kkikʼam kibʼe, öj rajawaxik che ri Ajawaxel kukʼam qabʼe (Isaías 48:17, 18). Ri tobʼanik kuya ri upixabʼ ri Ajawaxel are jun sipanik uyaʼom chaqe. Chasikʼij uwach 2 Timoteo 3:16.

Ri utaqonik xuqujeʼ ri upixabʼ ri Jehová kukʼut chqawach ri utz kqabʼan pa ri qakʼaslemal xuqujeʼ kukʼut chqawach ri kqabʼan che uriqik ri tewchibʼal pa ri petinaq. Rumal che areʼ ri xojbʼanowik, utz che öj kqaj kukʼam qabʼe. Chasikʼij uwach Salmo 19:7, 11 xuqujeʼ Apocalipsis 4:11.

2. ¿Jas riʼ ri upixabʼ ri Ajawaxel?

Ri upixabʼ ri Ajawaxel are e kʼutunem che kkikʼut chqawach ri kqabʼan che ubʼanik kʼi jastaq. Ri taqonik xaq xiw kubʼij chaqe ri kqabʼan che ubʼanik jun jastaq (Deuteronomio 22:8). Rech kojkunik kqakoj jun pixabʼ che ubʼanik jun jastaq, rajawaxik che kqakoj ri qachomanik (Proverbios 2:10-12). Jun kʼutbʼal, ri Loqʼalaj Pixabʼ kukʼutu che ri kʼaslemal are usipanik ri Ajawaxel. Wajun pixabʼ riʼ sibʼalaj rajawaxik rech kukʼam qabʼe pa ri qachak, pa ri qachoch, xuqujeʼ chiʼ kojbʼe pa jun waʼkatem, rumal che kubʼan chaqe che kqachajij qibʼ. Chasikʼij uwach Hechos 17:28.

3. ¿Jas kebʼ pixabʼ nim kibʼanik?

Jesús xuya ubʼixik chirij kebʼ pixabʼ che nim kibʼanik. Ri nabʼe kukʼut ri rumal xojbʼanik: retaʼmaxik uwach ri Ajawaxel, uloqʼoqʼexik xuqujeʼ upatanexik rukʼ sukʼilal. Rajawaxik knaʼtaj wajun pixabʼ riʼ chaqe pa ronojel ri kqachaʼ ubʼanik (Proverbios 3:6). Ri kkibʼan wajun pixabʼ riʼ kkibʼan e rachiʼl ri Ajawaxel xuqujeʼ kkiriq ri qastzij kikotemal xuqujeʼ jun kʼaslemal che kʼot ukʼisik. Chasikʼij uwach Mateo 22:36-38.

Ri ukabʼ pixabʼ are kojutoʼ rech öj utz kukʼ ri nikʼaj chik (1 Corintios 13:4-7). Chiʼ kqabʼan ri pixabʼ pa ri qakʼaslemal tijan kqabʼan qe junam rukʼ ri kubʼan ri Ajawaxel che kilik ri winaq. Chasikʼij uwach Mateo 7:12 xuqujeʼ 22:39, 40.

4. ¿Jas utzilal kkiya ri pixabʼ chaqe?

Ri upixabʼ ri Ajawaxel kuya loqʼoqʼenik pa ri familia xuqujeʼ kubʼano che ktukin täj (Colosenses 3:12-14). Jun chike ri pixabʼ are kuchajij ri familia, rumal che kukʼutu che ri kʼulanem utz täj che ktukinik. Chasikʼij uwach Génesis 2:24.

Unimaxik ri upixabʼ ri Ajawaxel xuqujeʼ kuya utzilal pa qachak xuqujeʼ pa qanimaʼ. Jun kʼutbʼal re, pa kʼi chak, are keʼajawax ri ajchakibʼ che kkibʼan ri pixabʼ riʼ pa kikʼaslemal, winaq che kkibʼan ta elaqʼ o molom tzij are qas kechakunik (Proverbios 10:4, 26; Hebreos 13:18). Xuqujeʼ, ri Utzij ri Ajawaxel kukʼutu che are utz kojkikot rukʼ ri jastaq kʼo qukʼ che kajwataj chaqe ronojel qʼij rech kojok il che ri qachilanik rukʼ ri Ajawaxel chuwach ri nikʼaj chik jastaq. Chasikʼij uwach Mateo 6:24, 25, 33 xuqujeʼ 1 Timoteo 6:8-10.

Ri upixabʼ ri Ajawaxel xuqujeʼ kojutoʼ rech utz qawach; jun chike are ri pixabʼ chirij ri qʼabʼarik, kojutoʼ rech kqariq ta kʼäx xuqujeʼ yabʼil che weneʼ kkamisanik (Proverbios 14:30; 22:24, 25; 23:20). Ri Jehová uyaʼom chaqe che kqatij jubʼiqʼ tzam tekʼuriʼ utz täj we kojqʼax che utijik (Salmo 104:15; 1 Corintios 6:10). Ri upixabʼ ri Ajawaxel kuya utzilal chaqe, rumal che kubʼij che kqachajij ri qachomanik xuqujeʼ ri kqabʼan pa qakʼaslemal (Salmo 119:97-100). Ri öj cristianos nim kqil wi ri pixabʼ xa ta rumal che kqariq utzilal; are, kqabʼano rumal che kqaj kqaya uqʼij ri Qatat che kʼo pa ri kaj, Jehová. Chasikʼij uwach Mateo 5:14-16.