Chqaxutuj ri kojonem che qastzij täj

Ri Satanás rukʼ ri itzel täq uxlabʼal kekaj täj che kqapatanej ri Ajawaxel. Kketzukuj ujachik kixoʼl ri winaq rukʼ ri Ajawaxel. ¿ Jas kkebʼan che? Jun ubʼanik rech kekun che, are ri kojonem che qastzij täj (2 Corintios 11:13-15). We jun kojonem kukʼut ta ri qastzij rech ri Loqʼalaj Pixabʼ, are jun kojonem che qastzij täj. Ri kojonem che qastzij täj junam rukʼ pwäq che qastzij täj: kkaʼyik che qastzij pwäq tekʼuriʼ kʼot upatan. Xuqujeʼ, kukʼam lo kʼi täq kʼaxkʼolil chaqe.

Ri kojonem che qastzij täj utz täj kril ri Jehová, ri Ajawaxel rech ri qastzij. Chiʼ ri Jesús xkʼijeʼ chuwäch Ulew, ri ojer täq kʼutunel ajkʼamol täq bʼe xkekaj xkekamisaj. Wanikʼaj xkebʼij che ri kikojonem are qas utz. Xkebʼij: «Jun qatat kʼolik are ri Dios». ¿La utz xutaʼ wariʼ ri Jesús? Utz täj. Areʼ xubʼij chike: «Ri ix, ix rech ritat ri itzel» (Juan 8:41, 44). Kimik, e kʼi winaq kkekojo che tijan kkeqʼijlaj ri Ajawaxel tekʼuri qastzij ta kʼut, are tijan kkepatanej ri Satanás rukʼ ri itzel täq uxlabʼal (1 Corintios 10:20).

Junam rukʼ jun cheʼ uraqom ul, kuyaʼ ul täq uwäch, ri kojonem che qastzij täj kuyaʼ winaq che kkebʼan ri itzelal. Ri uwäch ulew nojinaq che kʼaxkʼolil rumal ri itzelal kkebʼan ri winaq. E kʼo tzʼil täq mak, chʼoj, elaqʼ, itzel taqoʼnik (opresión), kamisanik xuqujeʼ achijabʼ ajchapal ixoqibʼ rukʼ choqʼabʼ. E kʼi chike we winaq che kkebʼan wariʼ kʼo kikojonem. Ri kikojonem keʼutaq ta che ubʼanik ri utz. Kekun täj kkebʼan urachiʼl ri Ajawaxel we kkeyaʼ ta kan ri itzelal (Mateo 7:17, 18).

Ri kojonem che qastzij täj, kukʼut chike ri winaq ri uchʼabʼexik ri bʼanom täq tyox. Ri Ajawaxel kubʼij che kraj täj che kqachʼabʼej ri bʼanom täq tyox. Wariʼ jewaʼ usukʼumal. ¿La utz kqilo wat jun winaq kchʼaw ta qukʼ tekʼuriʼ kchʼaw che jun qawachbʼäl? ¿La kkun wa jun winaq kubʼan qachiʼl? Kkun täj. Ri Jehová kraj che ri täq winaq kkechʼabʼej areʼ, jun bʼanom tyox täj, jun wachbʼäl täj che kʼot ukʼaslemal (Éxodo 20:4, 5).

Ri kojonem che qastzij täj, kukʼutu che yaʼtalik ukamisaxik nikʼaj chik winaq pa täq chʼoj. Ri Jesús xubʼij che ri täq urachiʼl ri Ajawaxel kkeloqʼoqʼej na kibʼ che kixoʼl. Kqakamisaj ta ri winaq we qastzij kqaloqʼoqʼej (Juan 13:35). Xuqujeʼ matneʼ xa e itzel täq winaq, utz täj kqakamisaj. Chiʼ täq e ukʼulel ri Jesús xebʼe che uchapik, areʼ xuyaʼ täj che ri rajtijoxel che, xechʼojinik rech xketoʼ uwiʼ (Mateo 26:51, 52).

Ri kojonem che qastzij täj kukʼutu che ri itzel täq winaq kkeriq na kʼäx pa ri nimalaj qʼaqʼ. Ri Loqʼalaj Pixabʼ kukʼutu che ri mak kojukʼam bʼi pa kamikal (Romanos 6:23). Ri Jehová are ri Ajawaxel rech ri loqʼoqʼem. We ri Ajawaxel keʼuloqʼoqʼej ri täq winaq ¿la kuyaʼ kʼut pa jun kʼäx che kʼot ukʼisik? Kuyaʼ täj. Chupam ri Kotzʼiʼjalaj Ulew xiw jun kojonem kkʼoji na, are ri kojonem che ri Jehová kraj (Apocalipsis 15:4). Ronojel nikʼaj chik täq kojonem che kkekoj utzij ri Satanás sachinaq chi kiwäch.