Cheqanimaj ri kekʼamow qabʼe

RI APÓSTOL Pablo xubʼij che rajawaxik keqanimaj ri kekʼamow qabʼe (Heb. 13:7). Xumaj lo pa ri Pentecostés re ri junabʼ 33 re ri qaqʼij, are chiʼ xmajtaj ri congregación cristiana, ri rapóstoles ri Jesucristo are xekʼamow ubʼe ri congregación. Xekʼojiʼ pa ri jupuq e kʼamal bʼe kech konojel ri cristianos y xkiya tobʼanik chke (Hech. 6:2-4). Are chiʼ xqʼax ri tiempo, pa ri junabʼ 49, chiʼ rajawaxik xsukʼumax ri kbʼan che uchʼobʼik ri kʼutunem re ri circuncisión, ri apóstoles che e kʼo pa ri jupuq kʼamal bʼe kech konojel ri cristianos che kʼo pa Jerusalén, xetoʼ kumal e jujun kʼamal bʼe (Hech. 15:1, 2). Waʼ taq qachalal are kesukʼuman konojel ri e kʼutunem che nim ubʼanik pa kikʼaslemal konojel ri cristianos, junam rukʼ ri kʼutunem re ri circuncisión. Xuqujeʼ kkitaq bʼi cartas y pixabʼ rech kkiya kichuqʼabʼ ri congregaciones y kekitoʼ ri tijoxelabʼ rech xaq junam ri kkichomaj y ri kkibʼano. Ri congregaciones xeniman che ri pixabʼ che xuya ri jupuq kʼamal bʼe pa ri tiempo riʼ. ¿Jas xkiriq rumal wariʼ? Sibʼalaj xetewchix rumal ri Jehová (Hech. 8:1, 14, 15; 15:22-31; 16:4, 5; Heb. 13:17).

² Are chiʼ e kaminaq chi ri apóstoles, ri apostasía xok pa ri congregación, junam rukʼ ri xuya kan ubʼixik ri Pablo (2 Tes. 2:3-12). Pa ri kʼutbʼal re ri trigo y ri itzel taq qʼayes che xubʼij ri Jesús, xuqʼalajisaj kanoq che kekʼiy itzel taq qʼayes (qastzij taj cristianos) chuxoʼl ri trigo (cristianos che kebʼe pa ri kaj). Ri itzel ta qʼayes y ri trigo junam kekʼiyik pa kʼi taq junabʼ kʼa kopan na ri tiempo re ri qʼatoj o ri uyakik uwach ri tikoʼn, pa «ri ukʼisbʼalil ri uwach ulew» (Mat. 13:24-30, 36-43). Pa ronojel taq ri junabʼ are chiʼ majaʼ kuriq ri tiempo re ri qʼatoj, paneʼ xekʼojiʼ cristianos che e chaʼom kebʼe pa ri kaj che keqaj chuwach ri Jesús, are kʼu kʼo ta jun jupuq kʼamal bʼe kech ri cristianos (Mat. 28:20). Tekʼuriʼ kkʼextaj wariʼ are chiʼ kopan ri tiempo re ri qʼatoj. ¿Jasche qetaʼm wariʼ?

³ Pa jun chi kʼutbʼal, ri Jesús xubʼij che pa «ri ukʼisbʼalil ri uwach ulew» o ri kʼisbʼal taq qʼij kkoj «ri jikalaj pataninel, utz uchomanik» (Mat. 24:3, 42-47). Wajun pataninel are kyaʼow ri rajawaxik pa ri kikojonik ri utinamit ri Dios «pa ri kiqʼijol». ¿La tajin kchʼaw chrij xa jun winaq wariʼ? Je taj. Pa ri nabʼe siglo, ri Jesús xa ta jun achi xukojo rech xukʼam ubʼe ri congregación cristiana, xaneʼ xukoj jun jupuq achijabʼ. Je kkʼulmataj pa taq ri qaqʼij. Uyaʼom eqeleʼn pa kiqʼabʼ jun jupuq achijabʼ rech kkikʼam ubʼe ri utinamit ri Jehová.

¿JACHIN RIʼ «RI JIKALAJ PATANINEL, UTZ UCHOMANIK»?

⁴ ¿Jachin taq e kʼo pa wajun jupuq? Qas qʼalaj che rech kyaʼ ronojel ri kajwataj chke ri cristianos kimik, ri Jesús keʼukoj ri cristianos che kebʼe pa ri kaj che uyaʼik. Ri Biblia kubʼij «kojol tabʼal toqʼobʼ» chke y kubʼij che ri Dios uyaʼom jun eqeleʼn chke rech kkitzijoj «ronojel uwach utzalaj taq jastaq ri kubʼan ri Dios» ri xeʼesan loq pa ri qʼequʼm, xeʼuya pa ri saqil ri sibʼalaj mayibʼal ubʼixik (1 Ped. 2:9; Mal. 2:7; Apoc. 12:17). Wariʼ kraj taj kubʼij che konojel ri e chaʼom kebʼe pa ri kaj e kʼo chupam ri «jikalaj pataninel». Chojchoman chrij jun kʼutbʼal, are chiʼ ri Jesús xeʼutzuq e 5,000 achijabʼ xuqujeʼ ixoqibʼ y akʼalabʼ. Ri areʼ xuya ri wa chke ri utijoxelabʼ, tekʼuriʼ ri utijoxelabʼ xkijach chkiwach konojel ri winaq (Mat. 14:19). Pa ri qʼij riʼ, ri Jesús xeʼutzuq e kʼi winaq are kʼu xa e kebʼ oxibʼ xeʼukoj che ujachik ri wa. Pa taq ri qaqʼij junam tajin kubʼan che uyaʼik ri rajawaxik chqe pa ri qakojonik.

⁵ Wariʼ kraj kubʼij che xa jun alaj jupuq cristianos e kʼo pa «ri jikalaj pataninel [...] utz uchomanik», ri kebʼanowik y keyaʼow ri kajwataj chqe pa ri qakojonik pa ri upetbʼal ri Cristo (Luc. 12:42). Pa ri «kʼisbʼal taq qʼijol» waʼ taq qachalal che kebʼe pa ri kaj, kechakun pa ri central mundial y are ri kbʼix Jupuq Ajkʼamal bʼe cho ronojel uwach Ulew kech ri Testigos rech Jehová chke.

⁶ Ri Cristo kukoj wajun jupuq cristianos rech kkiqʼalajisaj ri kraj kubʼij ri e tzʼibʼatal kan pa ri uTzij ri Dios y kkiya tobʼanik chqe rech kqabʼan pa ri qakʼaslemal. Ri jikalaj pataninel keʼukoj ri congregaciones kech ri testigos rech Jehová rech kuya ri kajwataj chqe pa ri qakojonik (Is. 43:10; Gál. 6:16). Ojer kanoq, jun pataninel o mayordomo are kchajin ke ri nikʼaj chi ajchakibʼ che e kʼo pa ri rachoch ri rajaw. Junam rukʼ, «ri jikalaj pataninel, utz uchomanik» yaʼom ri eqeleʼn che rech keʼuchajij konojel ri cristianos pa taq ri qaqʼij. Wariʼ kraj kubʼij che are kkʼamow qabʼe che utzijoxik ri utzij ri Dios, are kilowik che kebʼan ri wuj che esam pa ri Biblia, kril ri rajawaxik kbʼan pa ri nimaʼq taq riqbʼal ibʼ y kuya eqeleʼn chke ri e qachalal rech kkibʼan jalajoj taq chak. Xuqujeʼ kril ri kbʼan che ukojik ri pwaq y ri e nikʼaj chi jastaq che kʼo ubʼanik rukʼ ri kuchuj. Ronojel ri chak riʼ kuya utzilal chke konojel «ri aj uwo rachoch» ri Ajaw, Jesús (Mat. 24:45).

⁷ ¿E jachin riʼ «ri aj uwo rachoch»? Pa kebʼ oxibʼ tzij are konojel ri cristianos che kyaʼ ri kajwataj chke pa ri kikojonik. Are chiʼ xumaj lo ri kʼisbʼal taq qʼij, konojel e chaʼom che kebʼe pa ri kaj «ri aj uwo rachoch» ri qAjaw Jesús. Are kʼu, are chiʼ xqʼax ri tiempo xkibʼan jun kukʼ ri e kʼiʼalaj winaq che kbʼix nikʼaj chi chij chke (Juan 10:16).

⁸ Pa ri nimalaj kʼaxkʼolil, are chiʼ ri Jesús kpe che uqʼatik tzij y usachik uwach ri itzelal pa ri uwach Ulew, kukoj na ri jikalaj pataninel «pa kiwiʼ konojel ri jastaq re» (Mat. 24:46, 47). Ri e kʼo pa ri jikalaj pataninel ketewchix na rukʼ ri bʼenam pa ri kaj rech kkitzʼaqatisaj ri 144,000 che kekʼojiʼ pa ri kaj, chilaʼ kyaʼ taqanik pa kiqʼabʼ rech kkiqʼat tzij rukʼ ri Jesús. Are chiʼ e kʼo chi pa ri kaj, pa ri uwach Ulew kriqitaj ta chi jun jik pataninel, utz uchomanik; ri Jehová y ri Jesús kekikoj jujun chke ri kekanaj kan pa ri uwach Ulew rech «keʼajawin» o kkikʼam kibʼe ri winaq che kkiya kitobʼanik che ri uQʼatbʼal tzij ri Mesías (Sal. 45:16).

¿JASCHE RAJAWAXIK KOJNIMAN CHKE RI KEKʼAMOW QABʼE?

⁹ Ko kʼi rumal che rajawaxik kojniman chke ri kekʼamow qabʼe y kqakʼutu che kqakubʼsaj qakʼuʼx chkij. Jun chke ri rumal are ri kʼo pa Hebreos 13:17. Chilaʼ ri apóstol Pablo xubʼij: «Ri e areʼ kekichajij ri iwanimaʼ, ketaʼm kʼut chi rajawaxik kkibʼij na che ri Dios jas ri kibʼanom. Chixniman chke rech kkibʼan ri kichak rukʼ kikotemal, man rukʼ ta bʼis. We ta kʼu rukʼ bʼis kkibʼano, ma ta kʼo kiwechbʼej riʼ che». Je wariʼ ri e qachalal kojkichajij pa ri qakojonik, rumal laʼ rajawaxik kojniman chke y kqabʼan rukʼ ronojel qanimaʼ ri pixabʼ kkiya chqe.

¹⁰ Kqariq jun chi rumal pa 1 Corintios 16:14, ri Pablo xubʼij chilaʼ: «Ronojel ri jastaq ri kibʼano, chibʼanaʼ rukʼ loqʼoqʼebʼal ikʼuʼx». Rumal laʼ, waʼ taq qachalal riʼ are chiʼ kkichaʼ ubʼanik jun jastaq che kʼo kubʼan pa ri kikʼaslemal ri cristianos kkikoj jun utzalaj bʼantajik; ri loqʼoqʼebʼal. Ri Pablo xubʼij wariʼ chrij wajun bʼantajik riʼ: «Ri kʼo loqʼoqʼebʼal ukʼuʼx are riʼ kuqʼiʼ ri kʼax, chʼuchʼuj, man kpe ta royowal che jun chik we kuriq utzil, man kraqʼanisaj ta uqʼij, man kunimarisaj ta ribʼ, man kubʼan ta jastaq ri kʼixbʼal kibʼanik, man kutzukuj ta ri utz che chbʼil ribʼ, man kpe ta royowal, man kukʼol ta oyowal pa ranimaʼ. Man kkikot ta che ri man sukʼil taj, xaneʼ kkikot che ri qastzij. Ronojel kukochʼo, ronojel kukojo. Ronojel kukubʼaʼ wi ukʼuʼx, ronojel kuchʼijo. Ri loqʼoqʼebʼal kʼuxaj mawi ta jumul ksach uwach» (1 Cor. 13:4-8). ¿La mat qastzij che kqakubʼsaj qakʼuʼx chrij ri kkibʼan che ukʼamik qabʼe ri e qachalal? Y masach chqe che ri kkibʼan che ukʼamik qabʼe are jun kʼutbʼal re ri uloqʼoqʼebʼal ri Jehová.

¹¹ Kimik, ri Jehová tajin keʼukoj achijabʼ che xa e ajmakibʼ rech kkikʼam ubʼe ri utinamit junam rukʼ ri xubʼan pa ri nabʼe siglo. Are kʼu kqamay taj, rumal che ojer kanoq xuqujeʼ xeʼukoj achijabʼ che e ajmakibʼ rech xkibʼan ri kraj. Jun kʼutbʼal, xukoj ri Noé rech xuwok jun nimalaj jukubʼ y rech xuya ubʼixik che petinaq jun Nimalaj Jabʼ (Gén. 6:13, 14, 22; 2 Ped. 2:5). Xukoj ri Moisés rech xresaj lo ri tinamit Israel pa Egipto (Éx. 3:10). Xeʼukoj achijabʼ rech xkitzʼibʼaj ri Biblia (2 Tim. 3:16; 2 Ped. 1:21). Rukʼ wariʼ, are chiʼ kqilo che ri Dios keʼukoj achijabʼ che xa e ajmakibʼ rech kkikʼam ubʼe ri kbʼan che utzijoxik ri utzij, xa ta kubʼan kebʼ qakʼuʼx chrij ri utinamit. Xaneʼ kojutoʼo rech kqakubʼsaj más qakʼuʼx chrij. ¿Jasche kqabʼij wariʼ? Rumal che, wet mat uyaʼom ri utobʼanik ri Jehová, kʼo ta kkun riʼ kubʼan ri utinamit. Ri jikalaj pataninel qʼaxinaq pa kʼi taq kʼax, y pa ronojel ri jastaq riʼ ukʼutum che kʼamom ubʼe rumal ri ruxlabʼixel ri Dios. Pa waʼ taq qʼij riʼ ri Jehová uyaʼom kʼi tewchibʼal puwiʼ ri utinamit, rumal laʼ rajawaxik kqakubʼsaj qakʼuʼx chrij wajun tinamit y kqaya ronojel ri qatobʼanik che.

¿JAS KQABʼAN CHE UKʼUTIK CHE KQAKUBʼSAJ QAKʼUʼX CHRIJ?

¹² Ri e qachalal che kʼo keqeleʼn pa ri congregación kkikʼutu che kkikubʼsaj kikʼuʼx chrij ri Jehová y chrij ri utinamit are chiʼ rukʼ kikotemal kkibʼan ri chak kyaʼ chke (Hech. 20:28). Qonojel ri oj tzijol re ri utzalaj taq jastaq che kubʼan na ri uQʼatbʼal tzij ri Dios kqakʼutu che kqakubʼsaj qakʼuʼx chrij ri Jehová are chiʼ kqakoj qachuqʼabʼ che utzijoxik ri utzij chuchiʼ taq ja, keqasolij ri winaq y kqaya etaʼmanik re ri Biblia chke (Mat. 24:14; 28:19, 20). Xuqujeʼ kqakʼutu che kqakubʼsaj qakʼuʼx chrij, are chiʼ nim kqil ronojel ri jastaq che kuya ri jikalaj pataninel pa ri qakojonik. ¿Jas kqabʼano rech utz kqabʼan che ukojik wariʼ? Kqatijoj qibʼ che taq ri e riqbʼal ibʼ, kojbʼe pa ronojel ri e riqbʼal ibʼ y pa ri nimaʼq taq riqbʼal ibʼ. Rumal che chupam wariʼ keqachilaj ri e qachalal che kkiya qachuqʼabʼ (Heb. 10:24, 25).

¹³ Ri jun chi jastaq che kqabʼan che ukʼutik che kqakubʼsaj qakʼuʼx chrij ri utinamit ri Jehová are che kqaya ri qakuchuj (Prov. 3:9, 10). Ri upatanelabʼ ri Jehová aninaq kʼo kqabʼano are chiʼ kqetaʼmaj che ri e qachalal kajwataj ri qatobʼanik chke (Gál. 6:10; 1 Tim. 6:18). Pa apachike jastaq keqatoʼo rumal che keqaj, rukʼ wariʼ kqakʼutu che kqamaltyoxij ri ubʼanom ri Jehová y ri utinamit pa qawiʼ (Juan 13:35).

¹⁴ Chukʼisbʼal, kqakʼutu che kqakubʼsaj qakʼuʼx chrij ri utinamit ri Jehová are chiʼ kqaya ri qatobʼanik che ri kuchaʼ ubʼanik. Wariʼ kraj kubʼij che kqamachʼ qibʼ che ubʼanik ronojel ri kkibʼij ri e qachalal che kʼo keqeleʼn, junam kukʼ ri solinelabʼ re circuito y ri e kʼamal bʼe pa ri congregación. Rajawaxik kojniman chke waʼ taq qachalal, rumal che ri e areʼ xuqujeʼ e kʼo chkixoʼl ri kekʼamow qabʼe (Heb. 13:7, 17). Y rajawaxik kojniman chke paneʼ qas ta kqachʼobʼ ri kkichaʼ ubʼanik, rumal che we kqabʼano utz kojelik. Unimaxik ri kubʼij ri utinamit ri Dios y ri kubʼij ri Biblia kukʼutu che kqachʼobʼo che are ri Jesús ri ktaqan pa qawiʼ. We jeʼ kqabʼano, ri Jehová kojutewchij.

¹⁵ ¿La mat qastzij che kʼo kʼi rumal che kqakubʼsaj qakʼuʼx chrij ri jikalaj pataninel utz uchomanik? Qastzij. Ri Satanás, ri dios re ronojel ri jastaq che kʼo cho ri uwach Ulew tajin kukoj uchuqʼabʼ rech kutzʼilobʼisaj ri ubʼiʼ ri Jehová y ri utinamit (2 Cor. 4:4). Mojqaj pa ri uchapabʼal (2 Cor. 2:11). Ri areʼ retaʼm che xa «kebʼ oxibʼ qʼij chik kʼolik» rech kkʼaq bʼi pa ri qʼequʼmalaj jul, rumal laʼ kraj che e kʼi winaq kkiya kan upatanexik ri Jehová (Apoc. 12:12). Ri Itzel sibʼalaj tajin kukoj uchuqʼabʼ rech kqaya kan ri Jehová, rumal laʼ rajawaxik kqakoj más qachuqʼabʼ rech kojqebʼ rukʼ ri qaDios. Rumal riʼ amaqʼel chqakubʼsaj qakʼuʼx chrij ri Jehová y chkij ri tajin keʼukoj kimik rech kkikʼam ubʼe ri utinamit. We jeʼ kqabʼano, junam riʼ kojchakun pa ri utinamit.