Samuel xchʼabʼex rumal ri Jehová

Ri kinimal kojol tabʼal toqʼobʼ Elí e kʼo kebʼ ukʼojol: Hofní xuqujeʼ Finehás. E areʼ e kojol tabʼal toqʼobʼ kechakun pa ri tabernáculo. Are kʼu kkinimaj ta ri utaqanik Jehová xuqujeʼ utz ta kilik ri winaq kkibʼano. Are chiʼ ri israelitas kkikʼam bʼi tabʼal toqʼobʼ che Jehová, Hofní xuqujeʼ Finehás kkikʼam kan ri utzalaj taq tiʼj chke e areʼ. Elí retaʼm che ri e ralkʼwal utz ta ri kkibʼano. Are kʼu kʼo ta kubʼij chke. ¿La kachomaj che kʼo kubʼan Jehová?

Pa neʼ Samuel are kʼa akʼal na chkiwach Hofní xuqujeʼ Finehás, kubʼan ta itzel jastaq junam kukʼ e areʼ. Pa jun chaqʼabʼ, Samuel tajin kwarik xuta jun chʼabʼal che kuchʼabʼej. Xwalijik, xbʼe rukʼ Elí xubʼij che: «In kʼo waral». Are kʼu Elí xubʼij che: «In xatinsikʼij taj. Chattzalijoq chatwaroq». Samuel xqʼoyiʼ chi jumul. Tekʼuriʼ xuta ri chʼabʼal chukamul. Are chiʼ Samuel xuta ri chʼabʼal pa urox mul, Elí xuchʼobʼo che are Jehová tajin kchʼabʼen Samuel. Elí xubʼij che we kuta chi jumul ri chʼabʼal, rajawaxik kubʼij: «Chatchʼawoq, Jehová. Ri awajpatanel tajin katuto».

Samuel xtzalij chi pa ri uchʼat jumul chik xuta ri chʼabʼal: «Samuel, Samuel». Areʼ xubʼij: «Chatchʼawoq, Jehová. Ri awajpatanel tajin katuto». Jehová xubʼij che: «Chabʼij che Elí; kinkʼajisaj uwach areʼ xuqujeʼ ri ufamilia. Areʼ retaʼm che ri e ukʼojol tajin kkibʼan itzel taq jastaq pa ri nutabernáculo, are kʼu keʼupixbʼej taj». Chukabʼ qʼij, Samuel xujaq ri uchiʼ ri tabernáculo, junam rukʼ ri kubʼan amaqʼel. Kuxibʼij ribʼ che kubʼij ri utzij Jehová che ri kinimal ri e kojol tabʼal toqʼobʼ. Are kʼu Elí xusikʼij xutaʼ che: «Nukʼojol, ¿jas xubʼij Jehová chawe?». Rumal laʼ Samuel xubʼij che ronojel.

Samuel xkʼiyik, Jehová xuya ta kan ri rachilanik rukʼ. Ri israelitas re ronojel ri tinamit ketaʼm che Jehová xuchaʼ Samuel rech kux ajqʼaxal tzij xuqujeʼ qʼatal tzij.