Ri e nabʼe oxibʼ kʼax

Ri israelitas kekitaqchij che ubʼanik kʼaxalaj taq chak kumal ri egipcios xuqujeʼ ketoj taj. Jehová xutaq bʼi Moisés xuqujeʼ Aarón rech kkibʼij wajun tzij riʼ che ri faraón: «Chayaʼ che ri nutinamit rech kbʼe pa ri desierto che nuqʼijilaxik». Ri faraón sibʼalaj nim kubʼan che ribʼ rumal laʼ xubʼij: «Kinimaj ta ri kubʼij ri Jehová. Kinya taj che kebʼe ri israelitas». Rumal laʼ, ri faraón xuya más kʼaxalaj chak chke ri israelitas. Are kʼu ri Jehová xuchomaj che kukʼut na ri uchuqʼabʼ chuwach. ¿Jas xubʼano? Xutaq lo ri e Lajuj Kʼax pa uwiʼ Egipto. Jehová xubʼij che Moisés: «Ri faraón kuta ta ri kinbʼij che. Pa ri aqʼabʼil areʼ kopan chuchiʼ ri nimaʼ Nilo. Jat chabʼij che ronojel ri joron kux kikʼ rumal che kuya taj che ri nutinamit kbʼek». Moisés xunimaj xbʼe che rilik ri faraón. Ri faraón xril Aarón kuchʼay ri Nilo rukʼ ri uchʼamiʼy, ri joron xux kikʼ. Ri nimaʼ xchuwirik, utz taj ktijow ri joron, xuqujeʼ ri e kar xekamik. Are kʼu ri faraón kraj taj xeʼutzoqopij bʼi e israelitas pa ri desierto.

Qʼaxinaq chi wuqubʼ qʼij, Jehová jumul chik xubʼij che Moisés che kbʼe che uyaʼik jun tzij che ri faraón: «We kaya ta che ri tinamit kbʼek, Egipto knoj chke ri xtutzʼ». Rumal che faraón xubʼan ta ri xbʼix che, Aarón xuyak ri uchʼamiʼy xuqujeʼ ronojel ri tinamit xnoj chke xtutzʼ. E kʼo xtutzʼ pa ri kachoch ri winaq, pa ri kichʼat, pa ri kilaq re ri kirikil... ¡Pa ronojel lugar e kʼo wi! Ri faraón xubʼij che Moisés: Chataʼ toqʼobʼ che Jehová rech kresaj wajun kʼax riʼ. Tekʼuriʼ, kinya bʼe chke ri israelitas kebʼek. Rumal laʼ Jehová xresaj ri kʼax, ri egipcios xekimulij ri e kaminaq taq xtutzʼ pa taq mulaj. Ri Ulew sibʼalaj xchuwirik, are kʼu jumul chik, ri faraón xuya taj che ri tinamit xel bʼik.

Tekʼuriʼ, Jehová xubʼij che Moisés: «Chabʼij che Aarón kuchʼay ri Ulew rukʼ ri uchʼamiʼy. Are chiʼ kubʼano, ri ulew kux e us». Jeʼ ri xkʼulmatajik, pa ronojel lugar e kʼo wi us che kekitiʼ ri e winaq: «¡Wajun kʼax ri petinaq rukʼ Dios!». Are kʼu, ri faraón xuya taj che xeʼel bʼi ri israelitas.