Chqakojoʼ qachuqʼabʼ rech kqabʼan más utz che ri uchak ri Dios
1. ¿Jas kʼutbʼal rech ri nabʼe siglo kukʼutu che rajawaxik kqakoj qachuqʼabʼ rech kqabʼan más utz che ri uchak ri Dios?
1 Ri oj cristianos rajawaxik che kqakoj qachuqʼabʼ rech kqabʼan más utz che ri qachak che ri Dios. Rumal laʼ, Jesús xeʼutijoj ri rajtijoxelabʼ xuqujeʼ xeʼutoʼ rech utz kkibʼan che utzijoxik ri utzij ri Dios (Luc. 9:1-5; 10:1-11). Je wariʼ xuqujeʼ xkibʼan Áquila xuqujeʼ Priscila are chiʼ xkitoʼ ri Apolos chiʼ «xkikʼut ri ubʼe ri Dios chuwach, rukʼ tzʼaqatil» (Hech. 18:24-26). Pablo xuqujeʼ xubʼij che ri Timoteo —che kʼi chi junabʼ tajin kutzijoj ri utzij ri Dios— che kukoj uchuqʼabʼ rech kux jun utzalaj ajtij, rech kukʼut ukʼiyik «chkiwach konojel» (1 Tim. 4:13-15). Pa neʼ kʼi chi junabʼ tajin kqapatanij ri Qajaw junam rukʼ jun loqʼom pataninel, rajawaxik che kqabʼan más utz che ubʼanik ri qachak.
2. ¿Jas kqabʼano rech kqetaʼmaj chkij nikʼaj chik?
2 Chqetaʼmaj chkij nikʼaj chik. Jun chke ri kqabʼano rech kqatolaʼ qibʼ are kqil ri kkibʼan ri nikʼaj chi qachalal (Prov. 27:17). Rumal laʼ, are chiʼ kojbʼe che utzijoxik ri utzij ri Dios, qas chqatatabʼej ri kubʼij ri qachiʼl chiʼ ktzijonik. Xuqujeʼ, chqataʼ pixabʼ chke ri qachalal che qas kekun che ri chak xuqujeʼ chqatatabʼej ri kkibʼij chqe (Prov. 1:5). ¿La kʼax kqariqo o kojkun ta che kisolixik chi jumul ri e winaq, umajixik jun etaʼmanik chrij ri Biblia o jun chi ubʼanik ri qachak che ri Dios? Chojtzijon rukʼ ri ajkʼamal bʼe rech ri jupuq o rukʼ jun chi qachalal che kkunik kojutoʼo. Xuqujeʼ chnaʼtaj chqe che ri uxlabʼixel kubʼan más utz ajchakibʼ chqe. Rumal laʼ amaqʼel chqataʼ ri uxlabʼixel pa qachʼawem (Luc. 11:13).
3. ¿Jas kqabʼano we kyaʼ jun pixabʼ chqe, pa neʼ xa ta xqataʼ?
3 Mape qoyowal we kyaʼ jun pixabʼ chqe, pa neʼ xa ta xqataʼ (Ecl. 7:9). Kqabʼan ta nim che qibʼ xuqujeʼ chojmaltyoxinoq, junam rukʼ ri Apolos, chqabʼanaʼ ri kbʼix chqe. Are laʼ ri más utz kqabʼano (Prov. 12:15).
4. ¿Jasche rajawaxik kqetaʼmaj ubʼanik ri qachak?
4 We qas utz kqabʼan che ri qachak kuqʼijilaj ri Dios. Rech xuya uchuqʼabʼ ri utijoxelabʼ che ubʼanik utz che ri kichak, Jesús xukoj jun kʼutbʼal. Xubʼij che areʼ xaq junam rukʼ jun ucheʼal uva ri e rajtijoxelabʼ che kebʼe pa ri kaj e junam rukʼ ri e uqʼabʼ ri cheʼ che kkiya kiwach, che ri Dios keʼujosqʼij rech kuya más wachinik (Juan 15:2). Junam rukʼ ri rajaw ri e ucheʼal uvas kraj ri e cheʼ kkiya más kiwach, Jehová kraj che ri qʼijilanik che kqaya che «kukʼ taq ri e qachiʼ» —kraj kubʼij, utzijoxik ri utzij ri Dios— kubʼan más utz xuqujeʼ más nim (Heb. 13:15). ¿Jas kqariqo we kojkunik kqabʼan más utz che ri uchak ri Dios? Ri Jesús kuya ubʼixik chqe: «We sibʼalaj kiyaʼ wachinik [...] ri nuTat kanimarisax uqʼij» (Juan 15:8).