Josías xuloqʼoqʼej ri Utaqanik ri Dios

Josías xumaj uqʼatik tzij pa Judá are chiʼ kʼo ocho ujunabʼ. Pa ri tiempo riʼ, ri winaq kkikoj magia xuqujeʼ kekiqʼijilaj e tyox. Are chiʼ Josías kʼo 16 ujunabʼ, xraj xretaʼmaj ri qas kbʼan che uqʼijilaxik Jehová. Are chiʼ kʼo chi 20 ujunabʼ, xumaj kiwulixik ri e tyox xuqujeʼ ri e altares pa ronojel ri tinamit. Are chiʼ kʼo chi 26 ujunabʼ, xril ri rajawaxik rech ksukʼumax ri rachoch ri Dios.

Ri kinimal ajkojol tabʼal toqʼobʼ, Hilquías, xuriq pa ri rachoch ri Dios jun wuj re ri Utaqanik ri Dios. Weneʼ are ri xutzʼibʼaj Moisés. Safán, ri rajtzʼibʼ ri ajawinel, xusikʼij uwach ri wuj chuwach Josías ko xusikʼij uwach. Josías xutatabʼej tekʼuriʼ xrilo che kʼi junabʼ chik ri tinamit tajin ta kkinimaj Jehová. Tekʼuriʼ ri ajawinel Josías xubʼij che Hilquías: «Jehová petinaq royowal qukʼ. Chattzijon rukʼ rech kubʼij chqe ri rajawaxik kqabʼano». Jehová xubʼij ri e tzij che ri profetisa Huldá: «Ri tinamit Judá xinkiya kanoq. Kinkʼajisaj kiwach, are kʼu pa ri rajawinik ta Josías, rumal che areʼ kubʼan ta nim che ribʼ».

Are chiʼ ri ajawinel Josías xuta ri e tzij riʼ, xbʼe pa ri rachoch Dios xuqujeʼ xeʼumulij ri tinamit Judá. Tekʼuriʼ, rukʼ chuqʼabʼ xusikʼij uwach ri Utaqanik ri Jehová chkiwach ri winaq re ri tinamit. Josías xuqujeʼ ri tinamit xkibʼij che kkinimaj ri Dios rukʼ ronojel kanimaʼ.

Ojer chik ri tinamit re Judá kkibʼan ta chi ri Pascua. Are kʼu Josías xusikʼij pa ri Taqanik che ri Pascua rajawaxik kbʼan ronojel junabʼ, rumal laʼ xubʼij che ri tinamit: «Kqabʼan jun nimaqʼij re Pascua che Jehová». Tekʼuriʼ, Josías xuya taqanik rech kbʼan kʼi tabʼal toqʼobʼ xuqujeʼ kbʼan e bʼixonem pa ri rachoch ri Dios. Xkibʼan ri Pascua tekʼuriʼ ri Nimaqʼij re ri e Kaxlanwa che kʼo ta Chʼam rukʼ che xuchʼij wuqubʼ qʼij. Kʼo ta jumul kibʼanom jun Pascua junam rukʼ waʼ xaq xiw are chiʼ kʼa kʼasal na Samuel. Josías qastzij che kuloqʼoqʼej ri Utaqanik ri Dios. ¿E ri at? ¿La xuqujeʼ kawaj kawetaʼmaj chrij Jehová?