Jas täq kqabʼano rech kqetamaj uwäch ri Ajawaxel

We kqaj kqetamaj uwäch ri Jehová rajawaxik kqasikʼij uwäch ri Loqʼalaj Pixabʼ. Ri Ajawaxel xuchaʼ nikʼaj achijabʼ ojer rech kketzʼibʼaj täq unojibʼäl che xubʼijla chike. Ri tzʼibʼanik etaʼm uwäch che are ri Loqʼalaj Pixabʼ. Kimik kojkunik kqachʼobʼ uwäch ri Ajawaxel chiʼ kqasikʼij uwäch ri Loqʼalaj Pixabʼ. Wa jun wuj kʼo ri utzij xuqujeʼ unoʼjibʼäl ri Jehová chupam, rumal laʼ kbʼix utzij ri Ajawaxel che. Kojkun che ukojik jas kubʼij ri Loqʼalaj Pixabʼ rumal che ri Jehová kkun täj kubʼan molon täq tzij. «Dios man kkun täj kubʼan [molon täq] tzij.» (Hebreos 6:18.) Jewaʼ riʼ qetaʼm, che ri Utzij ri Ajawaxel are ri qastzij kʼo chupam (Juan 17:17).

Ri Loqʼalaj Pixabʼ, are jun nimalaj sipanik uyaʼom ri Ajawaxel chaqe. Junam rukʼ jun wuj che kutzʼibʼaj jun utzalaj tat chike ralkʼwal. Ri Ajawaxel kutzujuj chupam, che kubʼan sibʼalaj utz che ruwäch Ulew rech kojkʼaseʼ chuwäch, wariʼ kqabʼij jun Kotzʼiʼjalaj Ulew (Paraíso) che. Kubʼij chqe jas xubʼan ojer, jas kubʼan wachanim xuqujeʼ jas kubʼan na chike ri utz täq ralkʼwal. Kojutoʼ che ri kʼäx pa täq qanimaʼ xuqujeʼ rech kqariq ri kikotemal (2 Timoteo 3:16, 17).

Ri qʼalajsinelibʼ (testigos) rech Jehová e rachiʼl ri Ajawaxel xuqujeʼ katkitoʼ na che uretaʼmaxik jas täq kukʼut ri Loqʼalaj Pixabʼ. Xiw kabʼij chike che kawaj katijosaj awibʼ che ri Loqʼalaj Pixabʼ. Katoj täj rech kkekʼut chawäch (Mateo 10:8). Xuqujeʼ katkunik katbʼe pa täq kiriqbʼal ibʼ. Wa täq riqbʼal ibʼ kbʼan chupam täq Ja rech Ajawbʼäl (Salón del Reino). We katbʼe pa riqbʼal ibʼ, chanim kanimarisaj na awetaʼmabʼäl chirij ri Ajawaxel.

Kojkunik kqetamaj uwäch ri Ajawaxel, we kojchoman puwiʼ ronojel ubʼanom. Ri Loqʼalaj Pixabʼ kubʼij che: «Dios xubʼan ri kaj [xuqujeʼ ri] ulew» (Génesis 1:1). Chiʼ ri Jehová xubʼan «ri kaj», xuqujeʼ xubʼan ri Qʼij. Rumal laʼ, ¿ Jas kubʼij wariʼ che ri Ajawaxel? Kraj kubʼij che nim uchuqʼabʼ ri Jehová. Xiw areʼ xkun che ubʼanik ri nimalaj Qʼij. Xuqujeʼ kukʼut che qawäch che nim uretaʼmabʼäl ri Jehová, rumal xukoj uretaʼmabʼäl rech xubʼan ri Qʼij, che kuyaʼla usaqil xuqujeʼ ri uqʼaqʼil chaqe che kchup täj.

Ri ubʼanom ri Jehová kukʼutu che kojuloqʼoqʼej. Chomajampeʼ ri jalajoj uwäch täq cheʼ che e kʼo cho ruwäch Ulew. Wat xraj ri Jehová, xat jun uwäch cheʼ xuyaʼ chaqe, weneʼ kʼot xuyaʼ chaqe. Wariʼ kukʼutu che ri Jehová kojuloqʼoqʼej xuqujeʼ kʼo jun sipanelalaj ukʼuʼx, rumal waʼ uyaʼom ronojel täq uwäch cheʼ chaqe, ronojel unimal xuqujeʼ ronojel ukiʼlal (Salmo 104:24).