«Chpet ri Awajawbʼal»

Jehová xutzujuj: «Kʼo ta chi oqʼej, kʼaxkʼolil, yabʼil xuqujeʼ kamikal. Kinsuʼ na ronojel ri uwal kiwach. Kenaʼtaj ta chi ri ojer itzel taq jastaq».

Jehová xeʼuya ri Adán xuqujeʼ Eva pa ri jeʼlalaj Edén rech kekʼasiʼ chupam pa kikotemal xuqujeʼ jamaril. Rajawaxik kkiqʼijilaj ri kiTat kʼo pa ri kaj xuqujeʼ kekʼojiʼ kʼi kalkʼwal rech kkinojisaj ri uwach Ulew. Adán xuqujeʼ Eva xeniman ta che ri Jehová, are kʼu ri kraj kubʼan areʼ kʼextajinaq taj. Pa wajun wuj riʼ qilom che ri Dios amaqʼel kubʼan ri kutzujuj. Ri Rajawbʼal kukʼam lo utzalaj taq tewchibʼal pa ri uwach Ulew, pa ri tiempo riʼ kbʼantaj ri xutzujuj che Abrahán.

Xa jubʼiqʼ chi kraj ksachisax uwach ri Satanás, ri itzel taq uxlabʼal xuqujeʼ ri itzel taq winaq. Konojel ri winaq kkiqʼijilaj ri Jehová. Kojyawaj ta chik xuqujeʼ kojkam ta chik, pa ukʼaxel waʼ, ronojel taq qʼij are chiʼ kojwalijik kʼo más qachuqʼabʼ xuqujeʼ kojkikotik che kʼo qakʼaslemal. Ri uwach Ulew kubʼan jun jeʼlalaj uwach. Kʼo utzalaj ta jastaq ktijowik xuqujeʼ utzalaj taq qachoch qonojel. E kʼo ta chi ri itzel taq winaq, konojel e utz taq winaq chik. Ri e juyubʼal taq awajibʼ kkixibʼij ta chi kibʼ chqe, oj xuqujeʼ kqaxibʼij ta chi qibʼ chke.

Sibʼalaj jeʼl riʼ are chiʼ Jehová kumaj kikʼastajisaxik ri e kaminaqibʼ. Kqaya utz kipetik ri e winaq che xekʼasiʼ ojer junam rukʼ Abel, Noé, Abrahán, Sara, Moisés, Rut, Ester xuqujeʼ David. E are kojkitoʼ che ubʼanik che ri uwach ulew kux jun jeʼlalaj kʼolbʼal. Amaqʼel kʼo jun utzalaj chak kqabʼano.

Jehová kraj che at katkʼojiʼ pa ri utzalaj ulew riʼ. Chilaʼ kqetaʼmaj kʼi utz taq jastaq chrij ri Dios che kʼo ta jumul qachomam. Rumal laʼ, ¡ronojel qʼij chojnaqajin che ri Jehová, kimik xuqujeʼ chbʼe qʼij saq!