Bʼantajik 5

Kmajtaj jun kʼaxalaj kʼaslemal

CHIʼ xeʼesax bʼi ri Adán rukʼ Eva chupam ri kotzʼiʼjalaj Edén, xpe jun nimalaj kʼäx pa kikʼaslemal. Rajawaxik che sibʼalaj xechakunik rech xewaʼik. Xeʼel ta loq utzalaj täq cheʼ rech ktijow uwäch, xeʼel lo jalajoj uwäch täq kʼix. Wariʼ xbʼantajik chiʼ ri Adán rukʼ Eva xkenimaj ta ri Ajawaxel xuqujeʼ xkeya kan ubʼanik täq Rachiʼl.

Tekʼuriʼ xpe chi jun nimalaj kʼäx chikij rumal che xmajtaj kiriʼjobʼik, kʼisbʼal re xekamik. Masach chawe che: ri Ajawaxel xubʼij chike che kekamik, we kketij uwäch jun cheʼ che Jehová uchaʼom. Rumal waʼ, are ri qʼij che xketij wariʼ, are ri qʼij che xumaj kiriʼjobʼik. ¡Xkekoj ta ketaʼmbʼäl chiʼ xeniman ta che ri Ajawaxel!

Ronojel ri täq kalkʼwal ri Adán rukʼ Eva xeʼalaxik chiʼ kitat kinan (ktaʼ kchuʼ) e esam chik pa ri kotzʼiʼjalaj Edén. Wariʼ kraj kubʼij che xuqujeʼ kalkʼwal xeriʼjobʼik tekʼuriʼ xekamik.

Wat ri Adán rukʼ ri Eva xkenimaj ri Jehová, kʼo jun kikʼaslemal kʼot ukʼisik rukʼ kikotemal xuqujeʼ jewaʼ ri kalkʼwal. Xkʼejeʼ ta riʼ jun kikʼaslemal rukʼ kikotemal cho ruwäch Ulew. Nijun ta riʼ xrijobʼik, xuqujeʼ nijun ta riʼ xqaj pa yabʼil xuqujeʼ xkamik.

Are kraj ri Ajawaxel che ri winaq kʼo jun kikʼaslemal rukʼ kikotemal, xuqujeʼ kutzujuj che jewaʼ kubʼan na. Xiw ta kubʼan sibʼalaj utz ri uwäch Ulew, xuqujeʼ ronojel ri winaq kʼo yabʼil chike, keʼukunaj na. Konojel kkebʼan kachiʼl che kibʼ xuqujeʼ kkebʼan rachiʼl ri Ajawaxel.

Tekʼuriʼ ri Eva, rachiʼl ta chik ri Ajawaxel. Rumal waʼ, kʼäx xuriqo chiʼ xutzrik o xkʼejeʼ ral. Xuriq nim täq qʼoxomal. Qastzij kʼut, rumal che xniman ta che ri Jehová, Eva xuriq nim täq kʼäx. ¿La jewaʼ o je täj?

Ri Adán rukʼ Eva xkʼejeʼ e kʼi täq kalkʼwal. Chiʼ xkʼejeʼ ri nabʼe kalkʼwal, Caín xkekoj che ubʼiʼ. Ri ukabʼ kalkʼwal, Abel xkekoj che ubʼiʼ. ¿La awetaʼm su xkeriq wanikʼaj riʼ?

Génesis 3:16-23; 4:1, 2; Apocalipsis 21:3, 4.