¿La awetaʼm?

¿Jas utzilal xuya chke ri israelitas che ri Jehová xuya bʼe chke kkiya tukumux y palomax?

RI TAQANIK che xyaʼ che ri Moisés kubʼij che ri Jehová xuya bʼe che ri israelitas kkiya tukumux (tórtolas) y palomax che sipanik. Amaqʼel junam kyaʼ ubʼixik ri e kebʼ chikop riʼ pa taq ri taqanik re ri sipanik che xkiya ri israelitas ojer. Ri israelitas xekunik xkiya jun chke ri e chikop riʼ, jun palomax o jun tukumux (Lev. 1:14; 12:8; 14:30). Sibʼalaj utz wariʼ chke ri israelitas rumal che amaqʼel taj keriqitaj ri tukumux. Chqilampeʼ jasche.

Ri tukumux are alaj taq chikop che kekʼojiʼ pa Israel are chiʼ kubʼan qʼaqʼ. Pa ri ikʼ octubre, ri alaj taq chikop riʼ kebʼe pa nikʼaj chi tinamit jawiʼ kubʼan wi más qʼaqʼ y ketzalij chi lo pa Israel chiʼ kekotzʼijan konojel ri tikoʼn (Cant. 2:11, 12; Jer. 8:7). Rumal laʼ are chiʼ kubʼan tew o kubʼan jabʼ, ri israelitas kʼax kkibʼan che kiriqik ri tukumux.

Are kʼu, ri alaj taq palomax kebʼe ta pa nijun lugar rumal laʼ keriqitaj pa Israel ronojel tiempo. Xuqujeʼ ri alaj taq chikop riʼ xaq cho ja kkaj kekʼojiʼ wi (chajunamisaj rukʼ Juan 2:14, 16). Jun wuj kubʼij che pa ronojel ri alaj taq tinamit «ri e winaq kekikʼiyisaj ri palomax cho taq kachoch. Konojel ri ja bʼanom alaj taq jul che rech kekʼojiʼ ri alaj taq chikop riʼ chupam» (chajunamisaj rukʼ Isaías 60:8).

¿Jas kukʼut wariʼ chqawach chrij ri Jehová? Che ri areʼ are jun Dios che kloqʼoqʼenik y kuchʼobʼ ri keriqitaj wi ri winaq, rumal che xubʼij chke ri israelitas che kekunik kkiya che sipanik ri alaj taq chikop che más keriqitajik.