Chqabʼanaʼ sibʼalaj utz che ri qachak: cheqatoʼ ri e qachiʼl

¿Jasche rajawaxik? Ri Jesús retaʼm che sibʼalaj rajawaxik che kʼo qachiʼl. Rumal laʼ chiʼ xeʼutaq bʼi ri 70 ajtijoxelabʼ che xenabʼej bʼi chuwach che utzijoxik ri utzij ri Dios, pa kakabʼ xeʼutaq bʼik (Luc. 10:1). Jun achalal kkunik kutoʼ jun chik chiʼ ktzijon rukʼ jun winaq we kkun taj kutzalij uwach ri tzij o qas ta kuchʼobʼ ri kubʼij che ri winaq che tajin ktzijon rukʼ (Ecl. 4:9, 10). Xuqujeʼ kojkunik kqabʼij ri qabʼanom pa ri qachak o kqaya jun pixabʼ che ri qachiʼl rech más utz kel ri uchak (Prov. 27:17). Xuqujeʼ, kojkunik kqaya kichuqʼabʼ ri qachiʼl rukʼ utz taq tzijonem chiʼ kojqʼax cho jun ja chik (Filip. 4:8).

Ri kqabʼano:

Machomaj jun chik jastaq chiʼ ri awachiʼl tajin ktzijon rukʼ ri winaq (Sant. 1:19). We ri awachiʼl kusikʼij uwach jun texto rech ri Biblia, utz che xuqujeʼ at kasikʼij uwach pa ri aBiblia. Rukʼ waʼ katkunik katoʼ we kʼo rajawaxik che.
Qas chakojoʼ anojibʼal we kawaj kabʼij jun tzij chiʼ ri awachiʼl tajin ktzijon rukʼ jun winaq (Prov. 25:11). We awachilam bʼi jun qachalal che ukʼutik ri utzij ri Dios chuwach jun winaq, sibʼalaj kkikot riʼ ri qachalal we katoʼ rukʼ jupaj tzij. Are kʼu, weneʼ ri awachiʼl utz krilo che xaq utukel kchʼaw chuchiʼ jun ja. We kʼateʼ xumajij utzijoxik ri utzij ri Dios o qas ta retaʼm ri kubʼij weneʼ utz krilo che katoʼ chiʼ kbʼan jun pregunta che o kqʼatex uwach ri utzij. Pa neʼ katbʼe rukʼ jun qachalal chuchiʼ taq ja, che usolixik jun winaq o che utijoxik, man utz taj che kqaqʼatej uwach ri utzij ri qachiʼl, xiw oj kojchʼawik o kqakʼex ri tajin kkitzijoj.
Utz che kabʼij ri utz jastaq che, che ariqom pa ri akʼaslemal. We kʼo jun pixabʼ che utz kabʼij che ri awachiʼl rech utz kubʼan che ri uchak, sibʼalaj utz riʼ che kabʼij che (Prov. 3:27). Weneʼ katkunik kabʼij: «¿Jas kachomaj chrij wajun tzijonem riʼ?», «¿La kawaj kinya jun pixabʼ chawe?» o «Are taq chiʼ kkʼulmataj waʼ, in je wariʼ kinbʼano...». Masach chqe che ri qachalal sibʼalaj kumaltyoxij che kqaya jun pixabʼ che, are kʼu weneʼ kbʼisonik we amaqʼel kqabʼij ri jastaq che utz ta kubʼan che, che nim ta ubʼanik.

Chabʼanaʼ waʼ pa jun ikʼ:

Chiʼ kikʼis utzijoxik ri utzij ri Dios rukʼ ri awachiʼl, chabʼij che ri xatutoʼ wi ri xubʼij o ri xubʼano.