KʼUTUNEM 13
Ri qastzij taj kojonem kibʼim molom taq tzij chrij ri Dios
We ri Dios kloqʼoqʼenik y ri e kojonem kkibʼij che kkiqʼijilaj ri Dios, ¿jasche kkibʼan itzelalaj taq jastaq? Rumal che are ta ri qastzij kojonem. Ri kkikʼutu y ri kkibʼano kutzʼilobʼisaj ri ubʼiʼ ri Dios. ¿Jas kibʼanom che ubʼanik? ¿Jas kunaʼ riʼ ri Dios? ¿Y jas kubʼan na che ri molom tzij che bʼim chrij?
1. ¿Jas jastaq kkikʼutu che kutzʼilobʼisaj ri ubʼiʼ ri Dios?
Ri e qastzij taj kojonem xkikʼex «ri saqalaj tzij re ri Dios che ukʼexwach ri bʼanoj tzij» (Romanos 1:25). Jun kʼutbʼal kkikʼut ta chkiwach ri winaq ri ubʼiʼ ri Dios. Are kʼu ri Biblia kubʼij che rajawaxik kqakoj ri ubʼiʼ (Romanos 10:13, 14). Ri kʼamal taq bʼe rech ri qastzij taj kojonem kkibʼij che are ajmak ri Dios che ri kʼaxkʼolil. Are kʼu qastzij ta wariʼ. Ri areʼ are ta ajmak che ronojel ri kʼaxkʼolil che kriqitajik (chasikʼij Santiago 1:13). Ri molom taq tzij riʼ ubʼanom che ri winaq kkaj taj kketaʼmaj chrij ri Dios.
2. ¿Jas kibʼanom che utzʼilobʼisaxik ri ubʼiʼ ri Dios rukʼ ri kkibʼano?
Ri Jehová keʼuloqʼoqʼej ri winaq are kʼu ri qastzij taj kojonem nim ta kekil wi. Ri Biblia kubʼij che ri kimak «e opaninaq kʼa cho ri kaj» (Apocalipsis 18:5). Ri qastzij taj kojonem pa kʼi taq junabʼ kinimom kibʼ pa política, ketobʼan pa ri chʼoj y kikamisam kʼi winaq. E jujun taq kʼamal bʼe e qʼinomabʼ y kkitaʼ más pwaq chke ri winaq rech kʼo kʼi jastaq kech. Ri kkibʼano kukʼutu che ketaʼm ta uwach ri Dios. ¿La e utz taq kʼamal bʼe riʼ? (Chasikʼij 1 Juan 4:8).
3. ¿Jas kunaʼ ri Dios chiʼ kril ri kkibʼan ri qastzij taj kojonem?
We at utz ta kawil ri kkibʼan ri qastzij taj kojonem, ¡chachomaj ri kunaʼ ri Jehová! Ri areʼ keʼuloqʼoqʼej ri winaq, are kʼu itzel keril ri kʼamal taq bʼe che kkitzʼilobʼisaj ri ubʼiʼ y kkibʼan kʼax chke ri winaq. Ri Dios kubʼij che ksachisax na kiwach ri qastzij taj kojonem y che «mawi jumul kriqitaj chik» (Apocalipsis 18:21). Xa jubʼiqʼ tiempo chi kraj kusachisaj na kiwach (Apocalipsis 18:8).
CHANIMARISAJ RI AWETAʼMANIK
Chqilaʼ jas kuchomaj ri Jehová chkij ri qastzij taj kojonem. Xuqujeʼ kqil na ri jastaq che kibʼanom. Y chukʼisbʼal, kqil na jasche kqaya ta kan retaʼmaxik chrij ri Jehová paneʼ ri qastzij taj kojonem kkibʼan itzel jastaq.
4. Ri Dios utz ta keril konojel ri kojonem
Ri winaq kkibʼij: jalajoj ri qakojonik are kʼu xa jun Dios kʼolik. ¿La qastzij wariʼ? Chisikʼij Mateo 7:13, 14 y chixtzijon chrij wariʼ:
Junam rukʼ ri kubʼij ri Biblia, ¿jas ubʼanik ri bʼe che kkʼaman bʼi pa ri kʼaslemal che kʼo ta ukʼisik?
Chiwilaʼ ri VIDEO y chixtzijon chrij wariʼ:
¿La kukʼut ri Biblia che ri Dios utz keril konojel ri kojonem?
5. Ri qastzij taj kojonem kkikʼut ta ri uloqʼoqʼenik ri Dios
Ri qastzij taj kojonem kitzʼilobʼisam ri ubʼiʼ ri Dios, y jun chke ri kkibʼano are che ketobʼan pa taq chʼoj. Rech kiwetaʼmaj chrij ri kibʼanom, chiwilaʼ ri VIDEO. Tekʼuriʼ chixtzijon chrij wariʼ:
¿Jas xkibʼan kʼi Iglesias pa ri Segunda Guerra Mundial?
¿Jas kachomaj chrij ri xkibʼano?
Chisikʼij Juan 13:34, 35 y 17:16. Tekʼuriʼ chixtzijon chrij wariʼ:
¿Jas kunaʼ ri Jehová are chiʼ ri kojonem ketobʼan pa ri chʼoj?
Ri qastzij taj kojonem kibʼanom kʼi taq itzelal y kkikʼut ta ri uloqʼoqʼenik ri Dios. ¿Jas awilom at, jas kibʼanom ri qastzij taj kojonem kimik?
Ri qastzij taj kojonem kkikʼut ta ri uloqʼoqʼebʼal ri Dios.
6. Ri Dios kraj keresaj ri winaq pa ri qastzij taj kojonem
Chisikʼij Apocalipsis 18:4a y chixtzijon chrij wariʼ:
Ri Dios kraj keʼutoʼ ri winaq che e subʼum kumal ri qastzij taj kojonem. ¿Jas kachomaj at chrij wariʼ?
7. Kaya ta kan retaʼmaxik chrij ri qastzij Dios
¿La kaya kan retaʼmaxik chrij ri Dios xa rumal ri itzel taq jastaq che kkibʼan ri qastzij taj kojonem? Chatchoman chrij jun alkʼwalaxel che kuxutuj ri utz taq pixabʼ che kuya ri utat che, kel bʼi pa ri rachoch y kubʼan itzel taq jastaq. Ri tat utz ta kril ri kubʼan ri ralkʼwal. Are kʼu, ¿la are ajmak ri tat rumal ri itzelalaj ukʼaslemal ri ukʼojol?
¿La are ri Jehová ajmak che ri itzelalaj taq jastaq che kkibʼan ri qastzij taj kojonem? ¿Y jasche utz taj kqaya kan retaʼmaxik chrij ri Jehová rumal wariʼ?
RI KKICHOMAJ JUJUN WINAQ: «In kwaj taj kwetaʼmaj chrij ri Dios rumal che ri kojonem kibʼanom kʼi kʼax».
¿La je kachomaj at?
¿Jasche utz taj kʼax kojchʼaw chrij ri Jehová rumal ri kkibʼan ri qastzij taj kojonem?
RI XQETAʼMAJ
Ri qastzij taj kojonem kibʼim molom taq tzij chrij ri Dios y kibʼanom kʼi kʼax. Rumal laʼ pa jubʼiqʼ tiempo ri Dios kusachisaj na kiwach.
¿La knaʼtaj chawe?
¿Jas kachomaj at chrij ri tajin kkibʼan ri qastzij taj kojonem y ri molom taq tzij che kkibʼij?
¿Jas kuchomaj ri Jehová chkij ri qastzij taj kojonem?
¿Jas kubʼan na ri Dios chke ri qastzij taj kojonem?
CHAWILAʼ CHI NIKʼAJ
Kʼo kebʼ rumal che ri Dios itzel keril ri qastzij taj kojonem. Chawilaʼ jas riʼ.
«¿La konojel ri kojonem kojuqebʼsaj rukʼ ri Dios?» (Kʼutunem re jw.org)
¿Jasche ri Jehová kraj kqaqʼijilaj kukʼ nikʼaj chik y xaq ta qatukel?
«¿La rajawaxik kojkʼojiʼ na pa jun kojonem?» (Kʼutunem re jw.org)
Jun sacerdote qas ta kukoj ri kkʼut pa ri ukojonem. Are kʼu wariʼ xubʼan taj che mat xretaʼmaj chrij ri Dios.
«Jun sacerdote xuya kan ri ukojonem» (¡Despertad!, febrero 2015)
Ojer loq ri e kojonem kibʼim molom taq tzij chrij ri Dios y kibʼanom che ri winaq kkichomaj che are jun itzel Dios. Chawilaʼ jawchiʼ petinaq wi ri oxibʼ taq molom tzij riʼ.
«Molom taq tzij che kojunajtajisaj che ri Dios» (La Atalaya, 1 re noviembre 2013)