Ri Dios xeʼutoʼ ri israelitas

QʼAXINAQ chi kʼi junabʼ ri israelitas kʼo chi kʼi jastaq ke pa Egipto, xuqujeʼ xekʼiyarik. Tekʼuriʼ xok chi jun faraón, che itzel xuqujeʼ xaq ktaqanik che xretaʼmaj ta uwach ri José. Rumal che xrilo che xekʼiyarik ri israelitas, xeʼutaq che ubʼanik nimaʼq taq chak xuqujeʼ xeʼujiqʼisaj ri alaj taq neʼ alabʼom chupam ri jaʼ Nilo. Jun ixoq israelita che xuxibʼij ta ribʼ xuya ri alaj uneʼ chupam jun chakach xuqujeʼ xukʼuʼ pa taq ri qʼayes. Ri umiʼal ri faraón xuriq ri alaj neʼ, xukoj Moisés che ubʼiʼ xuqujeʼ xukʼiyisaj pa rachoch ri faraón.

Chiʼ kʼo chi 40 ujunabʼ, ri Moisés xutzukuj chʼoj chirij rumal che xutoʼ jun israelita che tajin kchʼay rumal jun egipcio, rumal laʼ xanimaj bʼik xbʼe pa jun tinamit che kʼo naj. Chiʼ kʼo chi 80 ujunabʼ, ri Dios xubʼij che ktzalij pa Egipto xuqujeʼ xubʼij che kubʼij che ri faraón che kuya chike ri israelitas keʼel bʼik.

Rumal che ri faraón kraj taj keʼel bʼik, ri Dios xukʼajisaj uwach ri tinamit chiʼ xukʼam lo lajuj kʼax puwiʼ. Chiʼ majaʼ kpe jun chike ri kʼax, ri Moisés kbʼe che ubʼixik che ri faraón che kpe ta ri kʼax we keʼutzoqopij bʼik. Tekʼuriʼ ri faraón rumal ri unimal kunimaj ta ri Moisés xuqujeʼ ri Jehová. Pa ri ulajuj o ukʼisbʼal kʼax, ri Dios xutaq jun ángel rech xeʼukamisaj ri e nabʼeʼal re ri tinamit. Ri e nabʼeʼal che ri ángel xeʼukamisaj taj are ri e kalkʼwal ri familia che xkinimaj ri Jehová che xkitzʼaj uwiʼ ri uchija che ukikʼel jun alaj chij che xkikamisaj. Rech kkinaʼtisaj wajun bʼantajik riʼ, ri israelitas konojel ri e junabʼ kkibʼan jun nimaqʼij ubʼiʼ Pascua.

Chiʼ xkam ri unabʼeʼal ri faraón, xubʼij che ri Moisés xuqujeʼ chike ri israelitas che keʼel bʼi pa Egipto. Ri e areʼ aninaq xeʼel bʼik. Tekʼuriʼ, ri faraón xukʼex ri uchomabʼal xeʼukʼam bʼi ri uchʼichʼ xuqujeʼ ri e rajchʼojabʼ xebʼe che kitereneʼxik. Chiʼ xeʼopan chuchiʼ ri mar Rojo, qʼalaj che ri israelitas kʼot kebʼe wi. Tekʼuriʼ ri Jehová xubʼano che ri nimalaj jaʼ xujach ribʼ, ri tinamit xeqʼax bʼi pa chaqiʼj ulew. Chiʼ ri egipcios xebʼe chikij, ri Dios xubʼano che xutzʼapij chi ribʼ ri jaʼ rukʼ waʼ xjiqʼ ri faraón xuqujeʼ ri achijabʼ che e bʼenaq rukʼ.

Xeqʼax ri qʼij, ri israelitas xeʼopan chuxukut ri juyubʼ ubʼiʼ Sinaí, chilaʼ ri Jehová xubʼan jun pacto kukʼ. Xukoj ri Moisés che qʼaxal utzij, xuya taqanik chike rech kukʼam kibʼe xuqujeʼ keʼuchajij pa ronojel ri kikʼaslemal. We kenimanik xuqujeʼ e sukʼ, ri Dios kkʼojiʼ riʼ kukʼ xuqujeʼ keʼukoj che utewchixik nikʼaj chik tinamit.

Tekʼuriʼ, kʼi chike xkikubʼsaj ta kikʼuʼx chirij. Rumal laʼ xukʼajisaj kiwach, ri Dios xubʼan chike che 40 junabʼ xewakat pa ri chaqiʼj ulew. Tekʼuriʼ, Moisés xukoj ri sukʼalaj israelita ubʼiʼ Josué che ukʼaxel. Kʼisbʼal re, xopan ri qʼij che Israel kok bʼi pa ri ulew che xtzujux che ri Abrahán rumal ri Dios.

(Esam chupam Éxodo, Levítico, Números, Deuteronomio, Salmo 136:10-15 xuqujeʼ Hechos 7:17-36.)