Jun etal yaʼom ojer

Ri Jehová kuyaʼ ta na chike ri itzel täq winaq che kkewuluj ri Kotzʼiʼjalaj Ulew. Chupam wa jun, xiw kekʼaseʼ na ri täq urachiʼl. ¿ Jas kkeriq na ri itzel täq winaq? Rech kqetamaj jas kkeriq na, chqila ri ukʼaslemal ri Noé. Ri Noé xkʼaseʼ ojer. Areʼ jun sukʼalaj achi che xutzukuj ubʼanik rukʼ ronojel uchoqʼabʼ, ri utz kril ri Jehová. Tekʼuriʼ nikʼaj chik winaq che e kʼo cho ruwäch Ulew utz täj xkebʼano. Rumal laʼ, ri Jehová xubʼij che ri Noé, che kukʼam lo jun nimalaj jabʼ rech kusach kiwäch ronojel ri itzel täq winaq. Xuqujeʼ xeʼutaq che ubʼanik jun nimalaj jukubʼ (arca) rech kekam ta ri rachilal xuqujeʼ kkam ta areʼ chiʼ kpe ri Nimalaj Jabʼ (Génesis 6:9-18).

Ri Noé rukʼ rachilal xkebʼan ri nimalaj jukubʼ. Ri Noé xuyaʼ ubʼixik chike ri nikʼaj chik winaq che kpe na jun Nimalaj Jabʼ, tekʼuri kʼot jun xuto. Xetineʼt che ubʼanik ri itzelal. Chiʼ xukʼis ubʼanik ri nimalaj jukubʼ, xukoj ri täq chikop (awaj) chupam, tekʼuriʼ xok areʼ rukʼ täq rachilal chupam. Tekʼuriʼ, ri Jehová xukʼam lo jun qʼeqal jabʼ. Xubʼan jabʼ kawinaq (40) qʼij xuqujeʼ kawinaq aqʼabʼ che xunojisaj che jaʼ ronojel uwäch Ulew (Genesis 7:7-12).

Ri itzel täq winaq xekamïk, jet ri Noé rukʼ rachilal che xekʼaseʼ kanoq. Ri Jehová xeʼuchajej chupam ri Nimalaj Jabʼ, tekʼuriʼ xeʼukʼam bʼi chuwäch jun saqalaj uwäch Ulew pa ni kʼot wi itzelal (Génesis 7:22, 23). Ri Loqʼalaj Pixabʼ kubʼij che kopan na jun qʼij che kusach na kiwäch jumul chik, jachin täq kekaj täj utz kkebʼano. Ri utz täq winaq ksach ta kiwäch. Kʼo jun kikʼaslemal che kʼot ukʼisik chuwäch jun Kotzʼiʼjalaj Ulew (2 Pedro 2:5, 6, 9).

Kimik, sibʼalaj kʼi winaq kkebʼan ri itzelal. Ri uwäch Ulew nojinaq che kʼaxkʼolil. Ronojel qʼij ri Jehová keʼutaq ri Uqʼalajsinelibʼ che ubʼixik we tzij chike ri winaq, tekʼuriʼ xa jujun kketaʼ utzij ri Jehová. Kekaj täj kkejal kikʼaslemal, kekaj täj che ri Ajawaxel kubʼij chike, chike ri utz xuqujeʼ chike ri utz täj. ¿ Jas kkeriq na we winaq riʼ? ¿La kejaltaj na wariʼ? Kʼi chike kejaltaj twi. Naqaj kʼo wi ri qʼij che ksach na kiwäch ri itzel täq winaq (Salmo 92:7).

Ri uwäch Ulew ksach ta uwäch; kbʼan na jun kotzʼiʼjalaj ulew che. Jachin kkebʼan urachiʼl ri Ajawaxel kʼo na jun kikʼaslemal che kʼot ukʼisik chupam ri Kotzʼiʼjalaj Uwäch Ulew (Salmo 37:29).