Josías qas xuchaʼ na ri e rachiʼl

¿La kachomaj che kʼax ubʼanik ri kubʼij ri Jehová che kqabʼano?... Kʼi chke ri winaq kkibʼij che sibʼalaj kʼax ubʼanik. Are kʼu ri Biblia kubʼij che kʼax ta ubʼanik. Kchʼaw chrij jun ala Josías ubʼiʼ, jun ala che sibʼalaj xukoj uchuqʼabʼ che upatanexik ri Jehová. Ri xtoʼwik are che qas xuchaʼ na ri e rachiʼl. Chqetaʼmaj más chrij ri Josías xuqujeʼ chkij ri e rachiʼl.

Ri utat ri Josías Amón ubʼiʼ xuqujeʼ xkʼojiʼ che ajawinel rech Judá. Ri Amón sibʼalaj itzel xuqujeʼ xuqʼijilaj e tyox. Chiʼ xkam ri Amón, are chi ri Josías xubʼan ajawinel rech Judá. ¿La awetaʼm jampaʼ ujunabʼ ri Josías are taq xux ajawinel rech Judá? ¡Kʼateʼ wajxaqibʼ ujunabʼ! ¿La xubʼan itzelal, junam rukʼ ri xubʼan ri utat?... Xubʼan taj.

Kʼa chiʼ nitzʼ na, ri Josías kraj kupatanij ri Jehová. Rumal laʼ xutzukuj utz achilanik. Are xeʼuchaʼ winaq che kkiloqʼoqʼej ri Dios, ri e winaq riʼ xkitoʼ rech areʼ xunimaj ri Jehová. ¿E jachin riʼ ri xerachilaj ri Josías?

Jun chke are ri ajqʼaxal tzij Sofonías. Areʼ xubʼij ri tzij riʼ chke ri winaq rech Judá: «We man kiya kan kipatanexik ri e tyox, kiriq na kʼax». ¿Jas xubʼan ri Josías? ¿La xuta ri xubʼij ri ajqʼaxal tzij Sofonías? Je xuta. Rumal laʼ, areʼ xuya uqʼij ri Jehová, are ta ri e tyox che kʼo ta kipatan.

Ri jun chik rachiʼl ri Josías are ri Jeremías. Weneʼ xaq junam ri kijunabʼ rukʼ ri Jeremías xuqujeʼ, chiʼ e nitzʼ na, naqaj kʼo wi ri rachoch ri Jeremías che rachoch ri Josías. Rumal laʼ ri Jeremías xuqujeʼ ri Josías xkitoʼ kibʼ che upatanixik ri Jehová. Rumal che sibʼalaj utz ri kachilanik, chiʼ xkam ri Josías, Jeremías xutzʼibʼaj jun bʼixonem rech xutzijoj che sibʼalaj kbʼisonik.

Qastzij kqetaʼmaj kʼi jastaq chrij ri Josías, ¿la je kachomaj at?... Ri Josías chiʼ nitzʼ na kraj kunimaj ri Jehová. Rech knimanik, rajawaxik xeʼuchaʼ ri winaq che kkiloqʼoqʼej ri Jehová che rachiʼl. At xuqujeʼ kawaj kapatanij ri Jehová, ¿paʼ? Rumal laʼ sibʼalaj rajawaxik che katzukuj awachiʼl che kkiloqʼoqʼej ri Jehová.