Ri e tzijol re ri utzij ri Dios

RI JEHOVÁ ukojom jun utzalaj kʼutbʼal chqawach che kojkunik kqesaj uwach: ri Jesucristo, ri uKʼojol (1 Ped. 2:21). Ri oj cristianos oj junam rukʼ ri Jesús, oj rajchak ri Dios che kqatzijoj ri utz taq jastaq re ri uQʼatbʼal tzij. Wariʼ kuya qachuqʼabʼ pa ri qakojonik, junam rukʼ ri xubʼij ri Cristo: «Tisaj wukʼ, iwonojel ri ix kosinaq, iwonojel ri kʼo iweqaʼn. Kinya kʼu na uxlanem chiwe. Chikʼamowaj ri weqabʼal ri kinya chiwij, chiwetaʼmaj iwe wukʼ, chi in kochʼonel xuqujeʼ machʼal ri wanimaʼ; kiriq kʼu na uxlanem che ri iwanimaʼ» (Mat. 11:28, 29). Qonojel ri qakʼamom wajun sikʼinik kʼo ta jumul qanaʼom che kʼo ta upatan ri tajin kqabʼano.

² Ri Jesús, che are qas rajchak ri Dios, xeʼusikʼij jujun winaq rech keteriʼ chrij (Mat. 9:9; Juan 1:43). Xeʼutijoj y xeʼutaq bʼik rech kkibʼan ri chak che xubʼan areʼ (Mat. 10:1–11:1; 20:28; Luc. 4:43). Are chiʼ qʼaxinaq chi ri tiempo, xeʼutaq chi bʼi e 70 utijoxelabʼ che utzijoxik ri utz taq jastaq re ri uQʼatbʼal tzij ri Dios (Luc. 10:1, 8-11). Xubʼij wariʼ chke: «Apachin ri kutatabʼej ri itzij, in riʼ kinutatabʼej. Apachin ri man nim ta kixril wi, in riʼ man nim ta kinrilo. Apachin ri man nim ta kinrilo, man nim ta kril wi riʼ ri xinutaq uloq» (Luc. 10:16). Rukʼ wariʼ qas xukʼutu che xuya jun eqeleʼn chke nim ubʼanik: kitoʼik ri Jesús y ri Nimalaj Dios. Junam rukʼ kimik. Ri qakʼamom ri sikʼinik che xuya ri Jesús rech kojteriʼ chrij yaʼom jun nimalaj chak chqe rumal ri Dios rech kqatzijoj ri utzij y keqatoʼ ri winaq rech keʼux cristianos (Mat. 24:14; 28:19, 20; Luc. 18:22; 2 Cor. 2:17).

³ Ri xqakʼam wajun sikʼinik qetaʼmam uwach ri Jehová y ri Cristo (Juan 17:3). Qetaʼmam ri jastaq che rajawaxik kqabʼan pa qakʼaslemal junam rukʼ ri ktaqan wi ri Dios. Rukʼ ri utobʼanik, xqakʼex ri qachomanik, xqakʼex ri qakʼaslemal y keqanimaj chi ri utaqanik (Rom. 12:1, 2; Efes. 4:22-24; Col. 3:9, 10). Sibʼalaj kojmaltyoxin che ri Jehová rumal laʼ xqajach ri qakʼaslemal che y xqabʼan ri qaqasanjaʼ. Are chiʼ xqabʼan qaqasanjaʼ xojux rajchak ri Dios.

⁴ Masach chqe che rech kqapatanij ri Dios, rajawaxik che chʼajchʼoj ri e qaqʼabʼ che mak xuqujeʼ ri qachomanik (Sal. 24:3, 4; Is. 52:11; 2 Cor. 6:14–7:1). Ri qakojonik chrij ri Jesús kojutoʼ rech kqapatanij ri Dios rukʼ jun chʼajchʼoj qanimaʼ (Heb. 10:19-23, 35, 36; Apoc. 7:9, 10, 14). Ri apóstol Pablo xunaʼtasaj chke ri cristianos che rajawaxik kkibʼan ronojel ri jastaq che uyaʼik uqʼij ri Dios y kʼo ta jastaq kkibʼano rech kmakun jun chi winaq. Ri apóstol Pedro xubʼij che nim ubʼanik che utz ri kqabʼan pa ri qakʼaslemal rech ri e winaq kkaj kkipatanij ri Jehová (1 Cor. 10:31, 33; 1 Ped. 3:1). ¿Jas kʼu kqabʼano rech jun winaq che tajin kretaʼmaj ri kukʼut ri Biblia kux tzijol utzij ri Dios?

E KʼAKʼ TAQ TZIJOL UTZIJ RI DIOS

⁵ Are chiʼ kqamaj uyaʼik etaʼmanik che jun winaq rajawaxik kqabʼij che che kutzijoj chke ri rachalaxik ri tajin kretaʼmaj, chke ri e rachiʼl o ri e rach ajchak. Wariʼ sibʼalaj nim ubʼanik kkʼut chuwach jun winaq rumal ri rajtij rech kux jun tzijol utzij ri Dios (Mat. 9:9; Luc. 6:40). Ri tijoxel che kunaqʼatisaj ribʼ kutzijoj ri tajin kretaʼmaj y che aninaq kkʼiy ri ukojonik, qastzij riʼ che kraj kel che utzijoxik ri utzij ri Dios chuchiʼ taq ja.

RI E TAQANIK Y RI E PIXABʼ CHE RAJAWAXIK KKIBʼAN RI E KʼAKʼ TZIJOL UTZIJ RI DIOS

⁶ Are chiʼ xa jubʼiqʼ chi kraj che jun tijoxel kumaj bʼenam che utzijoxik ri utzij ri Dios chuchiʼ taq ja, rajawaxik che kqilo che tajin kubʼan chi ri e taqanik y ri e pixabʼ re ri Biblia pa ri ukʼaslemal. Ri winaq kkibʼij che testigo rech Jehová ri kutzijoj ri utzij ri Dios chuchiʼ taq ja. Rumal laʼ, xaq xuwi ri winaq che tajin kubʼan chi pa ri ukʼaslemal ri e utaqanik ri Dios kkunik kux publicador no bautizado.

⁷ Are chiʼ jun Testigo tajin kuya etaʼmanik re ri Biblia che jun winaq y kunikʼoj ronojel ri pixabʼ re ri Biblia rukʼ, weneʼ kretaʼmaj kʼi jastaq chrij ri kriqitaj wi ri winaq. Weneʼ krilo che tajin kubʼan chi pa ri ukʼaslemal ronojel ri tajin kretaʼmaj. Paneʼ jeriʼ, ri e kʼamal bʼe rajawaxik kkimulij kibʼ rukʼ ri tijoxel y rukʼ ri ajtij rech ketzijon chrij jujun jastaq re ri ukʼaslemal.

⁸ Ri jachal kichak ri e kʼamal bʼe kubʼij chke e kebʼ kʼamal bʼe (jun chke are jun kʼamal bʼe re ri comité re servicio) che ketzijon rukʼ ri ajtij y ri tijoxel. Pa taq ri congregaciones che e kʼi ta kʼamal bʼe e kʼolik, kkun ri jachal kichak ri e kʼamal bʼe kukoj jun kʼamal bʼe y jun tobʼanel che knaw che ubʼanik ri uchak rech kkibʼan wariʼ. E areʼ aninaq ketzijon rukʼ ri ajtij y ri tijoxel. Jun kʼutbʼal, we ri jachal kichak ri e kʼamal bʼe kuya ubʼixik wariʼ chke pa jun riqbʼal ibʼ re congregación, weneʼ kekunik ketzijon rukʼ ri ajtij y ri tijoxel are chiʼ kkʼis ri riqbʼal ibʼ. Are chiʼ ketzijon kukʼ kkikoj utz taq tzij y kkixibʼij ta ri tijoxel. Are chiʼ majaʼ kkibʼij we jun tijoxel kux publicador no bautizado, rajawaxik qas kkilo che tajin kubʼan chi wariʼ:

1. 1) Ri tijoxel kukojo che ri Biblia are ri uTzij ri Dios (2 Tim. 3:16).

2. 2) Retaʼm chi ri nabʼe taq kʼutunem re ri Biblia y kubʼan pa ri ukʼaslemal. Kresaj ri urespuestas pa ri uTzij ri Dios y chupam ta ri kʼutunem re ri qastzij taj kojonem ni xaq uchomanik areʼ (Mat. 7:21-23; 2 Tim. 2:15).

3. 3) Kunimaj ri taqanik re ri Biblia che rajawaxik kojkʼojiʼ pa ronojel ri e riqbʼal ibʼ rukʼ ri utinamit ri Jehová we kuya kubʼano (Sal. 122:1; Heb. 10:24, 25).

4. 4) Retaʼm y kunimaj ri taqanik uyaʼom ri Biblia chrij ri mak junam rukʼ ri makunik kukʼ achijabʼ ixoqibʼ, ri kʼulanem kukʼ e kʼi winaq, ri jun achi che kuchʼabʼej jun rach achi o jun ixoq kuchʼabʼej jun rach ixoq y nikʼaj chi tzʼil taq mak. We junam ja e kʼo wi rukʼ jun winaq y kʼo urelaciones sexuales rukʼ, rajawaxik che qas kitzʼibʼam ri kikʼulanem chuwach ri qʼatbʼal tzij (Mat. 19:9; 1 Cor. 6:9, 10; 1 Tim. 3:2, 12; Heb. 13:4).

5. 5) Kunimaj ri taqanik chrij ri qʼabʼarik. Kutij ta kunabʼal che bʼim ta che rumal jun kunanel: weneʼ qʼayes, pastillas o nikʼaj chi uwach kunabʼal che kubʼan kʼax che ri ubʼaqil o ri uchomanik (2 Cor. 7:1; Efes. 5:18; 1 Ped. 4:3, 4).

6. 6) Kuchʼobʼo che rajawaxik kuxutuj ri e itzel taq achilanik (1 Cor. 15:33).

7. 7) Uyaʼom chi kan ronojel uwach achilanik kukʼ ri winaq o ri jastaq re ri qastzij taj kojonem ri xkʼojiʼ wi na. Kbʼe ta chi pa taq ri kiriqbʼal ibʼ o ri e nimaqʼij che kkibʼano (2 Cor. 6:14-18; Apoc. 18:4).

8. 8) Kunim ta ribʼ pa política (Juan 6:15; 15:19; Sant. 1:27).

9. 9) Kbʼe ta pa chʼoj che utoʼik uwiʼ ri tinamit che kel wi (Is. 2:4).

10. 10) Qastzij wi kraj kux testigo rech Jehová (Sal. 110:3).

⁹ We ri kʼamal bʼe kkilo che qas ta qʼalaj ri kubʼij ri tijoxel chrij jujun chke waʼ taq kʼutunem riʼ, rajawaxik kkitaʼ che ri kuchomaj. Kuya kkikoj ri textos che e tzʼibʼam rukʼ ri e kʼutunem. Nim ubʼanik che ri tijoxel kuchʼobʼo che ri kekachilaj ri testigos rech Jehová che utzijoxik ri utzij ri Dios rajawaxik che tajin chi kkibʼan pa ri kikʼaslemal ri kubʼij ri uTzij ri Dios. Ri kuya ubʼixik ri tijoxel keʼutoʼ ri e kʼamal bʼe rech kkilo we qas kuchʼobʼo jas ri rajawaxik kubʼan pa ri ukʼaslemal y we tajin chi kubʼan ronojel ri kajwatajik rech kkunik kux publicador no bautizado.

¹⁰ Ri e kʼamal bʼe rajawaxik aninaq kkibʼij che ri tijoxel we kbʼanik kux publicador no bautizado. Kkibʼilaʼ che are chiʼ kʼateʼ xetzijon rukʼ. We kbʼanik kux publicador, kkibʼij utz taq tzij che y che utz ri tajin kubʼan pa ri ukojonik (Rom. 15:7). Kkibʼij che che kkunik kel chi che utzijoxik ri utzij ri Dios y che chukʼisbʼal ri ikʼ kkunik kuya ri nabʼe rinforme. Xuqujeʼ kkiqʼalajisaj chuwach che are chiʼ kuya ri nabʼe rinforme, knojisax ri wuj Registro de publicador de la congregación pa ubʼiʼ y kyaʼ pa ri archivos re ri congregación. Ri e kʼamal bʼe kkitaʼ ronojel ri udatos ri tijoxel che ktzʼibʼax kan chupam ri formulario rumal kebʼ jastaq: rech ri utinamit ri Jehová kril ri chak che tajin kkibʼan ri testigos rech Jehová pa ronojel uwach Ulew y rech kyaʼ jujun taq eqeleʼn che ri tijoxel y ktoʼ pa ri ukojonik. Xuqujeʼ ri e kʼamal bʼe kkinaʼtasaj chke ri e kʼakʼ publicadores che ri kibʼiʼ, ri kijunabʼ o nikʼaj chi jastaq che ktzʼibʼaxik, kkoj junam rukʼ ri kubʼij pa ri «Política global de protección de datos personales de los testigos de Jehová», che kʼo pa ri qakʼolbʼal re internet jw.org.

¹¹ Qonojel rajawaxik qas kqetaʼmaj uwach ri kʼakʼ publicador y kojok il che ri ukojonik. Wariʼ kuya nim tobʼanik che, kuya uchuqʼabʼ rech amaqʼel kutzijoj ri utzij ri Dios y kunimarisaj más ri uchak che ri Jehová (Filip. 2:4; Heb. 13:2).

¹² Are chiʼ ri e kʼamal bʼe kkibʼij che ri tijoxel che kkun chik kel che utzijoxik ri utzij ri Dios, kkiya wajun wuj riʼ che. Are chiʼ ujachom chi ri nabʼe rinforme, kyaʼ ubʼixik pa ri congregación che publicador no bautizado chik.

ARE CHIʼ JUN AKʼAL KRAJ KUX TZIJOL UTZIJ RI DIOS

¹³ Ri akʼalabʼ xuqujeʼ kekunik kkitzijoj ri utzij ri Dios. Ri Jesús rukʼ utzilal xeʼukʼulaj y xeʼutewchij (Mat. 19:13-15; 21:15, 16). Ri kʼamal kibʼe ri akʼalabʼ are ri e kitat kinan, y ri utz kikʼutbʼal che utzijoxik ri utzij ri Dios keʼutoʼ rech kkaj kkipatanij ri Dios rukʼ ronojel kanimaʼ. Qastzij wi, qonojel ri oj kʼo pa ri congregación kqaj keqatoʼ ri akʼalabʼ che kkaj kkitzijoj ri utz taq jastaq re ri uQʼatbʼal tzij ri Dios rukʼ ronojel kanimaʼ. Are chiʼ jun akʼal che kʼo jun utz ubʼantajik kubʼij che kraj kutzijoj ri utzij ri Dios, ¿jas kkunik kubʼano rech kkʼiy más pa ri ukojonik?

¹⁴ Ri utat ri akʼal kubʼij che jun kʼamal bʼe re ri Comité re Servicio re ri Congregación we ri akʼal tajin kubʼan chi pa ri ukʼaslemal ri kukʼut ri Biblia rech kutzijoj ri utzij ri Dios. Ri jachal kichak ri jupuq kʼamal bʼe kubʼij chke e kebʼ kʼamal bʼe (jun chke are jun kʼamal bʼe re ri comité re servicio) che ketzijon rukʼ ri akʼal y rukʼ jun chke ri utat unan o ri e kebʼ che e cristianos, o ri tajin ktoʼw pa ri ukojonik. Kʼo kebʼ jastaq kkʼutuwik che ri akʼal tajin knimar ri ukojonik; ri nabʼe, are che kʼo chi retaʼmabʼal chrij ri nabʼe taq etaʼmanik re ri Biblia y ukabʼ, kukʼutu che qastzij kraj kel che utzijoxik ri utzij ri Dios. Are kʼu, ri e kʼamal taq bʼe xuqujeʼ kkinikʼoj rukʼ ri e kʼutunem che kkil rukʼ jun winaq che nim chi ujunabʼ, are kʼu rajawaxik taj ketzijon chrij ri jastaq che qas ta kuchʼobʼ jun akʼal. Are chiʼ kibʼanom chi wariʼ, kekunik kkilo we kuya kux publicador no bautizado ri akʼal (Luc. 6:45; Rom. 10:10).

¹⁵ Pa ri qʼij che ri akʼal kux publicador, ri e kʼamal bʼe kkibʼij che che utz ri tajin kubʼano rumal che tajin kkʼiy pa ri ukojonik y kkiya uchuqʼabʼ rech kchoman chrij ubʼanik uqasanjaʼ. Xuqujeʼ, kkibʼij chke ri utat unan che utz ri tajin kkibʼano rumal che kikojom ronojel kichuqʼabʼ che ukʼutik ri uTzij ri Dios chuwach. Xuqujeʼ, kkibʼij chke che kkisikʼij uwach ri sección «Jujun tzij chke ri e tat nan» (uxaq 179 kopan 181), chilaʼ kkiriq wi nikʼaj chi chomanik rech kkitaqej utoʼik ri kalkʼwal.

RI UJACHIK KʼASLEMAL CHE RI JEHOVÁ Y RI UBʼANIK QASANJAʼ

¹⁶ Paneʼ awetaʼm chi uwach ri Jehová y kaloqʼoqʼej chik, tajin kabʼan chi ri utaqanik pa akʼaslemal y tajin chi katzijoj ri utzij, rajawaxik kanimarisaj na ri awachilanik rukʼ. ¿Jas kabʼan che ubʼanik? Kajach ri akʼaslemal che y kabʼan ri aqasanjaʼ (Mat. 28:19, 20).

¹⁷ Pa ri kʼutunem che tajin kqanikʼoj, ri tzij ujachik kʼaslemal kraj kubʼij che ktas jun jastaq che uyaʼik uqʼij ri Dios. Kqajach ri qakʼaslemal che ri Dios are chiʼ kqabʼij che pa jun chʼawem che kqakoj ri qakʼaslemal che upatanexik y che amaqʼel kqanimaj ronojel ri utaqanik. Are chiʼ kqajach ri qakʼaslemal che tajin kqaya qatzij che uyaʼik uqʼij xaq xiw ri areʼ pa ronojel ri qakʼaslemal (Deut. 5:9). Wariʼ chqajujunal kqachaʼo, kʼo ta jun winaq kojtaqchiʼn che ubʼanik.

¹⁸ Xaq xiw ta rajawaxik kqabʼij che ri Jehová pa qachʼawem che kqaj kojux rech. Rajawaxik kqakʼut chkiwach konojel ri e winaq che qajachom chi ri qakʼaslemal che. ¿Jas kqabʼan che ukʼutik? Are chiʼ kqabʼan qaqasanjaʼ, junam rukʼ ri xubʼan ri Jesús (1 Ped. 2:21; 3:21). We qachomam chi upatanexik ri Jehová y kqaj kqabʼan qaqasanjaʼ, chojtzijon rukʼ ri jachal kichak ri e kʼamal bʼe. Ri areʼ kubʼij chke e kebʼ oxibʼ kʼamal taq bʼe che ketzijon qukʼ rech kkilo we tajin kqabʼan chi ri e taqanik y ri e pixabʼ re ri Biblia pa ri qakʼaslemal rech kqabʼan qaqasanjaʼ. Kqetaʼmaj más chrij wariʼ pa ri sección «Jujun taq tzij che ri kraj kubʼan uqasanjaʼ» (uxaq 182 kopan 184) y «Preguntas chke ri kkaj kkibʼan kiqasanjaʼ» (uxaq 185 kopan 207).

RI CRISTIANOS KKIYA JUN INFORME RE RI CHAK CHE KKIBʼANO

¹⁹ Sibʼalaj kekikot ri e kʼo pa ri utinamit ri Jehová are chiʼ kkito che nimarinaq chi ri chak re utzijoxik ri utzij ri Dios cho ronojel ri uwach Ulew. Ri Jesús xubʼij kanoq che ktzijox na ri utzij ri Dios pa ronojel ri uwach Ulew, rumal laʼ xumaj lo pa ri nabʼe siglo kʼa kimik, ri cristianos sibʼalaj e okinaq il che utzijoxik ri utzij ri Dios pa ronojel taq tinamit rech ktzʼaqat ri xubʼij kan ri Jesús (Mat. 28:19, 20; Mar. 13:10; Hech. 1:8).

²⁰ Ri nabʼe taq utijoxelabʼ ri Jesús sibʼalaj xekikotik are chiʼ xketaʼmaj che utz tajin kel ri utzijoxik ri utzij ri Dios (Mar. 6:30). Ri wuj re Hechos kubʼij chqe che kimulim kibʼ ciento veinte utijoxelabʼ ri Cristo are chiʼ xyaʼ ri uxlabʼixel pa kiwiʼ pa ri Pentecostés re ri junabʼ 33. Are chiʼ xa jubʼiqʼ tiempo qʼaxinaq xekʼiyar más, xeʼux oxibʼ mil, tekʼuriʼ xpaqiʼ ri kajilabʼal pa cinco mil. Ri Biblia kubʼij che «qʼij kʼut chi qʼij ri Ajawaxel keʼutiq che ri komon kojonelabʼ ri kekolotajik» «xuqujeʼ sibʼalaj e kʼi chke ri e kojol tabʼal toqʼobʼ [judíos] xeniman che ri kojonik» (Hech. 1:15; 2:5-11, 41, 47; 4:4; 6:7). ¿La katkun che uchomaxik ri nimalaj kikotemal xkinaʼ ri tijoxelabʼ are chiʼ xketaʼmaj che tajin kekʼiyar más ri cristianos? Qastzij riʼ che xuya kichuqʼabʼ rech xkitzijoj más ri utzij ri Dios paneʼ xetereneʼx rukʼ itzelal kumal ri e kʼamal taq bʼe kech ri judíos.

²¹ Pa ri carta che xutaq bʼi ri Pablo chke ri cristianos colosenses (pa ri junabʼ 60-61), xubʼij che ri utz taq jastaq re ri uQʼatbʼal tzij ri Dios tajin «kkʼiyik xuqujeʼ kuya uwachinik» y che tajin ktzijox pa «ronojel kʼolbʼal cho ri uwach ulew» (Col. 1:5, 6, 23). Ri nabʼe cristianos xkinimaj ri uTzij ri Dios, y xyaʼ kichuqʼabʼ rumal ri uxlabʼixel rech kkibʼan wajun nimalaj chak are chiʼ xa jubʼiqʼ chi kraj kopan ri kʼisbʼal re ri sistema judío, pa ri junabʼ 70. Jumul chik, ri xyaʼ ubʼixik chrij ri chak che tajin kbʼanik, sibʼalaj xuya kichuqʼabʼ ri sukʼ taq cristianos pa ri tiempo riʼ.

²² Kimik, ri utinamit ri Jehová xuqujeʼ kutzʼibʼaj ronojel ri tajin kbʼan che utzʼaqatisaxik ri kubʼij pa Mateo 24:14, chilaʼ kubʼij: «We utzalaj taq tzij riʼ re ri rajawibʼal ri Dios ktzijox na pa ronojel ri uwach ulew. Jeriʼ kqʼalajisax ri utzalaj taq tzij chkiwach konojel nimaʼq taq tinamit ri kʼo cho ronojel ri uwach ulew. Kʼateʼ riʼ, kpe ri kʼisbʼal». Ri Jehová kubʼano che kkʼis ubʼanik wajun chak che nim ubʼanik. Are kʼu, we ri qajachom chi qakʼaslemal che ri Jehová, kqaj kojqaj chuwach, rajawaxik kqakoj ronojel qachuqʼabʼ rech kqatzijoj ri utzij rumal che naqaj chi kʼo wi ri kʼisbʼal (Ezeq. 3:18-21).

¿JAS KQATZʼIBʼAJ PA RI INFORME RE UTZIJOXIK RI UTZIJ RI DIOS?

²³ Ri wuj Informe re predicación kukʼut chqawach jas taq rajawaxik kqatzʼibʼaj chupam. Are kʼu, nim kojkitoʼ wi ri jujun taq chomanik che e kʼo pa ri párrafos che kqil chanim.

²⁴ Pa ri columna «E wuj (impresas xuquje electrónicas)», chilaʼ kqatzʼibʼaj wi jampaʼ wuj ri xqaya o xqataq chke ri winaq che kibʼanom ta kiqasanjaʼ. Pa «Videos xakʼutu», kqatzʼibʼaj jampaʼ mul xqakʼut apachike chke ri qavideos.

²⁵ Kqatzʼibʼaj che xqabʼan jun solinik are chiʼ kqasolij chi jumul jun winaq che Testigo taj, rumal che kqaj kretaʼmaj más chrij ri uTzij ri Dios. Are jun solinik are chiʼ kqasolij chi jumul jun winaq, kqatzʼibʼaj bʼi jun carta che, kqachʼabʼej apan pa teléfono, ktaq bʼi jun mensaje o jun correo electrónico, o are chiʼ kqaya kan jun wuj che. Are chiʼ kqaya jun etaʼmanik re ri Biblia xuqujeʼ kqatzʼibʼaj jun solinik. Pa ri familias che e kʼo akʼalabʼ che kibʼanom ta kiqasanjaʼ, ri tat o ri nan che kbʼanow ri qʼijilanik pa ri familia, kkunik kutzʼibʼaj xa jun solinik ronojel semana.

²⁶ Paneʼ ronojel semanas kyaʼ etaʼmanik re ri Biblia che jun tijoxel, ri Testigo xa jun etaʼmanik re ri Biblia kutzʼibʼaj pa jun ikʼ. Are kʼu we e kʼo kebʼ oxibʼ winaq che kuya etaʼmanik chke, kkunik kutzʼibʼaj kebʼ oxibʼ pa jun ikʼ. ¿Jas etaʼmanik re ri Biblia rajawaxik kutzʼibʼaj ri Testigo? Are ri tajin kyaʼ chke ri winaq che kibʼanom ta kiqasanjaʼ, ri e qachalal inactivos (are kbʼan ri pixabʼ che kuya jun kʼamal bʼe re ri comité re servicio) o jun qachalal che kʼateʼ xubʼan uqasanjaʼ che ukʼisom ta ri wuj ¡Jun kʼaslemal che kʼo ta ukʼisik!

²⁷ Pa ri columna «Horas», kqatzʼibʼaj ri tiempo che xqatzijoj ri utzij ri Dios chuchiʼ taq ja, are chiʼ xqabʼan jun solinik, xqaya jun etaʼmanik re ri Biblia, xqatzijoj ri utzij ri Dios che jun winaq chiʼ tajin kojwakatik o tajin kojchakunik. Nim ubʼanik che tzʼaqat ri tiempo kqatzʼibʼaj. Are chiʼ e kebʼ qachalal junam kkitzijoj ri utzij ri Dios, kkitzʼibʼaj ri tiempo che xkibʼano, are kʼu xa jun ktzʼibʼan ri solinik y ri etaʼmanik re ri Biblia che xkiyaʼo. Ri qʼijilanik re ri familia che kkibʼan ri tat nan, kekunik kkitzʼibʼaj jun hora ronojel semana. Ri e yaʼol chʼabʼal pa ri congregación kekunik kkitzʼibʼaj ri tiempo che xkiya ri chʼabʼal. Xuqujeʼ ri e qachalal che kkiqʼaxej ri chʼabʼal che kyaʼ pa ri congregación pa jun chi chʼabʼal, kekunik kkitzʼibʼaj ri tiempo. Are kʼu, kqatzʼibʼaj ta ri tiempo are chiʼ tajin kqatijoj qibʼ che ri kqabʼan che utzijoxik ri utzij ri Dios y ri tiempo che kqabʼan bʼik rech kojopan pa ri riqbʼal ibʼ re utzijoxik utzij ri Dios, o tajin kqabʼan jun jastaq che xaq qech wi oj o jun chi jastaq che kʼo ta ubʼanik rukʼ ri utzijoxik ri utzij ri Dios.

²⁸ Are chiʼ kqatzʼibʼaj ri tiempo pa ri informe, rajawaxik kqabʼan ri kubʼij ri retaʼmabʼal qakʼuʼx che qatijom rukʼ ri Biblia. Ri e tinamit che ktzijox wi ri utzij ri Dios, junam ta kibʼanik. Kʼo jujun che sibʼalaj e kʼi winaq e kʼo chupam, are kʼu e kʼo chi jujun qas ta e kʼi winaq e kʼolik y rajawaxik naj kebʼin ri e qachalal. Xuqujeʼ jalan ri kkibʼan ri e qachalal che rajilaxik ri tiempo che kkitzʼibʼaj. Ri jupuq Ajkʼamal bʼe cho ronojel uwach Ulew kubʼij ta chqe jas kqabʼan che rajilaxik ri tiempo che kqakoj che utzijoxik ri utzij ri Dios, xuqujeʼ uyaʼom ta taqanik che jun winaq rech kubʼij chqe jampaʼ tiempo kqatzʼibʼaj (Mat. 6:1; 7:1; 1 Tim. 1:5).

²⁹ Rajawaxik xaq xiw kqatzʼibʼaj ri horas pa ri informe, ri minutos kqatzʼibʼaj taj. Are kʼu e kʼo jujun qachalal kekunik kkitzʼibʼaj paneʼ xa quince minutos xkitzijoj ri utzij ri Dios pa jun ikʼ, junam kukʼ ri nim chi kijunabʼ, kiriqom jun nimalaj yabʼil, e qajinaq chuwach kisok, kekun taj keʼel bʼi pa ri kachoch, o ri e kʼo pa ri e ja che kechajix wi nimaʼq taq winaq. Jeriʼ, kekunik kkitaqej ubʼanik ri kichak che ri Jehová. Xuqujeʼ kekunik kkibʼan wariʼ ri e yawabʼ, ri e qʼajinaq, ri e sokotajinaq o ri kiriqom jun chi jastaq che kuya ta bʼe chke keʼel bʼi pa ri kachoch pa jun ikʼ o más. Kekunik kkibʼan wariʼ ri e qachalal che qastzij wi kekun taj keʼel che utzijoxik ri utzij ri Dios. Are ri comité re servicio re ri congregación kilowik jachin taq ri e qachalal kyaʼ wajun tobʼanik chke.

RI WUJ REGISTRO DE PUBLICADOR DE LA CONGREGACIÓN

³⁰ Ronojel ri kqatzʼibʼaj pa ri informe ktzʼibʼax pa ri wuj Registro de publicador de la congregación. Ronojel waʼ taq wuj riʼ pa ubʼiʼ ri congregación kyaʼ wi. Are chiʼ kqakʼex ri qacongregación, rajawaxik kqabʼij chke ri e kʼamal bʼe. Ri secretario kutaq bʼi ri qawuj pa ri congregación che kojbʼe wi. Rukʼ wariʼ, ri e kʼamal bʼe utz qakʼulaxik kkibʼano y kojkichajij pa ri qakojonik. Are kʼu, we kqʼax ta che oxibʼ ikʼ che kojkʼojiʼ pa jun chi congregación, kqataq ri qinforme pa ri qacongregación.

¿JASCHE KQATZʼIBʼAJ RI CHAK CHE KQABʼANO?

³¹ ¿La kʼo jujun mul ksach chqe kqaya ri qinforme? Qonojel rajawaxik knaʼtasax chqe. Are kʼu, ksach ta riʼ chqe we kqachʼobʼo jasche rajawaxik kqayaʼo.

³² E kʼo jujun kkichomaj jasche rajawaxik kqaya jun informe we ri Jehová retaʼm ronojel ri kqabʼano. Qastzij wi che retaʼm, xuqujeʼ krilo we rukʼ ronojel qanimaʼ kqapatanij o xa jubʼiqʼ ri kqaya che. Are kʼu chnaʼtaj chqe che ri Dios xutzʼibʼaj kan kʼi jastaq chrij ri kichak ri upatanelabʼ. Pa ri Biblia kqetaʼmaj jampaʼ qʼij xukoj ri Noé che ubʼanik ri nimalaj jukubʼ, jampaʼ junabʼ xebʼin ri israelitas pa ri desierto, e jampaʼ xkiya ta kan upatanexik ri Jehová y e jampaʼ xkiya kanoq. Xutzʼibʼaj ri xbʼan che uchʼakik ri ulew re Canaán y ri jalajoj taq jastaq che xkibʼan ri e qʼatal taq tzij re Israel. Rukʼ wariʼ kqʼalajinik che ri Jehová nim ubʼanik chuwach che ktzʼibʼax ronojel ri chak che kbʼanik.

³³ Ronojel ri e kʼutbʼal che e kʼo pa ri Biblia kukʼutu che chkiwach ri ojer upatanelabʼ ri Dios nim ubʼanik che xkitzʼibʼaj kan ronojel ri jastaq che xkʼulmatajik. Kʼi taq mul, ri xetzʼibʼax kanoq kojutoʼo rech qas kqachʼobʼ ronojel ri xkʼulmatajik. Wariʼ are jujun chke ri e kʼutbʼal: Génesis 46:27; Éxodo 12:37; Jueces 7:7; 2 Reyes 19:35; 2 Crónicas 14:9-13; Juan 6:10; 21:11; Hechos 2:41; 19:19.

³⁴ Are chiʼ ri apóstoles xetzalij lo che utzijoxik ri utzij ri Dios, xkibʼij che ri Jesús «ronojel ri xkibʼano xuqujeʼ ronojel ri tijonik ri xkiya chke ri winaq» (Mar. 6:30). Qastzij che pa ri qinformes kqʼalajin ta ronojel ri chak che kqabʼan che upatanexik ri Jehová, are kʼu ri kqatzʼibʼaj nim upatan che ri utinamit. Rukʼ wariʼ kilik jas jastaq re ri utzijoxik ri utzij ri Dios rajawaxik kbʼan más utz che. Ri números kukʼutu jas jastaq utz tajin kelik y jas jastaq rajawaxik ksukʼumaxik (jun kʼutbʼal, ri chak tajin kbʼanik rech kekʼiyar ri Testigos). Weneʼ rajawaxik kyaʼ kichuqʼabʼ ri e qachalal o ksukʼumax jujun taq kʼax. Ri solinelabʼ re circuito kkilo jas kajwatajik y kekitoʼ ri e qachalal chuwach taq ri kʼax che tajin kkiriqo, y kekitoʼ jujun chke ri e qachalal o konojel ri e kʼo pa ri congregación rech kekʼiy más pa ri kikojonik.

³⁵ Rumal ri informes, ri utinamit ri Jehová kkunik krilo jawiʼ kajwataj wi más ri kitobʼanik ri e qachalal che utzijoxik ri utzij ri Dios, jas taq tinamit keriqitaj wi ri e winaq che kkaj kketaʼmaj más chrij ri Biblia y jas taq tinamit ri qas ta nimarinaq wi ri chak. Xuqujeʼ ri utinamit ri Jehová krilo jas taq wuj kajwataj che kitijoxik ri e winaq rech kbʼan más wuj che kitoʼik pa ronojel ri uwach Ulew.

³⁶ ¿La mat qastzij che sibʼalaj kuya qachuqʼabʼ retaʼmaxik ri tajin kbʼan che utzijoxik ri utzij ri Dios pa nikʼaj chi tinamit re ri uwach Ulew? Ri informes kojkitoʼo rech kqetaʼmaj jas tajin kbʼan che unimarisaxik ri chak pa ri utinamit ri Jehová, y ri utz taq jastaq che kikʼulmam ri e qachalal kuya qachuqʼabʼ rech rukʼ ronojel qanimaʼ kqatzijoj ri utzij ri Dios (Hech. 15:3). Qastzij wi che nim ubʼanik che kqaya ri qinforme re utzijoxik ri utzij ri Dios. Paneʼ qas ta nim kilitajik, kukʼutu che kel qakʼuʼx chke konojel ri e qachalal y che kqaya qibʼ pa taqik pa uqʼabʼ ri utinamit ri Jehová (Luc. 16:10; Heb. 13:17).

CHQAKOJOʼ QAMETAS

³⁷ Utz taj we kqajunamisaj qibʼ kukʼ ri e nikʼaj chik, rumal che jalajoj ri kojriqitaj wi chqajujunal (Gál. 5:26; 6:4). Ri utz che kqabʼano are che kqakoj qametas che kojkun che ubʼanik, rumal che kojkitoʼ che rilik we tajin kqanimarisaj ri qachak che utzijoxik ri utzij ri Dios. Xuqujeʼ, are chiʼ kqabʼan ri metas che xqakojo kojutoʼo rech kqanaʼo che kʼo tajin kqabʼano.

³⁸ Qas qʼalaj che ri Jehová tajin kubʼano che e kʼi winaq keʼok pa ri utinamit y che kekunik kekʼasiʼ kan pa «ri nimalaj kʼaxkʼolil». Kimik tajin chi kkʼulmataj ri xutzʼibʼaj kan ri qʼaxal tzij Isaías: «We chʼutinalaj jumuqʼ riʼ kkʼiyar na pa jun mil; we kebʼ oxibʼ riʼ keʼux na jun nimalaj [...] tinamit. In riʼ ri Ajawaxel, kinbʼan na chi kbʼantaj waʼ chanim qas pa ri uqʼijol» (Apoc. 7:9, 14; Is. 60:22). Are jun nimalaj tewchibʼal che oj tzijol utzij ri Dios pa waʼ taq qʼij riʼ (Mat. 24:14).