¿Jachin riʼ ri Dios?

1, 2. ¿Jas preguntas weneʼ kqabʼano?

RI E akʼalabʼ kkibʼan kʼi preguntas. Are chiʼ kqaya uchʼobʼik jun jastaq chke, kʼi mul kkibʼij chqe «¿Jasche?». Are chiʼ qayaʼom chi urespuesta chke, kkibʼij chi jumul «¿Jasche?».

² Ri akʼalabʼ, alabʼom, alitomabʼ o nimaʼq taq winaq, qonojel kqabʼan preguntas. Weneʼ kqaj kqetaʼmaj ri kqatij na, ri qatzʼyaq kqakoj na o ri jastaq che kqaloqʼ na. O weneʼ kqabʼan preguntas che nim kibʼanik chrij ri qakʼaslemal xuqujeʼ ri kqakʼulmaj na pa ri petinaq. Are kʼu, we kqariq ta utz respuestas, weneʼ kqatanabʼaʼ kan utzukuxik.

3. ¿Jasche e kʼi winaq kkitzukuj ta ri urespuestas ri kipreguntas?

³ ¿La kuya ri Biblia ri respuestas re ri preguntas che kʼo ubʼanik rukʼ ri kʼaslemal? E kʼi winaq kkibʼij che ri Biblia kuya ri respuestas, are kʼu kkitzukuj taj. ¿Jasche? Rumal che kkichomaj che ri Biblia are jun wuj che sibʼalaj kʼax uchʼobʼik. Weneʼ kkichomaj che xaq xiw ri ajtijabʼ xuqujeʼ ri sacerdotes o pastores ketaʼm ri urespuestas. E nikʼaj chik kkaj taj kkitzukuj, rumal che xa kekʼixik che ketaʼm taj. ¿Jas kachomaj at?

4, 5. a) ¿Jas preguntas nim kibʼanik kabʼan at? b) ¿Jasche kaya ta kan kitzukuxik ri respuestas?

⁴ Weneʼ kabʼan preguntas junam rukʼ wariʼ: «¿Jasche oj kʼo cho ri uwach Ulew? ¿Jas kqakʼulmaj are chiʼ kojkamik? ¿Jas ubʼanik ri Dios?». Jesucristo xux jun nimalaj ajtij. Areʼ xubʼij: «Chixtzʼononoq, kyaʼtaj kʼu na chiwe; chixtzukunoq, kixriqon kʼu na; chixkʼorkʼot chuchiʼ ri okibʼal, kjaqataj kʼu na chiwach» (Mateo 7:7). Rumal laʼ, kkʼistaj ta akʼuʼx. Kaya ta kan utzukuxik ri urespuestas kʼa kariq na ri kukubʼsaj akʼuʼx.

⁵ We kaya ta kan utzukuxik ri respuestas, kariq na pa ri Biblia (Proverbios 2:1-5). Kawil riʼ che ri respuestas kʼax ta uchʼobʼik. Xuqujeʼ, ri kawetaʼmaj katutoʼ rech katkikot pa ri akʼaslemal kimik. Xuqujeʼ kuya jun utzalaj aweyebʼal chrij ri petinaq. Chqilampeʼ jun pregunta che e kʼi winaq kkibʼano.

¿LA KEL UKʼUʼX RI DIOS CHQE, O ARE JUN ITZEL DIOS?

6. ¿Jasche e kʼi winaq kkichomaj che ri Dios kel ta ukʼuʼx chqe?

⁶ E kʼi winaq kkichomaj che ri Dios kel ta ukʼuʼx chqe. Kkibʼij: «Wet kel ukʼuʼx ri Dios chqe, mat kʼo kʼaxkʼolil riʼ». Kimik kʼo chʼoj, itzel kkil kibʼ ri winaq xuqujeʼ kʼo mebʼaʼil pa ronojel lugar. Ri e winaq keyawajik, kkiriq kʼax xuqujeʼ kekamik. Rumal laʼ, e kʼo jujun winaq kkibʼij: «We qastzij kel ukʼuʼx ri Dios chqe, ¿jasche kukʼis ta uwach ri kʼaxkʼolil?».

7. a) ¿Jasche e kʼi winaq kkichomaj che are ri Dios kbʼanow ri kʼax? b) ¿Jasche qas qetaʼm che ri Dios kʼo ta jumul kubʼano che kkʼulmataj itzel taq jastaq?

⁷ Are chiʼ kkʼulmataj jun kʼax, e kʼi kʼamal bʼe rech ri kojonem kkibʼij che are laʼ ri xraj ri Dios. Are chiʼ kkichomaj wariʼ, jetaneʼ kkibʼij che are ajmak ri Dios. Wariʼ kubʼano che kʼi winaq kkichomaj che ri Dios kubʼan itzelal. Are kʼu ri Dios kʼo ta jumul kubʼano che kkʼulmataj itzel taq jastaq. ¿Jasche qas qetaʼm che kubʼan ta itzelal? Rumal che ri Biblia kukʼutu che ri Dios kukoj ta jun winaq pa kʼax. Santiago 1:13 kubʼij: «Are taq ktaqchiʼx jun che mak, mubʼij bʼaʼ: ‹Xintaqchiʼx che mak rumal ri Dios›. Are kʼu ri Dios kuya taj ktaqchiʼx che mak, mawi kuya ktaqchiʼn che mak». Dios kuqʼatej taj che kkʼulmataj itzel taq jastaq. Are kʼu, paneʼ kuya bʼe che kkʼulmatajik, areʼ ta kbʼanowik che kkʼulmataj itzelal (chasikʼij uwach Job 34:10-12). Chqilaʼ jun kʼutbʼal che kojutoʼ che uchʼobʼik wariʼ.

8, 9. ¿Jas kʼutbʼal kʼolik che utz taj kqabʼij che are ri Dios ri ajmak che ri kʼax kqariqo?

⁸ Chatchoman chrij jun tat che sibʼalaj kraj ri ukʼojol xuqujeʼ kukʼut uchaʼik utz taq jastaq chuwach pa ri ukʼaslemal. Are chiʼ ri akʼal knimarik, kunimaj ta chi ri utat xuqujeʼ kel bʼi pa ri rachoch. Ri ala kumajij ubʼanik itzel taq jastaq tekʼuriʼ kuriq kʼi kʼax. ¿La kabʼij at che are ri tat ajmak che ri kʼax kuriq ri ala? Are taj (Lucas 15:11-13). Xa junam rukʼ, kuya taj kqabʼij che ri Dios are ajmak che ri e kʼax kqariqo. Junam rukʼ ri tat, ri Dios e uqʼatem ta ri e winaq che keniman ta che xuqujeʼ che kkibʼan itzelal. Rumal laʼ, are chi kʼo jun kʼax kkʼulmatajik, rajawaxik knaʼtaj chqe che are ta ri Dios kbʼanowik.

⁹ Qastzij che ri Dios kuya bʼe che kkʼulmataj kʼaxkʼolil, are kʼu kʼo rumal che kresaj ta chanim. Pa ri kʼutunem 11 kawetaʼmaj na ri kukʼut ri Biblia chrij wariʼ. Tekʼuriʼ qas chawetaʼmaj che ri Dios sibʼalaj kojuloqʼoqʼej xuqujeʼ are ta ajmak che ri e kʼax kqariqo. Ri qastzij, are che xaq xiw areʼ kkun che resaxik ri kʼax (Isaías 33:2).

10. ¿Jasche qas qetaʼm che ri Dios kresaj na ronojel ri kʼax che kibʼanom ri itzel taq winaq?

¹⁰ Ri Biblia kubʼij che ri Dios «tastalik» (Isaías 6:3). Wariʼ kraj kubʼij che ronojel ri kubʼano chʼajchʼoj xuqujeʼ utz. Rumal laʼ kojkunik kqakubʼsaj qakʼuʼx chrij. Are kʼu junam ta kqabʼij chkij ri e winaq, kʼi mul, qonojel kqabʼan jastaq che utz taj. Xuqujeʼ paneʼ jun qʼatal tzij kraj kubʼan ri utzilal, kkun ta che resaxik ri kʼax che kkibʼan ri itzel taq winaq. Xaq xiw ri Dios kkun che resaxik. Chrij ronojel ri qilom, qas qetaʼm che xaq xiw ri areʼ kkunik xuqujeʼ kraj kresaj ri kʼax che kkibʼan ri itzel taq winaq. Dios kuya na utzilal che kʼo ta ukʼisik pa ri uwach Ulew (chasikʼij uwach Salmo 37:9-11).

¿JAS KUNAʼ RI DIOS ARE CHIʼ KQARIQ KʼAX?

11. ¿Jas kunaʼ ri Dios are chiʼ kqariq kʼax?

¹¹ ¿Jas kunaʼ ri Dios chiʼ kril ronojel ri kkʼulmataj pa ri uwach Ulew xuqujeʼ ri kʼax kqariqo? Ri Biblia kukʼutu che ri Dios kuloqʼoqʼej ri sukʼilal (Salmo 37:28). Areʼ kril ronojel ri utz xuqujeʼ ri utz taj kkʼulmatajik. Sibʼalaj kʼax kunaʼ are chiʼ krilo che kqariq kʼax. Ri Biblia kubʼij che ri Dios «kʼax kʼu xunaʼ pa ri ranimaʼ» are chi ojer ri uwach Ulew xnoj che itzelal (Génesis 6:5, 6). Kimik ukʼexom ta ri kunaʼo (Malaquías 3:6). Ri Biblia kubʼij che qastzij kel ukʼuʼx chqe (chasikʼij uwach 1 Pedro 5:7).

12, 13. a) ¿Jasche keqaloqʼoqʼej ri winaq? b) ¿Jas kqanaʼo are chiʼ kqil ri kʼax che kʼo pa ri uwach Ulew? c) ¿Jasche qas qetaʼm che ri Dios kusachisaj na uwach ri kʼax xuqujeʼ ri itzelal?

¹² Ri Biblia xuqujeʼ kubʼij che ri Dios xojubʼan junam rukʼ areʼ (Génesis 1:26). Wariʼ kraj kubʼij che xojubʼan junam rukʼ ri e ubʼantajik. Jun kʼutbʼal, ri Biblia kukʼut chqawach che ri «Dios are loqʼoqʼebʼal kʼuxaj» (1 Juan 4:8). Ri Dios kubʼan ronojel ri jastaq rumal loqʼoqʼebʼal. Oj kojloqʼoqʼenik rumal che ri Dios kloqʼoqʼenik. Wariʼ kukʼutu che, we kʼax kqanaʼo are chiʼ keqil ri e winaq che kʼo ta kimak kkiriq kʼax, ri Dios kunaʼ más kʼax.

¹³ Chatchoman chrij wariʼ: wet katkun che usachisaxik ri kʼax xuqujeʼ ri itzelal kʼo cho ri uwach Ulew, ¿la kasachisaj uwach? Qastzij riʼ che kasachisaj uwach, rumal che keʼaloqʼoqʼej ri e winaq. ¿E kʼu ri Dios? Areʼ kusachisaj na uwach ri kʼaxkʼolil xuqujeʼ ri itzelal rumal che kojuloqʼoqʼej xuqujeʼ kkun che ubʼanik. Ri e tzujunik che xqil pa ri e nabʼe uxaq wajun wuj riʼ qas kebʼantaj na. Are kʼu, rech kqakubʼsaj qakʼuʼx chrij ri kutzujuj ri Dios, rajawaxik kqetaʼmaj más uwach.

RI DIOS KRAJ CHE KAWETAʼMAJ UWACH

14. ¿Jas ubʼiʼ ri Dios, xuqujeʼ jasche qetaʼm che areʼ kraj kqakoj ri ubʼiʼ?

¹⁴ Are chiʼ kawaj kawetaʼmaj uwach jun winaq xuqujeʼ katux rachiʼl, ¿jas ri nabʼe kabʼij che? Are kabʼij ri abʼiʼ. Are kʼu ¿e ri Dios? ¿La kʼo ubʼiʼ? E kʼi kojonelabʼ kkibʼij che ri ubʼiʼ are Dios o Señor, are kʼu wariʼ e bʼiʼaj taj. Xa e títulos, junam rukʼ rey o presidente. Dios kubʼij chqe che ri ubʼiʼ are Jehová. Ri Biblia kubʼij: «At ri abʼiʼ are Jehová xiw at qas at nim puwiʼ ri uwach Ulew» (Salmo 83:18, TNM [82:19 pa nikʼaj chik versiones]). Dios kraj che kqetaʼmaj ri ubʼiʼ xuqujeʼ kqakojo. ¿Jasche kqabʼij wariʼ? Rumal che kʼi mul xkikoj ri xetzʼibʼan ri Biblia (Éxodo 3:15; 6:3). Dios kubʼij ri ubʼiʼ chqe rech kojkunik kojux rachiʼl.

15. ¿Jas kraj kubʼij ri bʼiʼaj Jehová?

¹⁵ Ri bʼiʼaj Jehová kʼo kraj kubʼij. Kraj kubʼij che ri Dios kkunik kutzʼaqatisaj ronojel ri kutzujuj xuqujeʼ kubʼan ronojel ri kraj. Kʼo ta kqʼatenik. Xaq xiw che ri Jehová taqal wi wajun bʼiʼaj riʼ.a

16, 17. a) ¿Jasche are Jehová ri kʼo más nim uchuqʼabʼ? b) ¿Jasche are ri Jehová ri Ajawinel chbʼe qʼij saq? c) ¿Jasche are Jehová ri Bʼanol re ronojel?

¹⁶ Junam che xqil kan nabʼe, Salmo 83:18 kubʼij chrij ri Jehová: «Xiw at qas at nim puwiʼ ri uwach Ulew». Ri Biblia kukoj nikʼaj chi títulos che ri Jehová. Jun kʼutbʼal, Apocalipsis 15:3 kubʼij: «E nimaʼq xuqujeʼ sibʼalaj e mayibʼal taq ri e chak la, Ajawaxel, Dios ri kʼo ronojel ukunem». ¿Jas kraj kubʼij ri título «ri kʼo ronojel ukunem»? Kraj kubʼij che xaq xiw ri Jehová kʼo más nim uchuqʼabʼ chkiwach konojel nikʼaj chik. Xuqujeʼ 1 Timoteo 1:17 kubʼij che Jehová are ri «Ajawinel chbʼe qʼij saq». Wajun título riʼ kraj kubʼij che Jehová amaqʼel kʼolinaq. Xuqujeʼ, Salmo 90:2 kuqʼalajisaj che ri Dios kkam taj. ¿La mat qastzij che retaʼmaxik wariʼ sibʼalaj nim ubʼanik?

¹⁷ Ri Biblia xuqujeʼ kukʼutu che Jehová are bʼanowinaq ronojel. Apocalipsis 4:11 kubʼij: «Qajaw xuqujeʼ qaDios, yaʼtal che la ri ukʼamik ri juluwem, ri nim ilik xuqujeʼ ri kunem. Lal xebʼanow la konojel ri jastaq, rumal ri rayibʼal la e kʼolik, xebʼantajik». Qastzij, Jehová xbʼanow ronojel ri kʼolik: xeʼubʼan ri ángeles, ri e chʼumil, ri e kar xuqujeʼ kiwach ri e cheʼ.

¿LA KATKUNIK KATUX RACHIʼL RI JEHOVÁ?

18. a) ¿Jasche e jujun winaq kkichomaj che kojkun taj kojux rachiʼl ri Dios? b) Are kʼu ¿jas kukʼut ri Biblia?

¹⁸ E jujun winaq kkixibʼij kibʼ are chiʼ kketaʼmaj ri nimaʼq taq ubʼantajik ri Jehová. Kkichomaj che areʼ sibʼalaj nim uchuqʼabʼ, nim ubʼanik, naj kʼo wi xuqujeʼ che kel ta ukʼuʼx chqe. Are kʼu ri Dios kraj taj che kqachomaj wariʼ. Areʼ kraj kojux rachiʼl. Ri Biblia kukʼutu che ri Dios «naj ta kʼo wi chqe chqajujunal» (Hechos 17:27). Dios kraj che at kawetaʼmaj uwach. We katqebʼ rukʼ, ri Dios kubʼij chawe che «kqebʼ na» awukʼ xuqujeʼ katux rachiʼl (Santiago 4:8).

19. a) ¿Jas katkunik kabʼano rech katux rachiʼl ri Dios? b) ¿Jas ubʼantajik ri Jehová más utz kawilo?

¹⁹ ¿Jas katkunik kabʼano rech katux rachiʼl ri Dios? Jesús xuya ri respuesta are chiʼ xubʼij: «Are kʼu waʼ ri junalik kʼaslemal: chi kkichʼobʼ wach la, xuwi ri lal qas Dios, xuqujeʼ kkichʼobʼ uwach ri Jesucristo, ri taqom la uloq» (Juan 17:3). We kaya ta kan retaʼmaxik chrij ri Jehová xuqujeʼ ri Jesús, kawetaʼmaj más kiwach, katux kachiʼl xuqujeʼ kkʼojiʼ akʼaslemal che kʼo ta ukʼisik. Chanim, awetaʼm chik che «ri Dios areʼ loqʼoqʼebʼal kʼuxaj» (1 Juan 4:16). Are kʼu areʼ kʼo chi nikʼaj e ubʼantajik. Ri Biblia kukʼutu che ri Jehová «toqʼobʼisal wachaj, kochʼonel xuqujeʼ nim pa loqʼoqʼebʼal kʼuxaj xuqujeʼ qastzij» (Éxodo 34:6). Kukʼutu che Jehová sibʼalaj utz xuqujeʼ kukuy qamak (Salmo 86:5). Jun chi ubʼantajik ri Dios are che kʼo nim ukochʼonik xuqujeʼ sukʼ (2 Pedro 3:9; Apocalipsis 15:4). Kawetaʼmaj na más chrij ri e utzalaj taq ubʼantajik are chiʼ kawetaʼmaj chrij ri Biblia.

20, 21. ¿Jas kabʼano rech katux rachiʼl ri Dios paneʼ katkun taj kawilo?

²⁰ ¿Jas kabʼano rech katux rachiʼl ri Dios paneʼ katkun taj kawilo? (Juan 1:18; 4:24; 1 Timoteo 1:17). Chiʼ kasikʼij uwach ri Biblia, kawilo che Jehová are jun winaq che qastzij kʼolik (Salmo 27:4; Romanos 1:20). Are chiʼ kawetaʼmaj más chrij ri Jehová, sibʼalaj kaloqʼoqʼej riʼ xuqujeʼ kkʼojiʼ jun utzalaj awachilanik rukʼ.

²¹ Kawetaʼmaj na che Jehová are ri qaTat (Mateo 6:9). Areʼ xyaʼow ri qakʼaslemal xuqujeʼ kraj kqariq utzilal. Are waʼ ri kraj jun utzalaj tat chke ri e ralkʼwal che keʼuloqʼoqʼej (Salmo 36:9). Ri Biblia kukʼutu che at katkunik katux rachiʼl ri Jehová (Santiago 2:23). ¡Chachomajampeʼ! Ri Bʼanal re ronojel ri kaj xuqujeʼ ri uwach Ulew kraj katux rachiʼl.

22. ¿Jas weneʼ kkibʼan jujun winaq are chiʼ kkilo che tajin kawetaʼmaj chrij ri Biblia?

²² Weneʼ e kʼo jujun winaq kkaj kaya kan retaʼmaxik chrij ri Biblia. Weneʼ kkichomaj che kakʼex ri akojonik. Are kʼu kaya taj che jun winaq katuqʼatej rech katux rachiʼl ri Jehová. Ri más utzalaj awachiʼl kariqo are ri Dios.

23, 24. a) ¿Jasche rajawaxik kaya ta kan ubʼanik preguntas? b) ¿Jas kqetaʼmaj na pa ri jun chi kʼutunem?

²³ Are chiʼ kawetaʼmaj más chrij ri Biblia, kariq na jujun etaʼmanik che weneʼ kachʼobʼ taj. We rajawaxik, chabʼanaʼ preguntas xuqujeʼ chataʼ tobʼanik. Jesús xubʼij che rajawaxik kojmachʼachʼik junam kukʼ ri akʼalabʼ. Junam che xqil nabʼe, ri akʼalabʼ kkibʼan kʼi preguntas (Mateo 18:2-4). Ri Dios kraj che kariq ri respuestas. Rumal laʼ, qas utz chabʼanaʼ che utijoxik awibʼ chrij ri Biblia xuqujeʼ qas chawilaʼ che ri tajin kawetaʼmaj are ri qastzij (chasikʼij uwach Hechos 17:11).

²⁴ Ri qas utz retaʼmaxik uwach ri Jehová are che kqaya ta kan utijoxik qibʼ chrij ri Biblia. Pa ri jun chi kʼutunem kqetaʼmaj na ri rumal che ri Biblia kʼo ta kjunamataj wi.