Samuel amaqʼel xubʼan ri kraj ri Jehová

Chiʼ nitzʼ na, Samuel xumajij chak xuqujeʼ xkʼojiʼ pa rachoch Dios. Ri rachoch Dios are ri lugar ri keʼopan wi ri winaq che uyaʼik uqʼij ri Jehová. ¿La kawaj kawetaʼmaj jasche xkʼojiʼ Samuel chilaʼ? Rech kachʼobʼo, nabʼe chqilaʼ ri xkʼulmataj rukʼ ri unan, Ana ubʼiʼ.

Ri Ana sibʼalaj kraj kkʼojiʼ jun alaj uneʼ, are kʼu kkʼojiʼ ta ral. Rumal laʼ xubʼan uchʼawem che ri Jehová xubʼij waʼ: «Chabʼanaʼ toqʼobʼ, Jehová, chinatoʼo». Xuqujeʼ xubʼij che: «We kkʼojiʼ jun wal, kintaq bʼi pa ri awachoch rech kchakunik xuqujeʼ kkʼojiʼ chilaʼ». Ri Jehová xuta ri uchʼawem, Ana xkʼojiʼ alaj uneʼ. Xkoj Samuel che ri ubʼiʼ. Chiʼ kʼo oxibʼ o kajibʼ ujunabʼ, ri Ana xubʼan ri xubʼij che ri Dios xukʼam bʼi ri akʼal pa rachoch ri Dios rech kpatanin chilaʼ.

Ri kinimal ri kojol tabʼal toqʼobʼ che kʼo pa rachoch ri Dios, Elí ubʼiʼ. Ri e kebʼ ukʼojol, che e rijabʼ chik, xuqujeʼ kechakun chilaʼ. Pa ri rachoch Dios kyaʼ wi uqʼij ri Jehová, rumal laʼ ri winaq che kechakun chilaʼ rajawaxik utz ri kkibʼano. Ri Samuel xrilo che ri e ukʼojol ri Elí xkibʼan itzel taq jastaq. ¿La xuqujeʼ Samuel xubʼan itzel taq jastaq, junam kukʼ e areʼ? ¿Jas kachomaj at?... Xubʼan taj, Samuel xuya ta kan ubʼanik ri kraj ri Jehová, je jas xkikʼut ri unan utat chuwach.

¿La rajawaxik che ri Elí xeʼupixbʼej ri e ukʼojol?... ¡Rajawaxik! Xuqujeʼ rajawaxik wet ri Elí xresaj ri kichak pa ri rachoch ri Dios. Are kʼu ri areʼ xubʼan taj. Rumal laʼ Jehová xpe royowal che ri Elí xuqujeʼ chke ri e kebʼ ukʼojol, rumal waʼ xukʼajisaj kiwach.

Pa jun chaqʼabʼ, tajin kwar ri Samuel chiʼ xuta che tajin kchʼabʼexik. «¡Samuel!», xchaʼ ri chʼabʼal. Ri areʼ panim xbʼe che rilik ri Elí, are kʼu ri Elí xubʼij che: «Tajin ta katinchʼabʼej». Oxmul xkʼulmatajik. Are kʼu che ri urox mul, ri Elí xubʼij wariʼ che ri Samuel: «We kata chi jumul ri chʼabʼal, chabʼij: ‹Chatchʼawoq, Jehová. Tajin katinto›». Chiʼ Samuel je xubʼij waʼ, Jehová xubʼij: «Chabʼij che ri Elí che kinkʼajisaj uwach ri ufamilia rumal ri itzelal tajin kkibʼano». ¿La kʼax ta xuriq ri Samuel che ubʼixik che ri Elí? ¿Jas kachomaj at?... Sibʼalaj kʼax xuriq che ubʼixik. Ri qastzij are che Samuel kuxibʼij ribʼ kubʼij ronojel che ri Elí. Are kʼu qas xunimaj ri Jehová xubʼij ronojel che ri Elí. Ronojel ri xubʼij ri Dios xbʼanik: chiʼ xeqʼax ri qʼij, xkam ri Elí xuqujeʼ ri e kebʼ ukʼojol.

Kojkunik kqetaʼmaj kʼi jastaq chrij ri Samuel. Pa neʼ xkʼojiʼ kukʼ winaq che kkibʼan itzel taq jastaq, areʼ xubʼan ri kraj ri Jehová. ¿La kabʼan awe at junam che xubʼan areʼ? ¿La kanimaj at ri Jehová junam rukʼ ri xubʼan Samuel? We kabʼano, sibʼalaj kkikot riʼ ri Jehová awukʼ, xuqujeʼ ri atat ri anan.