Kʼisbʼal taq pixabʼ chke ri kkibʼan kiqasanjaʼ

Ri qasanjaʼ kebʼan pa ri nimaʼq taq riqbʼal ibʼ kech ri testigos rech Jehová. Are chiʼ kkʼis ri chʼabʼal re ri qasanjaʼ, ri yaʼol chʼabʼal kubʼij chke ri kkibʼan kiqasanjaʼ che ketakʼiʼk y rukʼ ko chʼabʼal kkiya ri urespuestas ri e kebʼ preguntas riʼ:

1. ¿La ayaʼom kan ri amak, ajachom chi ri akʼaslemal che ri Jehová y la kakojo che are ri Jesucristo kojom rumal ri Dios rech kekolotaj ri winaq?

2. ¿La kachʼobʼo che are chiʼ kabʼan aqasanjaʼ kakʼut chkiwach konojel che at testigo rech Jehová chik y che at jun chi pa ri utinamit ri Dios?

Are chiʼ ri kkibʼan kiqasanjaʼ kkibʼij «jeʼ» che ri kirespuestas, kkibʼan jun «qʼalajisanik» chkiwach konojel che kekojon chrij ri tojbʼal mak che xuya ri Jesús y che qas kijachom chi ri kikʼaslemal che ri Jehová (Rom. 10:9, 10). Are kʼu, rajawaxik kibʼanom chi kichʼawem y e chomanaq chi chrij ri preguntas riʼ rech qas kkibʼij ri kʼo pa kanimaʼ.

¿La abʼanom chi jun chʼawem re ujachik ri akʼaslemal che ri Jehová y la abʼim chi che che xaq xuwi ri areʼ kaya uqʼij y che ri más nim ubʼanik chawach are ubʼanik ri kraj?

¿La qastzij wi kawaj kabʼan aqasanjaʼ pa ri nim riqbʼal ibʼ che kʼo chi naqaj?

¿Jas atzʼyaq rajawaxik kukoj jun winaq are chiʼ kubʼan uqasanjaʼ? (1 Tim. 2:9, 10; Juan 15:19; Filip. 1:10).

Ri e cristianos, rajawaxik «utz katzʼiʼaqixik kibʼ kkibʼano, rukʼ jikomal», jeriʼ kkikʼutu che «kkiqʼijilaj ri Dios». Rumal laʼ, ri kkibʼan kiqasanjaʼ kkikoj ta atzʼyaq che e nitzʼaq chke, ni ri atzʼyaq che kʼo tzʼibʼam o kʼo wachbʼal chuwach. Ri atzʼyaq che kkichaʼ ukojik rajawaxik chʼajchʼoj, utz kkaʼyik y taqalik che kkoj pa wajun qʼij riʼ.

¿Jas utz taj kubʼan jun winaq are chiʼ tajin kubʼan uqasanjaʼ? (Luc. 3:21, 22).

Ri uqasanjaʼ ri Jesús are jun kʼutbʼal chke ri cristianos. Areʼ retaʼm che are jun bʼantajik nim ubʼanik, y xukʼut wariʼ rukʼ ronojel ri xubʼano. Rumal laʼ, ri kebʼan wi ri e qasanjaʼ are ta kʼolbʼal che ubʼanik etzʼanem, muxanik o ubʼanik nikʼaj chik jastaq che kubʼano che nim ta chi kil ri ubʼanik ri qasanjaʼ. Xuqujeʼ utz taj che jun winaq che kʼateʼ xubʼan uqasanjaʼ kubʼano che jetaneʼ xuchʼak jun nimalaj jastaq. Qastzij che are jun qʼij che sibʼalaj kuya kikotemal, are kʼu rajawaxik che utz ukʼutik ri kikotemal kbʼanik.

Rech katkunik kabʼan ri xatzujuj che ri Jehová, ¿jas tobʼanik kkiya ri e riqbʼal ibʼ y ri kachilaxik ri e qachalal chawe?

¿Jasche rajawaxik che are chiʼ abʼanom chi ri aqasanjaʼ qas kʼo jun utz ahorario che unikʼoxik ri Biblia y che utzijoxik ri utzij ri Dios?

PIXABʼ CHKE RI E KʼAMAL BʼE

Are chiʼ jun publicador kubʼij che kraj kubʼan uqasanjaʼ, rajawaxik kibʼij che che nojimal kusikʼij uwach ri preguntas re ri uxaq 185 kopan 207 che kʼo pa ri wuj riʼ y che kusikʼij ri sección «Jujun taq tzij che ri kraj kubʼan uqasanjaʼ» (uxaq 182). Chilaʼ kubʼij wi jas kubʼan ri publicador rech kutijoj ribʼ chrij ri preguntas che kbʼan che kumal ri e kʼamal bʼe. Xuqujeʼ, chilaʼ kubʼij che ri publicador kkunik kujaq wajun wuj riʼ y kril ri utzʼibʼam chupam. Rajawaxik taj che kʼo jun ktowik are chiʼ kutijoj ribʼ chrij ri preguntas.

Ri winaq che kraj kubʼan uqasanjaʼ, rajawaxik kubʼij che ri jachal kichak ri jupuq kʼamal bʼe re ri congregación. Are chiʼ qʼaxinaq chi kebʼ oxibʼ qʼij che ri winaq utijom chi ribʼ rukʼ ri «Preguntas chke ri kkaj kkibʼan kiqasanjaʼ», ri jachal kichak ri e kʼamal bʼe kutaʼ che ri winaq we ujachom chi ri ukʼaslemal che ri Jehová pa jun chʼawem y we ubʼim chi che che kubʼan ronojel ri kraj. We kubʼij che ubʼanom chik, ri jachal kichak ri e kʼamal bʼe kubʼij chke kebʼ kʼamal bʼe (chkijujunal kkibʼan jun chke ri uchʼaqapil) che kkinikʼoj ri preguntas rukʼ ri publicador. Rajawaxik taj keyeʼx na che kbʼixik jampaʼ ri fecha re ri nim riqbʼal ibʼ.

Chkijujunal ri secciones rajawaxik kbʼan pa jun hora, tekʼuriʼ kuya kkoj más tiempo we rajawaxik. Rajawaxik che kbʼan chʼawem are chiʼ kmajixik y are chiʼ kkʼisik. Rajawaxik taj aninaq kbʼan wariʼ rumal ri kʼamal bʼe ni ri publicador. Ri e kʼamal bʼe che xechaʼ che ubʼanik ri preguntas rajawaxik kkeyeʼj ta na che kqʼax kʼi qʼij rech kkimulij kibʼ rukʼ ri winaq.

Ri más utz, are che pa kijujunal ri publicadores kbʼan ri preguntas chke. Je wariʼ ri e kʼamal bʼe kekunik kkita ri kubʼij ri publicador chrij ri preguntas y kkilo jampaʼ chi kuchʼobʼ chrij ri qastzij y we kkun chik kubʼan uqasanjaʼ. Xuqujeʼ, weneʼ rukʼ wariʼ ri publicador qas ta kʼax kubʼan che ubʼixik ri kuchomaj y ri kunaʼo. Ri e kʼulan chik, kuya junam kbʼan ri preguntas chke.

We jun ixoq ri kraj kubʼan uqasanjaʼ, ri e kʼamal bʼe rajawaxik kkimulij kibʼ rukʼ jawiʼ e kʼo wi winaq keʼilowik are kʼu ktataj ta ri kkibʼij. We rajawaxik rumal ri sección che knikʼoxik, ri kbʼanow ri preguntas kuya kachilax bʼi rumal jun chi kʼamal bʼe o jun tobʼanel.

Pa ri congregaciones che e kʼo ta kʼi kʼamal bʼe, utz kekoj tobʼanelabʼ che qas kenaw che ubʼanik ri keqeleʼn xuqujeʼ utz kichomanik rech kkibʼan ri preguntas re ri sección «E kʼutunem che kekojon ri cristianos chrij» (nabʼe chʼaqapil). E kʼamal bʼe kekoj che unikʼoxik ri ukabʼ chʼaqapil, ubʼiʼ «Ri rajawaxik kkibʼan ri cristianos pa kikʼaslemal». Are kʼu we pa ri congregación e kʼo ta kʼi qachalal che kekunik kkibʼan ri chak riʼ, kuya kbʼix che ri solinel re circuito rech kutaʼ tobʼanik chke ri e kʼamal bʼe re ri congregaciones che e kʼo naqaj.

We majaʼ ujunabʼ ri kraj kubʼan uqasanjaʼ, ri e utat unan che e Testigos rajawaxik kekʼojiʼ rukʼ are chiʼ kbʼan ri preguntas che. Are kʼu we kuya taj kbʼan wariʼ, kebʼ kʼamal bʼe (o jun kʼamal bʼe y jun tobʼanel, we jeʼ kutaʼ ri sección che kilik) kkinikʼoj na ri preguntas rukʼ.

Ri e kʼamal bʼe rajawaxik kkilo che ri publicador che kraj kubʼan uqasanjaʼ kʼo chi retaʼmabʼal chrij ri nabʼe taq etaʼmanik re ri Biblia. Xuqujeʼ, rajawaxik che kkilo che qas kuloqʼoqʼej ri qastzij y kukʼutu che nim kril wi ri utinamit ri Jehová. Are kʼu we ri kraj kubʼan uqasanjaʼ kuchʼobʼ ta ri nabʼe taq etaʼmanik re ri Biblia, ri e kʼamal bʼe kkilo che kyaʼ tobʼanik che rech kkunik kubʼan uqasanjaʼ pa jun chi nim riqbʼal ibʼ. Kʼo jujun taq mul, weneʼ ri publicador rajawaxik más tiempo che rech kukʼutu che nim kril wi ri utzijoxik ri utzij ri Dios y kniman che ri e taqanik re ri utinamit ri Jehová. Are ri e kʼamal bʼe kechaʼowik jampaʼ tiempo kkikoj che rilik ri preguntas rech qas kkilo we ri winaq kuya kubʼan uqasanjaʼ. Are kʼu rajawaxik kkinikʼoj ronojel ri preguntas.

Are chiʼ kkʼis rilik ri ukabʼ chʼaqapil, ri e kʼamal bʼe che xkibʼan ri preguntas che ri publicador kkimulij kibʼ rukʼ rech kkilo we kkunik kubʼan uqasanjaʼ. Rajawaxik kechoman chrij we xkʼojiʼ pa jun tijobʼal o xkʼojiʼ taj, ri kkun che ubʼanik y nikʼaj chi jastaq. Ri kqaj are che qas kuloqʼoqʼej ri Jehová rukʼ ronojel ranimaʼ y che retaʼm chi ri nabʼe taq etaʼmanik re ri Biblia. Rumal ri utzalaj tobʼanik che kiya chke ri kkibʼan kiqasanjaʼ, utz kkibʼan riʼ che utzijoxik ri utzalaj taq jastaq re ri uQʼatbʼal tzij ri Dios.

Tekʼuriʼ, jun o kebʼ chke ri e kʼamal bʼe che xebʼanow ri preguntas che ri publicador kkimulij kibʼ rukʼ rech kkibʼij che we kkunik kubʼan uqasanjaʼ. We kuya kubʼan uqasanjaʼ, kkinikʼoj rukʼ ri sección «Kʼisbʼal taq pixabʼ chke ri kkibʼan kiqasanjaʼ» (uxaq 206 y 207). Are kʼu we majaʼ kukʼis ri retaʼmanik rukʼ ri wuj Kʼaslemal kʼo ta ukʼisik, kkibʼij che che kukʼiso are chiʼ ubʼanom chi ri uqasanjaʼ. Kkiya ubʼixik che che ri qʼij che xubʼan ri uqasanjaʼ ktzʼibʼax pa ri formulario Registro de publicador de la congregación. Kkinaʼtasaj che che ri e kʼamal bʼe kkitaʼ ronojel ri udatos che ktzʼibʼax kan chupam ri formulario rumal kebʼ jastaq: rech ri utinamit ri Jehová kril ri chak che tajin kkibʼan ri testigos rech Jehová pa ronojel uwach Ulew y rech kyaʼ jujun taq eqeleʼn che ri tijoxel y ktoʼ pa ri ukojonik. Xuqujeʼ ri e kʼamal bʼe kkinaʼtasaj chke ri e kʼakʼ publicadores che ri kibʼiʼ, ri kijunabʼ o nikʼaj chi jastaq che ktzʼibʼaxik, kkoj junam rukʼ ri kubʼij pa ri «Política global de protección de datos personales de los testigos de Jehová», che kʼo pa ri qakʼolbʼal re internet jw.org. Ri riqbʼal ibʼ riʼ rajawaxik xa diez minutos kuchʼijo.

Are chiʼ qʼaxinaq chi jun junabʼ che ri publicador ubʼanom chi ri uqasanjaʼ, kebʼ kʼamal bʼe ketzijon rukʼ rech kkiya uchuqʼabʼ y jujun taq pixabʼ che. Jun chke ri kʼamal bʼe are ri kʼamal bʼe re grupo. Are kʼu we ri publicador kʼa majaʼ na ri ujunabʼ, rajawaxik che kekʼojiʼ ri utat unan che e Testigos. Ri e kʼamal bʼe rukʼ utz taq tzij kkichʼabʼej ri winaq rech kuxeʼj ta ribʼ. Kkibʼij ri ubʼanom chi che unimarisaxik ri ukojonik y kkibʼij ri kubʼano rech kuya ta kan utijoxik ribʼ pa utukel, ri usikʼixik ri Biblia ronojel qʼij, ri qʼijilanik pa ri familia, y rech amaqʼel kbʼe pa ri e riqbʼal ibʼ y kel che utzijoxik ri utzij ri Dios ronojel taq semanas (Efes. 5:15, 16). We majaʼ kukʼis ri retaʼmanik rukʼ ri wuj Kʼaslemal kʼo ta ukʼisik, ri e kʼamal bʼe kkitaʼ toqʼobʼ che jun qachalal rech kukʼis rukʼ. Xaq xiw rajawaxik kpixbʼex che jujun taq jastaq. Ri más rajawaxik are che qas pa kanimaʼ kel wi lo ri kkibʼij rech kkiya uchuqʼabʼ.