Moisés kuchaʼ uqʼijilaxik ri Jehová

Are chiʼ e kʼo na pa Egipto, ri winaq che e ufamilia ri Jacob xbʼix israelitas chke. Are chiʼ ri Jacob xuqujeʼ José e kaminaq chik, jun kʼakʼ faraón xumaj ajawinik. Wajun faraón riʼ uxibʼim ribʼ rumal che ri israelitas tajin keʼux más nim kichuqʼabʼ chkiwach ri egipcios. Rumal laʼ xubʼano che keʼux ajchakibʼ che tojom ta kiqʼij. Keʼutaqchiʼj che ubʼanik ladrillos xuqujeʼ rech sibʼalaj kechakun pa taq ri Ulew. Pa neʼ ri egipcios sibʼalaj kkibʼan kʼax chke, ri israelitas tajin kenimarik. Rumal che ri faraón utz ta kril wariʼ, xuya ri taqanik che kekamisax konojel ri alaj taq akʼalabʼ alabʼom che kʼateʼ xeʼalaxik, are kʼu kekamisax ta ri alaj taq alitomabʼ. ¿La kachomaj ri xibʼin ibʼ kkinaʼ ri israelitas?

Jun ixoq israelita ubʼiʼ Jokébed xkʼojiʼ jun jeʼlalaj ral. Rech kuchajij, xuya pa jun chakach tekʼuriʼ xukʼuʼ pa taq ri patzʼan rech ri Nilo. Míriam, ri ranabʼ ri alaj neʼ, xkʼojiʼ naqaj rech kril ri kkʼulmatajik.

Ri umiʼal ri faraón xbʼe che ubʼanik atinem pa ri nimaʼ, xril ri chakach. Xrilo che chupam kʼo jun alaj neʼ che tajin koqʼik, xel ukʼuʼx che. Míriam xutaʼ che: «¿La kawaj kinbʼe che utzukuxik jun ixoq che kuya utuʼ ri akʼal?». Areʼ xubʼij che utz, Míriam xbʼe che ukʼamik ri unan. Ri umiʼal ri faraón xubʼij che Jokébed: «Chakʼamaʼ bʼi ri alaj neʼ, chachajij e ri in katintojo».

Are chiʼ xkʼiy ri akʼal, Jokébed xukʼam bʼi che ri umiʼal ri faraón. Are xukoj Moisés che ubʼiʼ xuqujeʼ xrilij junam che ral. Moisés xux jeʼ ta neʼ ukʼojol ri ajawinel xuqujeʼ kkunik kkʼojiʼ rukʼ ronojel ri kraj. Are kʼu xsach ta ri Jehová che. Moisés retaʼm che are jun israelita, are ta jun egipcio, are xuchaʼ upatanexik ri Jehová.

Are chiʼ kʼo chi 40 ujunabʼ, Moisés xuchomaj kitoʼik ri winaq rech ri utinamit. Jun qʼij, xrilo che jun egipcio tajin kuchʼay jun ajchak israelita. Are chiʼ xril wariʼ, Moisés sibʼalaj xuchʼay rukʼ chuqʼabʼ che xubʼano che xkamik, tekʼuriʼ xumuq ri egipcio pa ri sanyabʼ. Are chiʼ ri faraón xretaʼmaj wariʼ, xraj xukamisaj ri Moisés, are kʼu areʼ xanimaj bʼik xuqujeʼ xbʼe pa Madián. Chilaʼ ri Jehová xuchajij.